Keti Nge Kele ti Lukwikilu?

Sambu na kusepedisa Yehowa, beto fwete vanda ti lukwikilu. Kansi Biblia ke tubaka nde “bantu yonso ve ke vandaka ti lukwikilu.” (2 Bate. 3:2) Ntangu ntumwa Polo tubaka mambu yina, yandi vandaka kutubila ‘bantu ya ke kotaka bankaka nsoki mpi bantu ya mbi’ yina vandaka kuniokula yandi. Kansi mambu yina yandi tubaka sambu na lukwikilu ke tadila mpi bantu ya nkaka. Bantu ya nkaka ke buyaka na luzolo yonso mambu yina ke monisa pwelele nde Ngangi kele, disongidila Nzambi. (Bar. 1:20) Bankaka lenda tuba nde bo ke kwikilaka na Nzambi, kansi kundima kaka mpidina kele ve lukwikilu ya kieleka.

Beto fwete ndima kibeni nde Yehowa kele mpi nde yandi kele “muntu yina ke pesaka matabisi” na bantu yina kele ti lukwikilu ya ngolo. (Baeb. 11:6) Lukwikilu kele na kati ya bikalulu ya mbuma ya mpeve santu. Sambu muntu kubaka mpeve santu, yandi fwete lomba yo na Yehowa na kisambu. (Luka 11:9, 10, 13) Kima ya nkaka ya mfunu yina beto fwete sala sambu na kubaka mpeve santu kele, kutanga Biblia yina bo sonikaka na ngolo ya mpeve santu ya Nzambi. Na nima beto fwete yindula mambu yina beto ke tanga mpi kusadila yo. Kana beto sala mutindu yina, mpeve santu ya Yehowa ta sadisa beto na luzingu mpi yo ta sadisa beto na kuvanda ti lukwikilu yina ke sepedisaka yandi.