Mambu ya Mbi ya Ke Salamaka na Bitumba
Bitumba lenda natila bantu yina yo ke salama kisika bo kele bampasi. Basoda mpi basivile yina me monaka bitumba me zaba nde bitumba ke vandaka mbi kibeni.
BASODA
Gary yina ke zingaka na Grande Bretagne ke tuba nde: “Ntangu yonso nge ke mona mutindu bantu ke fwa, bo ke lwala mpi bo ke bukana. Konso ntangu, nge ke kudiwa na kigonsa.”
Wilmar yina ke zingaka na Colombie ke tuba nde: “Bo bulaka mono masasi na mukongo mpi na elungi, ebuna mono monaka bantu mingi me fwa, yo vandaka bana ya fioti mpi bambuta. Bitumba ke kumisaka ntima ngolo.”
Zafirah yina ke zingaka na États-Unis ke tuba nde: “Kana bo me bula muntu yina kele na ntwala na nge masasi, nge ta kuka ve kuvila yo. Nge ta monaka na mabanza mutindu yandi ke niokwama mpi nge ta waka mutindu yandi ke dila. Nge ta vila yandi ve ata fioti.”
BASIVILE
Oleksandra yina ke zingaka na Ukraine ke tuba nde: “Mono monaka bonso nde mono ta vandaka diaka ve na kiese. Mono vandaka kuwa boma nde mono ta fwa, kansi mono vandaka kuwa diaka boma ya ngolo nde bantu ya dibuta na beto mpi banduku na mono ta fwa.”
Daler yina ke zingaka na Tadjikistan ke tuba nde: “Beto vandaka kuwa boma sambu beto vandaka kutula ndonga banda na 2 heures tii na 23 heures sambu na kubaka madia, mpi beto vandaka kuzaba nde masasi ya bitumba yina vandaka kusalama pene-pene ti kisika yina beto vandaka lendaka kubaka beto na konso ntangu yina.”
Marie yina ke zingaka na Rwanda ke tuba nde: “Bibuti na mono fwaka na bitumba. Sambu na bitumba, mono kumaka mwana ya nsiona mpi yo vandaka ve ata ti muntu mosi sambu na kupesa mono kikesa mpi kulungisa bampusa na mono.”
Ata bantu yai monaka mpasi sambu na bitumba, bubu yai bo ke zingaka na ngemba. Diaka, bo ke ndimaka nde bitumba yonso mpi mambu yonso ya mubulu ta mana ntama mingi ve. Nimero yai ya Nzozulu ya Nkengi ta sadila Biblia sambu na kumonisa mutindu mambu yango ta salama.