Sadila Biblia Mbote Bonso Tala-Tala

Longoki Yakobo fwanisaka Biblia ti tala-tala yina ke sadisaka beto na kutala kimuntu na beto ya kati. (Yak. 1:22-25) Inki mutindu beto lenda sadila mbote Biblia bonso tala-tala?

Tanga yo mbote-mbote. Kana beto me losa kaka disu nswalu ntangu beto ke kuditala na tala-tala, beto lenda tula mpenza ve dikebi na kisika mosi yina yo ke lomba kibeni nde beto yidika. Mutindu mosi mpi, sambu na kumona bisika yina beto fwete yidika na kimuntu na beto ya kati, beto fwete tanga Ndinga ya Nzambi mbote-mbote.

Tula dikebi na mambu ya nge fwete yidika kansi ve na yina bantu ya nkaka fwete yidika. Bantangu ya nkaka, ntangu beto ke kuditala na tala-tala, beto lenda mona mpi muntu ya nkaka mpi kutula dikebi na mambu ya ke kwendila ve na nitu na yandi. Mutindu mosi mpi, ntangu beto ke tanga Biblia, beto lenda mona kaka mambu ya mbi yina muntu ya nkaka fwete yidika. Kansi kusala mutindu yai ta sadisa beto ve na kuyidika mambu yina beto mosi fwete yidika.

Kuvanda ve makambu ngolo. Kana beto ke landa kutula dikebi kaka na bifu na beto yina beto ke mona na tala-tala, yo lenda lembisa beto. Beto fwete vanda ve makambu ngolo ntangu beto ke tanga Ndinga ya Nzambi, disongidila beto fwete kuditadila ti bukati-kati mutindu Yehowa ke tadilaka beto.​—Yak. 3:17.