‘Beno Pona Beno Mosi Nani Beno Ta Sadila’

1. Inki beto fwete sala sambu na kuzinga mpenza na kiese mpi sambu na nki? (Yezaya 48:17, 18)

TATA na beto ya zulu ke zolaka beto mingi mpi yandi ke zolaka nde beto zinga na kiese bubu yai mpi na bilumbu ke kwisa. (Lon. 3:12, 13) Yandi me salaka beto ti makuki ya kuyituka, kansi yandi me pesaka beto ve makuki ya kuditwadisa mbote beto mosi to makuki ya kuditudila bansiku ya mambu ya mbote mpi ya mbi. (Lon. 8:9; Yer. 10:23) Yehowa ke zabaka nde sambu beto vanda mpenza na kiese, beto fwete sadila yandi mpi kuzitisa minsiku na yandi.​—Tanga Yezaya 48:17, 18.

2. Inki Satana ke sosaka kundimisa beto mpi nki mutindu Yehowa me monisaka nde Satana tubaka luvunu?

² Satana ke sosaka kundimisa beto nde, beto lenda vanda na kiese mpi kuditwadisa mbote ata beto ke sadila ve Yehowa. (Kuy. 3:4, 5) Yo yina, Yehowa me bikaka nde bantu kuditwadisa bo mosi sambu na mwa ntangu sambu na kumonisa nde Satana tubaka luvunu. Yo ke monana pwelele nde bantu ke kuka ve kuditwadisa mbote ata fioti. Kansi Biblia kele ti bambandu mingi ya babakala mpi ya bankento yina vandaka kuzinga na kiese sambu bo vandaka kusadila Yehowa. Yezu Kristu kele mpi na kati ya bantu yango mpi yandi vandaka ti luzingu ya kuluta kiese. Ntete, beto tadila bikuma yina pusaka yandi na kupona kusadila Yehowa. Na nima, beto ta longuka sambu na nki yo me fwana nde beto sambila Tata na beto ya zulu. Na nsuka, beto ta tadila diaka mwa bikuma yina ke pusaka beto na kupona kusadila Yehowa.

BIKUMA YINA PUSAKA YEZU NA KUPONA KUSADILA YEHOWA

3. Inki Satana sosaka kupesa Yezu mpi nki lukanu Yezu bakaka?

³ Ntangu Yezu vandaka na ntoto, yandi monisaka ntangu yonso nde yandi vandaka kaka ti lukanu ya kusadila Yehowa. Mu mbandu, ntangu fioti na nima ya mbotika ya Yezu, Satana songaka yandi nde yandi ta pesa yandi bimfumu yonso ya ntoto kana Yezu kusambila yandi ata mbala mosi mpamba. Yezu vutudilaka yandi nde: “Katuka awa, Satana! Sambu bo me sonikaka nde: ‘Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.’” (Mat. 4:8-10) Sambu na nki Yezu ponaka kusambila kaka Yehowa? Beto tadila mwa bikuma yina pusaka yandi na kubaka lukanu yango.

4-5. Tubila mwa bikuma yina pusaka Yezu na kupona kusadila Yehowa.

⁴ Zola kele kikuma ya ntete yina pusaka Yezu na kusambila Yehowa. Yezu ke zolaka Tata na yandi mingi kibeni. (Yoa. 14:31) Diaka, Yezu ke sadilaka Yehowa sambu yo kele kima ya kuluta mbote ya kusala. (Yoa. 8:28, 29; Kus. 4:11) Yandi ke zabaka nde Yehowa kele Nto ya luzingu, yandi me fwana nde beto tudila yandi ntima mpi yandi ke pesaka beto bima mingi ya mbote. (Nk. 33:4; 36:9; Yak. 1:17) Yehowa vandaka kusonga Yezu ntangu yonso kieleka mpi yandi pesaka Yezu bima yonso yina Yezu vandaka ti yo. (Yoa. 1:14) Kansi Satana muntu me nataka lufwa na ntoto. Yandi kele muntu ya luvunu, ya lukasi mpi ya ke sosaka kaka mambote na yandi. (Yoa. 8:44) Yezu zabaka mambu yai yonso, yo yina yandi sosaka ve ata fioti kukolama na Yehowa bonso Satana.​—Bafil. 2:5-8.

⁵ Kuyindula mambote yina kisalu na yandi zolaka kunatila bantu kele kikuma ya nkaka yina pusaka Yezu na kupona kusadila Yehowa. (Baeb. 12:2) Yandi zabaka nde kana yandi landa kukangama kaka na Yehowa, yandi ta santisa zina ya Tata na yandi mpi yo ta sala nde bampasi yonso yina Diabulu me natilaka bantu kuvanda diaka ve.

SAMBU NA NKI YO ME FWANA NDE BETO SAMBILA KAKA YEHOWA?

6-7. Sambu na nki bantu mingi bubu yai ke sambilaka ve Yehowa, kansi sambu na nki yo me fwana nde beto sambila kaka yandi?

⁶ Bantu mingi bubu yai ke sambilaka ve Yehowa sambu bo me longukaka ntete ve bikalulu na yandi ya mbote mpi bo ke zabaka ve mambu yonso ya mbote yina yandi me sadilaka bo. Yo vandaka mpi mutindu mosi sambu na bantu ya Atene yina ntumwa Polo longaka nsangu ya mbote.​—Bis. 17:19, 20, 30, 34.

⁷ Polo tendudilaka bo nde Nzambi ya kieleka muntu “ke pesaka bantu yonso luzingu, mpema, mpi bima yonso.” Yandi yikaka nde: “Na nzila na yandi beto kele na luzingu, beto ke tambulaka, mpi beto ke zingaka.” Nzambi kele Ngangi yina ‘salaka makanda yonso ya bantu na nzila ya muntu mosi.’ Yo yina, yo me fwana mpenza nde beto sambila kaka yandi.​—Bis. 17:25, 26, 28.

8. Inki Yehowa ke salaka ve ata fioti mpi nki mutindu yandi ke monisaka nde yandi ke zolaka beto mingi?

⁸ Mutindu Yehowa kele Ngangi mpi Mfumu ya Kuluta Nene na zulu mpi na ntoto, yandi lendaka kupusa bantu na kingolo-ngolo na kusambila yandi. Kansi, yandi ke salaka yo ve ata fioti. Na kisika ya kusala mutindu yina, yandi me pesaka beto bima mingi ya ke monisa pwelele nde yandi kele mpi nde yandi ke zolaka mingi konso muntu na kati na beto. Yandi ke zolaka nde bantu mingi kibeni kuvanda banduku na yandi mvula na mvula. (1 Tim. 2:3, 4) Yo yina, yandi ke pesaka beto formasio sambu na kulonga bantu ya nkaka mambu ya kitoko yina yandi ta sala sambu na bantu mpi mutindu yandi ta sala yo. (Mat. 10:11-13; 28:19, 20) Diaka, yandi me tulaka beto na dibundu na yandi mpi yandi me pesaka beto bankuluntu ya zola sambu na kukeba beto.​—Bis. 20:28.

9. Inki mutindu Yehowa ke monisaka nde yandi ke zolaka bantu yonso?

⁹ Zola ya kuyituka ya Yehowa ke monanaka pwelele mutindu yandi ke salaka mambu sambu na bantu yina ke kwikilaka ve na yandi. Beto tadila mambu yai: Banda bamvula mingi, bantu mingi mpenza ke buyaka kulemfukila Yehowa mpi bo ke ponaka kuzinga mutindu bo me zola. Ata mpidina, Yehowa ke pesaka bo bima ya mfunu yina ke sadisaka bo na kuzinga mpi na kusepela na luzingu. (Mat. 5:44, 45; Bis. 14:16, 17) Mu mbandu, Yehowa me salaka nde bo vanda ti banduku mpi mabuta ya ke zolaka bo, yandi me pesaka bo makuki ya kusala kisalu ya ngolo, ya kubakila yo mambote mpi ya kusepela ti luzingu. (Nk. 127:3; Lon. 2:24) Mambu yai ke monisa pwelele nde Tata na beto ya zulu ke zolaka bantu yonso. (Kub. 34:6) Beto tadila sesepi mwa bikuma yina ke pusaka beto na kusadila Yehowa mpi mutindu yandi ke sakumunaka bantu yina ke sadilaka yandi.

BIKUMA YINA KE PUSAKA BETO NA KUPONA KUSADILA YEHOWA

10. (a) Tubila kikuma ya ntete yina ke pusaka beto na kusadila Yehowa. (Matayo 22:37) (b) Inki mambote nge me bakaka mutindu Yehowa me monisilaka nge ntima-nda? (Nkunga 103:13, 14)

¹⁰ Bonso Yezu, beto ke sadilaka Yehowa ntete-ntete sambu beto ke zolaka yandi mingi kibeni. (Tanga Matayo 22:37.) Ntangu beto ke longukaka bikalulu ya Yehowa, yo ke salaka nde beto pusana pene-pene na yandi. Mu mbandu, beto tadila mutindu Yehowa ke monisilaka beto ntima-nda. Ntangu bantu ya Izraele vandaka kulemfukila yandi ve mbala na mbala, yandi vandaka kubondila bo nde: “Pardo, beno yambula banzila na beno ya mbi.” (Yer. 18:11) Ata beto ke salaka bifu mingi, Yehowa ke lolulaka beto sambu yandi ke zabaka nde beto kele bantu ya kukonda kukuka mpi mfututu. (Tanga Nkunga 103:13, 14.) Kana nge ke yindula mingi ntima-nda ya Yehowa mpi bikalulu na yandi ya nkaka ya mbote, yo ta pusa nge na kusadila yandi mvula na mvula.

11. Tubila mwa bikuma ya ke pusaka beto na kupona kusadila Tata na beto ya zulu.

¹¹ Beto ke sadilaka mpi Yehowa sambu yo kele kima ya kuluta mbote ya kusala. (Mat. 4:10) Diaka, beto ke zabaka nde kana beto ke landa kaka kukangama na Yehowa, yo ta nata mambote mingi. Mu mbandu, yo ta santisa zina na yandi, yo ta monisa nde Diabulu kele muntu ya luvunu mpi yo ta pesa ntima ya Tata na beto kiese. Diaka, kana beto ke sadila Yehowa bubu yai, beto ta vanda ti kivuvu ya kusadila yandi mvula na mvula!​—Yoa. 17:3.

12-13. Mbandu ya mpangi Jane ti mpangi Pam ke longa beto nki?

¹² Ata beto kele ntete baleke, beto lenda kumisa ngolo zola na beto sambu na Yehowa mpi zola yango ta landa kaka kukuma ngolo ntangu beto ke yela. Beto tadila mbandu ya bampangi-bankento zole ya dibuta mosi. Mpangi Jane ti mpangi Pam.a Mpangi Jane vandaka ti bamvula 11 mpi mpangi Pam vandaka ti bamvula 10 ntangu bo yantikaka kulonguka Biblia. Ata bibuti na bo vandaka ve kusepela kulonguka Biblia, bo songaka bampangi yai nde bo lenda longuka Biblia ti Bambangi ya Yehowa kaka kana bo ke kwenda na nzo-nzambi yina bibuti yango vandaka kusamba na nsuka ya mposo. Mpangi Jane ke tuba nde: “Mambu yina Bambangi ya Yehowa longaka mono, sadisaka mono na kutelemina banduku na mono yina vandaka kupusa mono na kusadila bima yina ke lawusaka mpi na kusala pite.”

¹³ Mwa bamvula na nima, bo zole kumaka bansamuni mpi na nima, bo kumaka bapasudi-nzila ata bo kumaka kukeba bibuti na bo yina kumaka minunu. Na nima ya kuyindula mambu yonso yina Yehowa me sadilaka bo, mpangi Jane ke tuba nde: “Mono me bakisaka mpenza nde Yehowa ke kebaka mbote banduku na yandi mpi mutindu 2 Timoteo 2:19 ke monisa yo, ‘Yehowa me zaba bantu na yandi.’” Ntembe kele ve nde Yehowa ke kebaka bantu yonso yina ke zolaka yandi mpi ke sadilaka yandi!

14. Inki mutindu mambu yina beto ke tubaka mpi ke salaka ke santisaka zina ya Yehowa? (Tala mpi bifwanisu.)

¹⁴ Beto ke zolaka kusadisa bantu ya nkaka na kuzaba nde mambu ya mbi yina bo me waka sambu na Yehowa kele ya luvunu. Beto tadila mbandu yai: Yindula nde nge kele ti nduku mosi ya ngolo ya kele mawete, ya ke kabaka mpi ya ke vandaka ti kikalulu ya kulolula. Kansi kilumbu mosi nge me wa muntu mosi ke tuba nde nduku na nge yango ke vandaka nku mpi yandi ke vandaka ve masonga. Inki nge ta sala? Nge ta kotila nduku na nge yina. Mutindu mosi mpi, ntangu Satana ti bantu na yandi ke tubaka mambu ya luvunu sambu na kubebisa lukumu ya Yehowa, beto ke kotilaka Yehowa mpi ke nwaninaka zina na yandi ti kikesa yonso. (Nk. 34:1; Yez. 43:10) Mpidina, mambu yina beto ke tubaka mpi ke salaka ke monisaka nde beto ke sadilaka Yehowa na ntima ya mvimba.

15. Inki mambote ntumwa Polo bakaka mutindu yandi sobaka balukanu na yandi? (Bafilipi 3:7, 8)

¹⁵ Beto ke ndimaka na luzolo yonso kusoba balukanu na beto sambu na kusadila Yehowa na mutindu yandi ke zolaka to sambu na kudipesa mingi na kisalu na yandi. Mu mbandu, ntumwa Polo ndimaka kuyambula kisika mosi ya lukumu na dibundu ya Bayuda sambu na kulanda Kristu mpi kusadila Yehowa. (Bag. 1:14) Yo yina, yandi vandaka ti luzingu ya mbote kibeni mpi yandi me bakaka dibaku ya kuyala ti Kristu na zulu. Yandi kudiyangisaka ve ata fioti sambu na lukanu yina yandi bakaka ya kusadila Yehowa. Bonso yandi, beto ta kudiyangisa mpi ve sambu na lukanu na beto ya kusadila Yehowa.​—Tanga Bafilipi 3:7, 8.

16. Mbandu ya mpangi-nkento Julia ke longa beto nki? (Tala mpi bifwanisu.)

¹⁶ Kana beto ke tula kisalu ya Yehowa na kisika ya ntete, beto ta vanda ti luzingu ya mbote bubu yai mpi na bilumbu ke kwisa. Beto tadila mbandu ya mpangi-nkento Julia. Na ntwala ya kuzaba kieleka, yandi vandaka kuyimba na korale mosi ya nzo-nzambi na bo banda na kileke na yandi. Muntu mosi ya me zaba miziki mbote bakisaka nde Julia vandaka kuyimba mbote, yo yina yandi pesaka yandi formasio. Na nima ya mwa ntangu, Julia kumaka kuyimba mpi kukina na bisika ya nene mpi yandi zabanaka mingi kibeni. Ntangu yandi vandaka kulonguka na nzo-nkanda mosi ya miziki ya me zabanaka mingi, mwana-klase na bo mosi yantikaka kusonga yandi mambu ya Nzambi mpi yandi songaka yandi nde zina ya Nzambi kele Yehowa. Ntangu fioti na nima na yo, yandi yantikaka kulonguka Biblia mbala zole konso mposo. Nsuka-nsuka, yandi bakaka lukanu ya kudipesa na kisalu ya Yehowa na kisika ya kudipesa na miziki. Yo vandilaka yandi ve pete na kubaka lukanu yina. Yandi ke tuba nde: “Bantu mingi vandaka kusonga mono nde mono vandaka kubebisa don na mono ya miziki, kansi mono zolaka kusadila luzingu na mono ya mvimba na kisalu ya Yehowa.” Inki mutindu yandi ke kudiwaka sambu na lukanu yina yandi bakaka bamvula kiteso ya 30 me luta? Yandi ke tuba nde: “Mono ke vandaka na ngemba mpi mono ke tulaka ntima nde Yehowa ta lungisa banzala yonso ya ntima na mono na bilumbu ke kwisa.”​—Nk. 145:16.

LANDA KUSADILA YEHOWA

17. (a) Bantu yina me bakaka ntete ve lukanu ya kusadila Yehowa fwete sala nki mpi sambu na nki? (b) Inki bantu yina ke sadilaka dezia Yehowa fwete zaba?

¹⁷ Nsuka ya nsi-ntoto yai me kuma kibeni pene-pene. Ntumwa Polo sonikaka nde: “Sambu me bika ‘ntangu fioti kibeni,’ ebuna ‘muntu yina ke kwisa ta kuma mpi yandi ta sukinina ve.’” (Baeb. 10:37) Yo ke tendula nki? Ntangu me bikala fioti sambu bantu yina ke sadila ntete ve Yehowa kupona kusadila yandi, yo yina bo fwete sala yo nswalu kibeni. (1 Bak. 7:29) Mpi kana beto me bakaka dezia lukanu ya kusadila Nzambi, beto ke zabaka nde ata beto ke kutana ti bampasi mpi beto ke kangila yo ntima, yo kele kaka sambu na “ntangu fioti kibeni.”

18. Yehowa ti Yezu ke zola nde beto sala nki?

¹⁸ Yezu songaka bantu na kusuka ve kaka na kukuma balongoki na yandi, kansi mpi na kufula kulanda yandi. (Mat. 16:24) Yo yina, ata beto ke sadilaka Yehowa banda bamvula mingi, beto fwete vanda ti lukanu ya kulanda kaka kusadila yandi. Yehowa ke zola nde beto sala bikesa ya mingi sambu na kulanda kusadila yandi. Yo ke vandaka ve pete, kansi kusadila Yehowa ta natila beto balusakumunu mingi mpi yo ta sadisa beto na kuvanda na kiese banda bubu yai!​—Nk. 35:27.

19. Mbandu ya mpangi Gene ke longa beto nki?

¹⁹ Bantu mingi ke yindulaka nde kana bo ke sadila Yehowa, bo ta vanda ve ti luzingu ya kiese. Kana nge kele leke, keti nge ke yindula nde nge ta konda kima mosi kana nge ke sadila Yehowa? Mpangi-bakala Gene ya kele leke ke tuba nde: “Mono vandaka kuyindula nde kuvanda Mbangi ya Yehowa vandaka kukanga mono nzila ya kusala mambu yina ke pesaka kiese. Mono vandaka kumona bonso nde baleke mingi yina mono yelaka ti bo vandaka kulutisa ntangu ya mbote ntangu bo vandaka na bafete, ntangu bo vandaka kuzola bana-bankento mpi ntangu bo vandaka kubula bansaka ya bavideo ya mubulu. Kansi mono, mono vandaka kaka kulutisa ntangu na balukutakanu mpi na kisalu ya kulonga nsangu ya mbote.” Yo pusaka yandi na kusala nki? Yandi ke yika nde: “Mono kumaka kusala mambu ya mbi na kinsweki mpi yo pesaka mono kiese ya ntangu fioti. Kansi yo vandaka ve kiese ya kieleka. Mono yantikaka kuyindula bakieleka ya Biblia yina mono yambulaka mpi mono bakaka lukanu ya kuvutukila kusadila Yehowa na ntima ya mvimba. Banda pana, Yehowa ke pesaka mvutu na bisambu na mono yonso.”

20. Inki lukanu beto fwete vanda ti yo?

²⁰ Muyimbi-bankunga mosi yimbilaka Yehowa nde: “Kiese na muntu yina nge me sola mpi yina nge me nata pene-pene sambu yandi zinga na bibansala na nge.” (Nk. 65:4) Beto landa kuvanda ti lukanu ya kusadila Yehowa bonso Yozue yina tubaka nde: “Sambu na mono mpi bantu ya nzo na mono, beto ta sadila Yehowa.”​—Yoz. 24:15.