Kukangama Ngolo ti Bampangi Ke Natilaka Beto Mambote!

1-2. Inki ke vandaka mfunu mingi sambu na Yehowa mpi nki yandi ke zolaka nde beto sala.

MAMBU yina beto ke sadilaka bantu ke vandaka mfunu mingi sambu na Yehowa. Yezu longaka beto nde beto fwete zola bantu ya nkaka bonso beto mosi. (Mat. 22:37-39) Yo ke tendula nde beto fwete sadila ata bantu yina ke sambilaka ve Yehowa mambu ya mbote. Kana beto sala mpidina, yo ta monisa nde beto ke landa mbandu ya Yehowa Nzambi yina “ke basisaka ntangu na yandi sambu na bantu ya mbi mpi bantu ya mbote mpi [yina] ke nokisaka mvula sambu na bantu ya lunungu mpi bantu ya kukonda lunungu.”​—Mat. 5:45.

² Yehowa ke zolaka bantu yonso, kansi yandi ke zolaka mingi kibeni bantu yina ke lemfukilaka yandi. (Yoa. 14:21) Yandi ke zolaka nde beto landa mbandu na yandi. Yo yina, yandi ke lombaka beto na ‘kuzolana ngolo’ ti bampangi na beto. (1 Pie. 4:8; Bar. 12:10) Zola yango fwete vanda bonso yina beto ke vandaka ti yo sambu na bampangi na beto ya dibuta to banduku na beto ya ngolo.

3. Inki mambu beto fwete vila ve sambu na zola?

³ Kaka mutindu yo ke lombaka kukeba mbote kintuntu mosi ya beto me kuna sambu yo yela mbote, beto fwete tanina mpi zola na beto sambu na bampangi sambu yo landa kukuma ngolo. Ntumwa Polo pesaka Bakristu ndongisila nde: “Mbote zola na beno ya kimpangi kuvanda kaka.” (Baeb. 13:1) Yehowa ke zolaka nde beto landa kukumisa ngolo zola na beto sambu na bantu ya nkaka. Disolo yai ta tubila sambu na nki beto fwete kangama ngolo kibeni ti bampangi na beto mpi mutindu beto lenda landa kusala yo.

SAMBU NA NKI BETO FWETE KANGAMA NGOLO KIBENI TI BAMPANGI NA BETO?

4. Mutindu Nkunga 133:1 ke monisa yo, nki mutindu beto lenda monisa nde beto ke landaka kubaka na valere bumosi na beto? (Tala mpi bifwanisu.)

⁴ Tanga Nkunga 133:1. Beto ke ndima mpenza mambu yai ya muyimbi-bankunga sonikaka ntangu yandi tubaka nde kuvanda banduku ya kieleka ya bantu yina ke zolaka Yehowa kele “mbote kibeni” mpi “kiese mingi.” Kansi kaka mutindu muntu lenda kuma kumona mpamba nti mosi ya nene mingi yina yandi ke monaka konso kilumbu, beto lenda kuma mpi kumona mpamba bumosi ya kitoko yina beto ke vandaka na yo ti bampangi na beto. Beto ke monaka bampangi na beto mbala na mbala mpi mbala ya nkaka beto ke monaka bo mbala mingi konso mposo. Inki beto lenda sala sambu na kulanda kubaka bo na valere? Zola na beto sambu na bampangi ta kuma ngolo kana beto ke baka ntangu ya kuyindula mutindu konso muntu kele mfunu sambu na dibundu mpi sambu na beto.

5. Zola na beto ya kimpangi lenda pusa bantu ya nkaka na kusala nki?

⁵ Bantu ya nkaka yina ke kwisaka na balukutakanu na beto na mbala ya ntete ke yitukaka mingi na kumona zola yina beto ke monisilanaka ti bampangi. Kumona kaka zola yina beto ke monisilanaka lenda pusa bo na kundima nde beto kele Bakristu ya kieleka. Yezu tubaka nde: “Na diambu yai, bantu yonso ta zaba nde beno kele balongoki na mono​—kana beno ke zolana beno na beno.” (Yoa. 13:35) Beto tadila mbandu ya Chaithra, nkento mosi yina vandaka kutanga na iniversite mpi yina vandaka kulonguka Biblia ti Bambangi ya Yehowa. Ntangu bo bingisaka yandi na lukutakanu mosi ya distrike, yandi ndimaka kukwenda. Na nima ya kilumbu ya ntete ya lukutakanu yango, yandi songaka mpangi yina vandaka kulonguka na yandi Biblia nde: “Bibuti na mono me yambaka mono ntete ve. Kansi na lukutakanu yai, bantu me yamba mono mbala 52 kaka na kilumbu mosi! Dibuta yai ya kimpeve me sadisa mono na kundima mpenza nde Yehowa ke zolaka mono. Mono ke zola kukota mpi na dibuta yai.” Chaithra landaka kuyela na kimpeve mpi yandi bakaka mbotika na 2024. Ya kieleka, ntangu bantu yina ke kwisaka na mbala ya ntete na balukutakanu na beto ke monaka mambu ya mbote yina beto ke salaka, mu mbandu zola yina beto ke monisilanaka ti bampangi, mbala mingi yo ke pusaka bo na kundima kusadila Yehowa.​—Mat. 5:16.

6. Na nki mutindu kukangama ngolo ti bampangi na beto lenda tanina beto?

⁶ Kukangama ngolo ti bampangi lenda tanina beto. Polo songaka bampangi na yandi Bakristu nde: “Beno landa kupesana kikesa konso kilumbu . . . sambu kiyeka ya disumu yina ke kusaka kukumisa ve ata muntu mosi na kati na beno ntima-ngolo.” (Baeb. 3:13) Kana beto me lemba mpenza na kimpeve mpi beto ke zola mpenza kuvila nzila ya lunungu, Yehowa lenda sadila mpangi mosi ya ke tudilaka beto dikebi sambu yandi sadisa beto. (Nk. 73:2, 17, 23) Ya kieleka, lusadisu ya mutindu yai ke vandaka mbote sambu na beto.

7. Inki mutindu zola mpi bumosi ke wakana? (Bakolosai 3:13, 14)

⁷ Beto kele na dibundu yina bampangi ke salaka bikesa mingi ya kumonisilana zola mpi zola yango ke natilaka beto mambote mingi. (1 Yoa. 4:11) Mu mbandu, zola ke pusaka beto na “[kulanda] kukanga-ntima na mambu ya bantu ya nkaka” mpi yo ke sadisaka beto na kuzinga na bumosi. (Tanga Bakolosai 3:13, 14; Baef. 4:2-6) Kiese yina ke vandaka na balukutakanu na beto, ke vandaka ve ata na kimvuka mosi ya nkaka na ntoto.

BENO PESANA LUKUMU

8. Inki mutindu Yehowa ke sadisaka beto na kuzinga na bumosi?

⁸ Bumosi yina ke vandaka na dibundu na beto na ntoto ya mvimba kele kima ya kuyituka. Ata beto kele bantu ya kukonda kukuka, Yehowa muntu ke sadisaka beto na kuzinga na bumosi. (1 Bak. 12:24, 25) Biblia ke tuba nde “Nzambi ke longaka [beto] na kuzolana.” (1 Bate. 4:9) Yo ke tendula nde yandi ke songaka beto na Biblia mambu yina beto fwete sala mpenza sambu na kukangama ngolo ti bampangi. ‘Nzambi ke longaka beto’ ntangu beto ke longukaka mbote-mbote malongi na yandi mpi ke sadilaka yo. (Baeb. 4:12; Yak. 1:25) Mpi yai kele mpenza mambu yina Bambangi ya Yehowa ke salaka bikesa ya kusala.

9. Baroma 12:9-13 ke longa beto nki na yina me tala kupesa bantu ya nkaka lukumu?

⁹ Inki mutindu Ndinga ya Nzambi ke longaka beto na kukangama ngolo ti bampangi? Beto tala mambu yina Polo tubaka sambu na yo na Baroma 12:9-13. (Tanga.) Bangogo ya ke benda dikebi na beto mingi na baverse yai kele: “Na yina me tala kupesa bankaka lukumu, beno vanda bantu ya ntete.” Yo ke tendula nki? Yo ke tendula nde beto fwete vanda bantu ya ntete na ‘kuzola ngolo’ bantu ya nkaka, disongidila nde beto fwete lolula bo, kukabila bo mpi kusadila bo mambu mingi ya mbote. (Baef. 4:32) Beto fwete vingila ve kaka nde bampangi na beto kubanda kuta kinduku ti beto. Kansi, beto fwete “vanda bantu ya ntete” na kusala yo. Yo ke wakana ti mambu yai ya Yezu tubaka: “Kiese ke vandaka mingi na kupesa, kansi na kubaka kiese ke vandaka fioti.”​—Bis. 20:35.

10. Inki mutindu beto lenda vanda kikesa “na yina me tala kupesa bankaka lukumu”? (Tala mpi kifwanisu.)

¹⁰ Yo ke benda mpenza dikebi na kumona nde kaka na nima ya kusonga beto na kuvanda bantu ya ntete na kupesa bantu ya nkaka lukumu, Polo ke songa beto diaka na ‘kuvanda kikesa kansi ve bamolo.’ Muntu ya kikesa ke vandaka ngolo na kisalu mpi ke salaka yo na kiese. Ntangu bo me pesa yandi kisalu, yandi ke salaka yo mbote-mbote. Bingana 3:27, 28 ke tuba nde: “Kubuya ve kusala mambu ya mbote na bantu yina nge fwete sadila yo kana nge kele ti kiyeka ya kusadisa.” Yo yina, ntangu beto ke monaka nde muntu mosi kele ti mfunu ya lusadisu, beto ke salaka yonso sambu na kusadisa yandi. Beto ke vutulaka ve mambu na nima mpi beto ke tubaka ve nde muntu ya nkaka ta sadisa yandi.​—1 Yoa. 3:17, 18.

11. Inki lenda sadisa beto na kukangama ngolo ti bampangi?

¹¹ Kulolula nswalu bantu yina me sala beto mbi kele mpi mutindu ya nkaka ya kumonisa nde beto ke pesaka bo lukumu. Baefezo 4:26 ke tuba nde: “Beno bika ve nde ntangu kudinda mpi beno kele kaka na makasi.” Sambu na nki? Verse 27 ke tuba nde beto ta “pesa ve Diabulu dibaku” kana beto sala mpidina. Yehowa ke songaka beto mbala na mbala na Ndinga na yandi na kulolulana. Bakolosai 3:13 ke songa beto na “[kulanda] kulolulana na ntima ya mvimba.” Kulolula bifu ya bampangi kele mutindu ya kuluta mbote ya kukangama ti bo. Yo ta sadisa beto na “kutanina bumosi ya mpeve na ngemba yina ke vukisaka beto.” (Baef. 4:3) Na bunkufi, kikalulu ya kulolula ke sadisaka beto mpenza na kuzinga na bumosi mpi na ngemba.

12. Inki mutindu Yehowa ke sadisaka beto na kuvanda ti kikalulu ya kulolula?

¹² Ya kieleka, yo lenda vandila beto mpasi na kulolula bantu yina me sala kima mosi ya me pesa beto mpasi. Ata mpidina, mpeve ya Nzambi ke sadisaka beto na kulolula bo. Na nima ya kusonga beto na “[kuzolana] ngolo” mpi na “[kuvanda] kikesa,” Biblia ke tuba nde: “Beno pela ngolo na mpeve.” Muntu yina ke “pela” kele muntu yina mpeve santu ke sadisaka kibeni na kuvanda kikesa mpi na kiese mingi. (Bar. 12:11.) Ya kieleka, mpeve santu ke sadisaka beto na kuzolana ngolo mpi na kulolulana na ntima ya mvimba. Yo yina, beto ke lombaka Yehowa na masonga yonso na kusadisa beto.​—Luka 11:13.

“KUKABWANA FWETE VANDA VE NA KATI NA BENO”

13. Inki lenda kabisa beto ti bampangi?

¹³ Dibundu ya Yehowa kele ti “bantu ya mitindu yonso” yina mambu ya luzingu na bo me swaswana. (1 Tim. 2:3, 4) Mambu yango lenda sala nde beto baka balukanu ya kuswaswana na yina me tala mutindu na beto ya kulwata, ya kuyidika nitu, lusansu yina beto fwete baka to bansaka ya kulutisila ntangu. Kana beto keba ve, mambu yango lenda kabisa beto. (Bar. 14:4; 1 Bak. 1:10) Sambu Nzambi ke longaka beto na kuzolana, beto fwete songa ve bantu ya nkaka nde balukanu na beto kele mbote kuluta ya bo.​—Bafil. 2:3.

14. Beto fwete sala ntangu yonso bikesa ya kusala nki mpi sambu na nki?

¹⁴ Beto lenda sala mpi nde dibundu kukabwana ve kana ntangu yonso beto ke sala bikesa ya kulembika bampangi mpi ya kupesa bo kikesa. (1 Bate. 5:11) Ntama mingi ve, bampangi mingi yina bwaka madidi na kimpeve to bayina bo katulaka na dibundu me vutukila Yehowa. Beto ke yambaka bo na kiese mingi! (2 Bak. 2:8) Beto tadila mambu yina kuminaka mpangi-nkento mosi yina bwaka madidi na kimpeve banda bamvula 10 mpi yina vutukilaka balukutakanu na Nzo ya Kimfumu. Yandi ke tuba nde: “Bampangi pesaka mono mbote na maboko ti mamweta.” (Bis. 3:19) Yo sadisaka yandi na kudiwa nki mpila? Yandi ke tuba nde: “Yo sadisaka mono na kubakisa nde Yehowa vandaka kusadisa mono na kuvutukila kiese na mono.” Kana beto ke pesa bantu yonso kikesa, Kristu lenda sadila beto sambu na kupesa kikesa na bantu yonso “ya ke mona mpasi mpi ya ke nata kilo ya mingi.”​—Mat. 11:28, 29.

15. Inki kele kima ya nkaka yina beto lenda sala sambu na kutanina bumosi na beto? (Tala mpi kifwanisu.)

¹⁵ Mambu yina beto ke tubaka ke salaka mpi nde beto tanina bumosi na beto. Yobi 12:11 ke tuba nde: “Keti dikutu ke mekaka ve bangogo mutindu ludimi ke mekaka madia?” Mutindu muntu ya me zaba mbote kulamba ke mekaka ntete madia sambu na kuzaba kana yo kele kitoko na ntwala ya kupesa yo bantu ya nkaka, beto fwete yindulaka mpi mbote-mbote mambu yina beto ke zola kutuba. (Nk. 141:3) Beto fwete vanda ntangu yonso ti lukanu ya kuzikisa kana mambu yina beto ke zola kutuba ta pesa bantu kikesa, ta lembika bo mpi ta natila bo mambote.​—Baef. 4:29.

16. Banani fwete sala mingi-mingi bikesa ya kutuba mambu ya ke pesa kikesa?

¹⁶ Mingi-mingi, babakala yina me kwelaka mpi bibuti fwete sala bikesa ya kutuba mambu ya ke pesa kikesa. (Bakol. 3:19, 21; Tito 2:4) Bankuluntu mpi fwete sala bikesa ya kutuba mambu ya ke lembika mameme ya Yehowa mpi ya ke pesa yo kikesa. (Yez. 32:1, 2; Bag. 6:1) Verse mosi ya Bingana ke yibusa beto nde: “Ngogo yina bo me tuba na ntangu ya mbote​—yo ke vandaka mbote kibeni!”​—Bing. 15:23.

ZOLA “NA BISALU MPI NA KIELEKA”

17. Inki beto lenda sala sambu na kumonisa nde beto ke zolaka bampangi na masonga yonso?

¹⁷ Ntumwa Yoane ke lomba beto na “[kuzola] kaka ve na bangogo to na ludimi, kansi na bisalu mpi na kieleka.” (1 Yoa. 3:18) Beto ke zolaka nde zola na beto sambu na bampangi na beto kuvanda ya masonga. Inki mutindu beto lenda monisa nde beto ke zolaka bampangi na masonga yonso? Kana beto ke lutisa ntangu mingi ti bampangi na beto, beto ta kangama ngolo ti bo mpi zola na beto sambu na bo ta kuma ngolo. Yo yina, beto fwete sosa mabaku ya kulutisa ntangu ti bampangi na balukutakanu mpi na kisalu ya kulonga nsangu ya mbote. Beto fwete kwenda kutala bo mbala na mbala. Kana beto ke sala mpidina, beto ta monisa nde “Nzambi ke longaka [beto] na kuzolana.” (1 Bate. 4:9) Diaka, beto ta mona beto mosi mutindu “yo kele mbote kibeni mpi kiese mingi nde bampangi kuzinga kumosi na bumosi!”​—Nk. 133:1.