Beto Kele Ve Beto Mosi Ata Fioti

1-2. (a) Sambu na nki beto fwete tuba ve ata fioti nde beto ke vandaka beto mosi na ntangu ya mpasi? (b) Inki beto ta longuka na disolo yai?

NTANGU beto ke kutana ti bampasi ya ngolo, beto lenda kudimona bonso nde beto kele beto mosi na mfinda mosi ya nene mpi beto ke mona ve nzila ya kubasikila. Ata mpidina, beto kele ve beto mosi. Tata na beto ya zulu yina ke zolaka beto mingi ke monaka bampasi na beto mpi yandi ke sila beto nde yandi ta sadisa beto na kukangila yo ntima. Yehowa ke sila beto na bangogo yai ya ke pesa kikesa nde: “Mono ta sadisa nge.”​—Yez. 41:10.

² Na disolo yai, beto ta longuka mutindu Yehowa ke sadisaka beto ntangu yandi (1) ke twadisaka beto, (2) ke lungisaka bampusa na beto, (3) ke taninaka beto mpi (4) ke pesaka beto kikesa. Yehowa ke ndimisa beto nde yandi ta vila beto ve ata fioti ata beto ke kutana ti bampasi ya nki mutindu na luzingu. Yandi ta yambula beto ve ata fioti. Yo yina beto ke vandaka ve beto mosi ata fioti.

YEHOWA KE TWADISAKA BETO

3-4. Inki mutindu Yehowa ke twadisaka beto? (Nkunga 48:14)

³ Tanga Nkunga 48:14. Yehowa ke zabaka nde beto ta kuka ve kuditwadisa beto mosi mpi nde yandi muntu fwete twadisa beto. Inki mutindu yandi ke twadisaka bansadi na yandi bubu yai? Yandi ke twadisaka bo na nzila ya Biblia. (Nk. 119:105) Yandi ke sadilaka Ndinga na yandi sambu na kusadisa beto na kubaka balukanu ya mbote mpi na kukuma ti bikalulu yina ke sadisaka beto na kuzinga na kiese mingi bubu yai mpi na kuzinga mvula na mvula na bilumbu ke kwisa.a Mu mbandu, yandi ke longaka beto na kukangila ve bantu makasi, na kuvanda masonga na mambu yonso mpi na kuzola bantu na ntima ya mvimba. (Nk. 37:8; Baeb. 13:18; 1 Pie. 1:22) Kana beto ke sala bikesa ya kulanda kuvanda ti bikalulu yai, beto ta kuma bibuti ya mbote, bankwelani ya mbote mpi banduku ya mbote.

⁴ Diaka, Yehowa me salaka nde bo sonika na Ndinga na yandi masolo ya bantu yina kutanaka ti bampasi mpi yina vandaka kudiwa bonso beto. (1 Bak. 10:13; Yak. 5:17) Ntangu beto ke tangaka masolo yango mpi ke sadilaka malongi yina beto ke bakaka, yo ke natilaka beto mambote na mitindu zole. Ya ntete, beto ke bakisaka nde beto kele ve beto mosi sambu bantu ya nkaka me kutanaka mpi ti bampasi ya mutindu mosi mpi Yehowa sadisaka bo na kukangila yo ntima. (1 Pie. 5:9) Mpi ya zole, yo ke sadisaka beto na kuzaba mutindu ya kukangila bampasi ntima.​—Bar. 15:4.

5. Banani Yehowa ke sadilaka sambu na kutwadisa beto na nzila ya luzingu?

⁵ Yehowa ke sadilaka mpi bampangi na beto sambu na kutwadisa beto.b Mu mbandu, bankengi ya nziunga ke talaka mabundu mbala na mbala sambu na kupesa beto kikesa. Badiskure yina bo ke salaka ke kumisaka lukwikilu na beto ngolo mpi yo ke sadisaka beto na kulanda kuvanda na bumosi. (Bis. 15:40–16:5) Diaka, bankuluntu na mabundu ke tudilaka mpi konso muntu dikebi sambu na kusadisa bo na kulanda kuvanda ti kinduku ya mbote ti Yehowa. (1 Pie. 5:2, 3) Bibuti ke sadisaka bana na bo na kuzola Yehowa, na kubaka balukanu ya mbote, na kukuma ti bikalulu ya mbote mpi na kukuma ti kikalulu ya kusala mambu ya kimpeve mbala na mbala. (Bing. 22:6) Diaka, bampangi-bankento ya kuyela na kimpeve ke sadisaka bampangi-bankento ya baleke ntangu bo ke pesaka bo mbandu ya mbote, ntangu bo ke pesaka bo bandongisila ya mfunu mpi kikesa.​—Tito 2:3-5.

6. Inki beto fwete sala sambu na kubaka mambote na lutwadisu ya Yehowa?

⁶ Yehowa ke pesaka beto lutwadisu yina beto ke vandaka ti yo mfunu. Inki mutindu beto lenda monisa nde beto ke bakaka na valere mambu yina yandi ke salaka sambu na beto? Bingana 3:5, 6 ke tuba nde: “Tula ntima na nge ya mvimba na Yehowa, mpi kutula ve ntima na mayele na nge mosi ya kubakisa mambu.” Kana beto sala mpidina, “yandi ta katula basakuba na banzila na [beto],” disongidila nde yandi ta sadisa beto na kukutana ve ti bampasi mingi mpi na kuzinga na kiese mingi. Beto ke monisilaka Yehowa ntonda mingi mutindu yandi ke pesaka konso muntu na kati na beto bandongisila ya zola!​—Nk. 32:8.

YEHOWA KE LUNGISAKA BAMPUSA NA BETO

7. Tubila mitindu yina Yehowa ke lungisaka bampusa na beto? (Bafilipi 4:19)

⁷ Tanga Bafilipi 4:19. Yehowa ke sukaka kaka ve na kutwadisa beto na kimpeve. Yandi ke sakumunaka mpi bikesa yina beto ke salaka sambu na kuzwa madia, bilele mpi kisika ya kuvanda. (Mat. 6:33; 2 Bate. 3:12) Yo kele ve mbi na kudiyangisa sambu na bima ya kuzingila. Kansi, Yehowa ke zolaka ve nde beto kudiyangisa mingi sambu na bima yango. (Mat. 6:25.) Sambu na nki? Sambu Yehowa, Tata na beto, ke yambulaka ve ata fioti bansadi na yandi ya kwikama na ntangu bo kele na mfunu ya lusadisu. (Mat. 6:8; Baeb. 13:5) Beto fwete tudila yandi mpenza ntima sambu yandi ke sila beto nde yandi ta lungisa bampusa na beto.

8. Inki Yehowa salaka sambu na Davidi?

⁸ Beto tadila mutindu Yehowa sadisaka Davidi. Na bamvula yina Davidi vandaka kutina ntotila Saule, Yehowa vandaka kupesa Davidi ti bantu na yandi bima ya kuzingila yina bo vandaka ti yo mfunu. Ntangu Davidi yindulaka mutindu Yehowa sadisaka yandi na bamvula yina yonso ya mpasi, yandi sonikaka nde: “Mono vandaka leke mpi ntangu yai mono me nuna, kansi mono me monaka ntete ve bo me yambula muntu ya lunungu, to bana na yandi ke sosa mampa.” (Nk. 37:25) Bonso Davidi, mbala ya nkaka nge me monaka mpi dezia mutindu Yehowa ke lungisaka na zola mpenza bampusa ya bansadi na yandi na ntangu ya mpasi.

9. Inki mutindu Yehowa ke lungisaka bampusa ya bansadi na yandi na bantangu ya bisumbula? (Tala mpi bifwanisu.)

⁹ Yehowa ke lungisaka mpi bampusa ya bansadi na yandi na bantangu ya bisumbula. Mu mbandu, ntangu nzala kotaka na bilumbu ya Bakristu ya ntete, Bakristu ya bisika ya mutindu na mutindu tindilaka bampangi na bo bima ya kuzingila yina bo vandaka na yo mfunu. (Bis. 11:27-30; Bar. 15:25, 26) Bubu yai, bansadi ya Nzambi ke vandaka mpi ti kikalulu yai ya kukaba. Kana kisumbula me salama, Yehowa ke pusaka na zola yonso bansadi na yandi na kupesa bampangi ya me bwila mpasi bima ya kuzingila yina bo ke vandaka na yo mfunu, mu mbandu madia, masa, bilele mpi bankisi. Bampangi ke yidikaka mpi banzo ya bampangi yina me beba mpi Banzo ya Kimfumu. Diaka, kukonda kuvingila, bansadi ya Yehowa ke sadilaka Biblia sambu na kupesa kikesa na bampangi yina banzo na bo me beba to bayina bampangi na bo me fwa na kisumbula yango.c

10-11. Mbandu ya Borys ke longa nge nki?

¹⁰ Yehowa ke lungisaka mpi bampusa ya bantu yina me yantika ntete ve kusambila yandi. Mutindu mosi mpi, beto ke sosaka mabaku ya kumonisila bantu yina ke sadilaka ve Yehowa ntima-mbote. (Bag. 6:10) Kana beto ke sala mpidina, beto lenda sadisa bantu mingi na kulonguka mambu ya Yehowa mpi ya bansadi na yandi. Beto tadila mbandu ya Borys yina kele préfet na nzo-nkanda mosi na Ukraine. Ata yandi kele ve Mbangi ya Yehowa, yandi vandaka ntangu yonso kusadila bana ya nzo-nkanda na yandi ya Bambangi ya Yehowa mambu na mawete mpi yandi vandaka kuzitisa balukwikilu na bo. Ntangu Borys bakaka lukanu ya kutina kisika yina yandi vandaka kuzinga sambu na bitumba mpi kukwenda na kisika ya nkaka ya lutaninu na insi na bo, bampangi na beto sadisaka yandi. Na nima, yandi kwendaka na Nkinsi ya Kuyibuka Lufwa ya Yezu. Ntangu Borys yindulaka mambu yina bampangi sadilaka yandi, yandi tubaka nde: “Bambangi ya Yehowa tudilaka mono mpenza dikebi mpi bo sadisaka mono mingi. Mono ke pesa bo mersi mingi.”

¹¹ Beto lenda landa mpi mbandu ya Tata na beto ya zulu, yina ke wilaka bantu mawa, kana beto ke monisila bantu yina kele ti mfunu ya lusadisu zola, yo vanda bo kele bampangi na beto Bakristu to ve. (Luka 6:31, 36) Beto ke tula ntima nde bikesa yina beto ke salaka sambu na kumonisila bantu zola ta sala nde bo kuma balongoki ya Kristu. (1 Pie. 2:12) Ata bo kuma bansadi ya Yehowa to ve, beto ta vanda kaka na kiese mingi sambu “kiese ke vandaka mingi na kupesa.”​—Bis. 20:35.

YEHOWA KE TANINAKA BETO

12. Inki mutindu Yehowa ke taninaka bansadi na yandi yonso na kimvuka? (Nkunga 91:1, 2, 14)

¹² Tanga Nkunga 91:1, 2, 14. Bubu yai, Yehowa ke silaka beto nde yandi ta tanina beto na kimpeve. Yandi ta bika ve ata fioti nde Satana kubebisa lusambu ya kieleka. (Yoa. 17:15) Mpi beto ke tula kibeni ntima nde na “mpasi ya nene,” Yehowa ta lungisa lusilu na yandi ya kutanina beto na kimpeve mpi na kinsuni.​—Kus. 7:9, 14.

13. Inki mutindu Yehowa ke taninaka konso muntu na kati na beto?

¹³ Inki mutindu Yehowa ke taninaka konso muntu na kati na beto? Yehowa ke sadilaka Biblia sambu na kusadisa beto na kubakisa mambu ya mbote mpi ya mbi. (Baeb. 5:14) Ntangu beto ke sadilaka mambu ya kele na Ndinga na yandi, yo ke taninaka beto na kimpeve mpi na kinsuni. (Nk. 91:4) Diaka, Yehowa ke sadilaka dibundu na yandi sambu na kutanina beto. (Yez. 32:1, 2) Ntangu beto ke lutisaka ntangu ti bampangi na beto yina ke zolaka Yehowa mpi ke zitisaka minsiku na yandi, yo ke sadisaka beto na kuvanda ti kikesa mpi ngolo ya kutelemina mambu ya mbi.​—Bing. 13:20.

14. (a) Sambu na nki Nzambi ke bikaka nde bantangu ya nkaka beto kutana ti bampasi? (b) Nkunga 9:10 ke ndimisa beto nki? (Tala mpi noti na nsi ya lutiti.)

¹⁴ Bantangu ya nkaka na ntangu ya ntama, Yehowa vandaka kutanina bansadi na yandi na kinsuni. Kansi yandi vandaka ve kusala yo konso ntangu. Bantangu ya nkaka, beto ke kutanaka ti “mambu ya kukonda kukana.” (Lon. 9:11) Diaka, na nsungi ya bamvula, Yehowa me bikaka nde bantu kuniokula bansadi na yandi ya nkaka mpi nkutu kufwa bankaka na kati na bo, sambu na kumonisa nde Satana kele muntu ya luvunu. (Yobi 2:4-6; Mat. 23:34) Mambu yai lenda kumina beto mpi bubu yai. Ata Yehowa me katula ve bampasi na beto yonso, beto fwete tula ntima nde yandi ta yambula ve ata fioti bantu yina ke zolaka yandi.d​—Nk. 9:10.

YEHOWA KE PESAKA BETO KIKESA

15. Tubila mutindu kisambu, Ndinga ya Nzambi mpi bampangi na beto Bakristu ke pesaka beto kikesa. (2 Bakorinto 1:3, 4)

¹⁵ Tanga 2 Bakorinto 1:3, 4. Bantangu ya nkaka, beto ke kutanaka ti mambu ya mpasi yina ke salaka nde beto kudiyangisa mingi, beto vanda mawa-mawa to ti basusi. Mbala ya nkaka nge ke kutana ti mpasi yina ke sala nde nge kudiwa nge mosi. Keti kele ti muntu mosi ya ke bakisa mutindu nge ke kudiwa? Ee, Yehowa ke bakisa nge. Yandi ke bakisaka mutindu beto ke kudiwaka mpi yandi “ke lembikaka beto na bampasi na beto yonso.” Inki mutindu? Ntangu beto ke sambaka yandi na ntima ya mvimba, yandi ke pesaka beto “ngemba ya Nzambi yina me luta mayele yonso ya kubakisa mambu.” (Bafil. 4:6, 7) Beto ke bakaka mpi kikesa ntangu beto ke tangaka mambu yina Yehowa ke songaka beto na Ndinga na yandi Biblia. Na Biblia, Yehowa ke songaka beto mambu ya ke monisa nde yandi ke zolaka beto, yandi ke longaka beto mutindu ya kuvanda mayele mpi yandi ke pesaka beto kivuvu. Mambu yai yonso ke pesaka beto kikesa. Diaka, balukutakanu ya dibundu ke pesaka beto kikesa sambu beto ke longukaka mambu ya Biblia mpi beto ke vukanaka ti bampangi na beto ya ke zolaka beto.

16. Mbandu ya mpangi Nathan ti mpangi Priscilla ke longa beto nki?

¹⁶ Beto tadila mbandu ya mpangi Nathan ti nkento na yandi mpangi Priscilla na États-Unis, sambu na kubakisa mutindu Yehowa ke lembikaka beto mpi ke pesaka beto kikesa na Ndinga na yandi. Mwa bamvula me luta, bo kwendaka kupesa maboko na kisika yina mpusa ya bansamuni ya Kimfumu vandaka mingi. Mpangi Nathan ke tuba nde: “Beto vandaka kutula ntima nde Yehowa ta sakumuna bikesa na beto.” Kansi na nima ya kukuma na kisika yango, bo kutanaka ti bampasi ya kukonda kukana, disongidila bo kumaka kubela-bela mpi bo kumaka na mpasi ya mbongo. Nsuka-nsuka, bo vutukaka na nzo na bo, kansi bo vandaka kaka na mpasi ya mbongo. Mpangi Nathan ke tuba diaka nde: “Mono vandaka kudiyula sambu na nki Nzambi sakumunaka beto ve mutindu beto vandaka kuyindula. Mono vandaka nkutu kudiyula kana mono salaka kima mosi ya mbi.” Kansi na nima, mpangi Nathan ti mpangi Priscilla bakisaka nde Nzambi yambulaka bo ve ata fioti na ntangu yina ya mpasi. Mpangi Nathan ke yika nde: “Na bantangu yina ya mpasi, Biblia kumaka bonso nduku mosi ya mayele yina vandaka kupesa beto kikesa mpi lutwadisu. Kutula dikebi na mutindu Yehowa sadisaka beto na kukanga ntima na bampasi yina, na kisika ya kutula dikebi na bampasi yango, sadisaka beto na kutula kibeni ntima nde Yehowa ta landa kusadisa beto na bilumbu ke kwisa.”

17. Inki mutindu mpangi-nkento Helga vandaka kubaka kikesa? (Tala mpi kifwanisu.)

¹⁷ Bampangi na beto Bakristu ke pesaka beto mpi kikesa na mutindu ya nkaka. Na nki mutindu? Beto tadila mbandu ya mpangi-nkento Helga na Hongrie. Na nsungi ya bamvula mingi, yandi kutanaka ti bampasi yina salaka nde yandi kudiyangisa mingi mpi yandi kudimona kukonda mfunu. Kansi ntangu yandi ke yindulaka bantangu yina ya mpasi, yandi ke bakisaka nde Yehowa sadilaka bampangi na dibundu sambu na kulembika yandi. Yandi sonikaka mambu yai: “Yehowa vandaka kusadisa mono ntangu yonso yina yandi vandaka kumona mutindu kisalu na mono ya kinsuni, kukeba mwana na mono yina vandaka kubela mpi bampasi ya nkaka vandaka kulembisa mono mingi. Na bamvula 30 ya me luta, yandi landaka kaka kupesa mono kikesa. Mbala mingi, yandi ke sadilaka bampangi sambu na kusonga mono mambu ya mbote, ya mawete mpi ya ke pesa kikesa. Bampangi vandaka kutindila mono ba message, mikanda to kusonga mono bangogo ya mbote na ntangu yina mono vandaka kibeni na mfunu na yo.”

18. Inki mutindu beto lenda pesa bantu ya nkaka kikesa?

¹⁸ Beto kele ti dibaku ya kupesa bantu ya nkaka kikesa bonso Nzambi na beto. Inki mutindu beto lenda sala yo? Beto lenda widikila bo ti ntima-nda, kusonga bo mambu ya ke pesa kikesa mpi kupesa bo lusadisu yina bo kele na yo mfunu. (Bing. 3:27) Beto ke salaka yonso sambu na kulembika bampangi yonso yina ke kutana ti bampasi ata bayina ke sadilaka ve Nzambi. Ntangu bantu yina ke zingaka kisika mosi ti beto ke bela, kele ti basusi to ke kudiyangisa, beto ke kwendaka kutala bo, ke widikilaka bo mpi ke songaka bo mambu ya ke pesa kikesa na Biblia. Kana beto ke landa mbandu ya Yehowa, ‘Nzambi yina ke lembikaka bantu na mitindu yonso,’ beto ta sadisa bampangi na beto na kukanga ntima na bampasi mpi beto ta sadisa bantu yina ke sambilaka ve Yehowa na kulonguka mambu mingi ya me tala yandi.​—Mat. 5:16.

YEHOWA KE VANDAKA NTANGU YONSO TI BETO

19. Inki mambu Yehowa ke salaka sambu na beto mpi nki mutindu beto lenda landa mbandu na yandi?

¹⁹ Yehowa ke tudilaka kibeni bantu yonso yina ke zolaka yandi dikebi mingi. Yandi ke yambulaka beto ve na ntangu ya mpasi. Yehowa ke kebaka bansadi na yandi kaka mutindu kibuti ke kebaka mwana na yandi na zola yonso. Yandi ke twadisaka beto, ke lungisaka bampusa na beto, ke taninaka beto mpi ke pesaka beto kikesa. Beto ke landaka mbandu ya Tata na beto ya zulu yina ke zolaka beto ntangu beto ke sadisaka bantu ya nkaka mpi ke pesaka bo kikesa ntangu bo ke kutana ti bampasi. Ata beto ke kutana ti bampasi ya nki mutindu, beto fwete tula ntima nde Yehowa kele kaka ti beto. Nkutu yandi ke songa beto nde: “Kuwa boma ve, sambu mono kele ti nge.” (Yez. 41:10) Mambu yai ke ndimisa beto mpenza nde beto kele ve beto mosi ata fioti!