Mutindu ya Kutanga Biblia Konso Kilumbu

Beto yonso ke vandaka ti mambu mingi ya kusala, yo yina yo lenda vanda mpasi na kutanga Biblia konso kilumbu. (Yoz. 1:8) Kana yo ke vandilaka nge mpi mpasi na kutanga Biblia konso kilumbu, mambu yai lenda sadisa nge:

• Tula kima mosi yina ta yibusaka nge konso kilumbu. Nge lenda tula alarme na apareyi na nge sambu yo yibusa nge na kutanga Biblia.

• Tula Biblia na nge kisika yina nge lenda mona yo kukonda mpasi. Kana nge ke tangaka Biblia ya papie, nge lenda tula yo kisika yina nge ta monaka yo kukonda mpasi konso kilumbu.​—Kul. 11:18.

• Landa lutangu ya Biblia yina bo me kotisaka ndinga. Landa lutangu ya Biblia ya bo me kotisaka ndinga ntangu nge ke sala mambu ya nkaka. Mpangi-nkento Tara ke vandaka ti mambu mingi ya kusala. Yandi kele mupasudi-nzila, yandi kele ti bana mpi yandi ke salaka kisalu mosi na mpimpa. Yandi ke tuba nde: “Mono ke landaka lutangu ya Biblia ya bo me kotisaka ndinga ntangu mono ke salaka bisalu ya nzo. Yo ke sadisaka mono na kutanga yo konso kilumbu.”

• Kuyambula ve. Kana mambu ya kukonda kukana me sala nde nge tanga ve Biblia na ntangu yina nge tulaka, nge lenda tanga ata baverse fioti mpamba na ntwala ya kulala. Kana nge sala mpidina, nge ta bakila yo mambote.​—1 Pie. 2:2.