Inki Biblia Ke Tubaka Sambu na Luzingu ya Kimakangu?

Mvutu ya Biblia

Biblia ke tubaka nde luzolo ya Nzambi kele nde bantu “fwete sala ve pite.” (1 Batesalonika 4:3) Ngogo “pite” na Biblia ke tendula mpi kuvukisa nitu ti muntu ya kele ve nkwelani na nge, kuvukisa nitu babakala ti babakala to bankento ti bankento mpi kuvukisa nitu ti bakala to nkento yina nge me kwelanaka ve ti yandi.

• Sambu na nki Nzambi ke zolaka nde bakala ti nkento yina ke zinga nzo mosi kukwelana?

• Inki beto lenda tuba sambu na bakala ti nkento yina ke zingaka ntete nzo mosi na ntwala ya kukwelana sambu na kutala kana bo ta kuka kuzinga na kiese?

• Inki bakala ti nkento fwete sala sambu na kuzinga na kiese na makwela na bo?

Sambu na nki Nzambi ke zolaka nde bakala ti nkento yina ke zinga nzo mosi kukwelana?

• Makwela me katukaka na Nzambi. Yandi muntu kwedisaka bakala ti nkento ya ntete. (Kuyantika 2:22-24) Yandi kanaka ve nde bakala ti nkento kuzinga nzo mosi kukonda nde bo kwelana.

• Nzambi ke zabaka mambu yina kele mbote sambu na beto. Yandi zolaka nde bakala ti nkento yina me kwelana kuzinga bo zole luzingu na bo ya mvimba sambu na lutaninu mpi na mambote ya bantu yonso ya dibuta. Beto tadila mbandu yai. Muntu ya me sala kima mosi, mu mbandu bakiti ke sonikaka mutindu ya kusadila yo mbote. Mutindu mosi mpi Nzambi ke songaka beto mutindu ya kuzinga na kiese na dibuta. Mambu yina Nzambi ke songaka beto na kusala ke vandaka ntangu yonso sambu na mambote na beto.—Yezaya 48:17, 18.

  

• Kana bantu zole ya me kwelanaka ve me vukisa nitu, yo lenda nata bampasi na nene. Mu mbandu, nkento lenda baka divumu yina yandi kanaka ve, bo lenda baka maladi yina ke sambukilaka na nzila ya kuvukisa nitu mpi bo lenda kuma ti basusi mingi.

• Kuvukisa nitu kele dikabu yina Nzambi me pesaka bakala ti nkento sambu bo buta bana. Sambu na Nzambi, luzingu kele santu mpi makuki ya kubuta bana kele dikabu mosi ya valere mingi. Nzambi ke zolaka nde beto zitisa dikabu yai, disongidila beto fwete vukisa nitu kaka ti muntu yina beto me kwelanaka ti yandi.—Baebreo 13:4.

Inki beto lenda tuba sambu na bakala ti nkento yina ke zingaka ntete nzo mosi na ntwala ya kukwelana sambu na kutala kana bo ta kuka kuzinga na kiese?

Sambu na kuvanda ti makwela ya mbote, yo kele ve mfunu na kuzinga ntete nzo mosi sambu na mwa ntangu mpi kutala kana beno fwete kabwana to ve. Ve, kansi makwela ke kumaka na kiese kana bakala ti nkento ke zitisa lusilu ya bo salaka ya kulanda kukangama ngolo bo zole mpi kana bo ke sala yonso sambu na kuyidika mambu ya mpasi ya bo ke kutana ti yo.a Makwela ke kumisaka ngolo lusilu yai.—Matayo 19:6.

Inki bakala ti nkento fwete sala sambu na kuzinga na kiese na makwela na bo?

Bantu yonso ya me kwelaka ke kutanaka ti bampasi. Kansi bakala ti nkento lenda kuma ti makwela ya kiese kana bo ke sadila bandongisila ya Biblia. Mu mbandu bandongisila yai:

• Tula bampusa ya nkwelani na nge na kisika ya ntete.—1 Bakorinto 7:3-5; Bafilipi 2:3, 4.

• Beno zolana ngolo mpi beno pesana luzitu.—Baefezo 5:25, 33.

• Beno sala yonso sambu na kuyala ludimi na beno.—Bingana 12:18.

• Beno vanda ntima-nda mpi ti kikalulu ya kulolula.—Bakolosai 3:13, 14.