BANGIUFULA YINA BALEKE KE KUDIYULAKA

Keti Mono Fwete Baka Mbotika?—Kitini 1: Ntendula ya Mbotika

Konso mvula, bana yina bibuti na bo kele Bambangi ya Yehowa ke bakaka mbotika. Keti nge ke zola mpi kubaka mbotika? Kana ee, nge fwete sosa ntete kuzaba kana kudipesa na Nzambi mpi kubaka mbotika ke ntendula inki.

Mbotika ke tendula inki?

Sambu na kupesa muntu mbotika yina Biblia ke tubilaka, bo fwete dindisa yandi ya mvimba na masa kansi ve kutula yandi ndambu ya masa na zulu ya ntu. Mbotika yina Biblia ke tubilaka ke monisaka kima mosi ya mfunu mingi.

Kudindisa muntu ya mvimba na masa ntangu yandi ke baka mbotika ke monisaka na meso ya bantu yonso nde, muntu yina me baka mbotika ke zinga diaka ve sambu na yandi mosi.
Kana bo me basisa yandi na masa, yo ke monisaka nde yandi me yantika luzingu ya mpa: yandi me kuma kuzinga sambu na kusala luzolo ya Nzambi.

Kana muntu me baka mbotika, yandi ke zabaka na pwelele yonso nde Yehowa kele ti nswa ya kutudila yandi bansiku na yina me tala mambu ya mbote mpi mambu ya mbi, mpi na nzila ya mbotika yandi ke monisa na meso ya bantu yonso nde yandi songaka Yehowa nde yandi ta salaka mambu yina Yehowa ke lomba yandi.

Mambu ya kuyindulula: Inki fwete pusa nge na kuzola kumonisa na meso ya bantu yonso nde nge ke zola kulemfukila Yehowa luzingu na nge ya mvimba? Tala 1 Yoane 4:19 mpi Kusonga 4:11.

Kudipesa na Nzambi ke tendula inki?

Na ntwala nde muntu kubaka mbotika, yandi fwete songa Yehowa nde yandi me pesa luzingu na yandi na Yehowa. Inki mutindu?

Na kisambu yina yandi fwete sala yandi mosi, yandi ta songa Yehowa nde yandi ke zola kusadila yandi dibela, nde yandi ta sala mambu yina yandi ke zola nde yandi sala, yo vanda nki mutindu mpi yo vanda bantu ya nkaka kusala inki.

Muntu ke bakaka mbotika sambu na kumonisa na meso ya bantu yonso nde yandi songaka Yehowa nde yandi ta sala mambu yonso yina beto me tubila awa na zulu. Yandi ke songa bantu ya nkaka nde yandi ta zingaka diaka ve sambu na yandi mosi mpi nde ntangu yai, Yehowa muntu me kuma munkwa na yandi.—Matayo 16:24.

Mambu ya kuyindulula: Sambu na nki nge ta kuma ti luzingu ya mbote kana nge me kuma muntu ya Yehowa? Tala Yezaya 48:17, 18 mpi Baebreo 11:6.

Sambu na nki mbotika kele mfunu?

Yezu pesaka nsiku nde na ntwala nde muntu kukuma longoki na yandi, yandi fwete baka mbotika. (Matayo 28:19, 20) Yo yina, muntu ya ke zola kukuma Mukristu fwete baka mbotika. Nkutu, Biblia ke tubaka nde sambu muntu kuguluka, yandi fwete baka mbotika.—1 Piere 3:21.

Kansi kima yina fwete pusa muntu na kubaka mbotika kele zola na yandi sambu na Yehowa mpi ntonda na yandi sambu na mambu yina Yehowa me salaka sambu na yandi. Yandi fwete vanda ti mabanza bonso yina ya Muyimbi-bankunga yina sonikaka nde: “Inki mono ta pesa Yehowa sambu na mambu yonso ya mbote ya yandi me sadilaka mono? . . . Mono ta binga zina ya Yehowa. Mono ta lungisa balusilu na mono na Yehowa.”—Nkunga 116:12-14.

Mambu ya kuyindulula: Inki kima ya mbote Yehowa me salaka sambu na nge mpi ya nge lenda vutudila yandi? Tala Kulonga 10:12, 13 mpi Baroma 12:1.

Mambu yina baleke ya nkaka ke tubaka

“Kupesa luzingu na nge na Yehowa ke lombaka kusonga yandi nde nge ta sadila yandi, yo kele ve kima ya kubaka na nsaka. Kansi kana nge me pesa luzingu na nge na Yehowa, nge ta baka balusakumunu mingi. Yandi lenda lungisa bampusa na beto kuluta beto mosi.”—Mijin.

“Yehowa me monisaka dezia nde yandi ke zolaka nge. Ntangu nge ke baka mbotika, nge ke monisa nde nge ke zolaka yandi mingi. Kubaka mbotika ke pesaka kiese mingi mpi yo ke nataka balusakumunu mingi!”—Ember.

“Kubaka lukanu ya kupesa luzingu na nge na Nzambi mpi ya kubaka mbotika kele lukanu ya kuluta mfunu yina muntu lenda baka. Kansi yo fwete pesa nge ve boma. Kana nge kele ya kuyilama mpi nge ke sala yo sambu na bikuma ya mbote, yo ta vanda lukanu ya kuluta mbote na luzingu na nge.”—Julian.

Mambu ya luvunu mpi mambu ya kieleka

MAMBU YA LUVUNU — Yo kele kaka bantu ya kuyela bantu me fwana na kubaka mbotika.

MAMBU YA KIELEKA — Bo ke tadilaka ve mvula yina muntu kele ti yo sambu na kutuba nde muntu kele ya kuyela, kansi kuyela ya muntu kele na kutadila zola yina yandi kele ti yo sambu na Yehowa mpi mpusa ya kulemfukila yandi. Yozefi, Samuele mpi Yoziasi vandaka ntete baleke, kansi bo monisaka nde bo kele bantu ya kuyela. Bubu yai batoko mingi ke sala mpi mambu ya ke monisa nde bo kele bantu ya kuyela.

Biblia ke tubaka nde: “Mwana ke zabanaka na mambu ya yandi ke salaka, kana bikalulu na yandi kele ya bunkete mpi ya mbote.”—Bingana 20:11.

MAMBU YA LUVUNU — Kana banduku na nge ke baka mbotika, nge mpi nge fwete baka mbotika.

MAMBU YA KIELEKA — Lukanu ya kupesa luzingu na nge na Yehowa mpi ya kubaka mbotika kele lukanu yina me tala nge mosi. Yo fwete katuka na ntima na nge. Yo kele ve bonso nzila yina nge fwete luta kaka sambu bantu ya nkaka lutaka pana na ntwala na nge to sambu nge ke mona nde bantu ya nkaka ke zola nde nge mpi nge luta pana.

Biblia ke tubaka nde: “Bantu [ya Nzambi] ta kudipesa na luzolo na bo mosi.”—Nkunga 110:3.

MAMBU YA LUVUNU — Kana nge me bakaka ve mbotika, Nzambi ta sambisa nge ve sambu na mambu ya nge ke sala.

MAMBU YA KIELEKA — Kana muntu me kuma dezia kuzaba nde yai kele ya mbote mpi yai kele mambu ya mbi, Yehowa ta sambisa yandi. Yo kele ve nde Yehowa ta sambisa yandi ve sambu yandi me bakaka ve mbotika.

Biblia ke tubaka nde: “Kana muntu me zaba kusala mambu ya mbote, kansi yandi ke sala yo ve, yandi me sala disumu.”—Yakobo 4:17.

NDONGISILA: Kana ngindu ya kupesa luzingu na nge na Yehowa mpi kubaka mbotika ke pesa nge boma, yo ta vanda mbote nde nge sosa kuzaba sambu na nki nge ke yindula mpidina mpi inki nge lenda sala sambu na kukatula boma yina. Sambu na yo, nge lenda tanga mambu yina kele na Kapu 37 ya mukanda Bangiufula ya Baleke Ke Kudiyulaka—Bamvutu ya Ta Sadisa Nge, Volime 2 ya Kifalansa.