BANGIUFULA YINA BALEKE KE KUDIYULAKA
Mono Fwete Sala Inki na Nima ya Mbotika?—Kitini 1: Landa Kuvanda Kikesa
Kana nge kele ti kima mosi ya valere mingi mu mbandu nzo to kamio, nge fwete yidikaka yo. Nge fwete sala mpi mutindu mosi sambu na kinduku na nge ti Nzambi. Inki mutindu nge lenda yidika kinduku yina na nima ya kubaka mbotika?
Disolo yai ta tubila
Landa kulonguka Ndinga ya Nzambi
Verse ya mfunu: “Landa kubuta mbuma na konso kisalu ya mbote, mpi . . . yela na nzayilu ya sikisiki ya Nzambi.”—Bakolosai 1:10.
Mambu yina yo ke tendula: Na nima ya mbotika, nge fwete landa kutanga Biblia mpi kuyindula na mudindu mambu yina nge ke longuka.—Nkunga 25:4; 119:97.
Mambu yina lenda kumina nge: Bantangu ya nkaka, nge ta vanda ve ti kikesa. Nge lenda kuditubila nde nge me fwana ve sambu na kulonguka.
Mambu ya nge lenda sala: Longuka na mudindu masolo ya Biblia yina nge ke sepelaka ti yo. Sala manaka ya kulonguka na nge mosi. Yo fwete vanda manaka yina ta vanda ve mpasi na kuzitisa. Lukanu na nge fwete vanda ya kukuma kuzola Yehowa mpi Ndinga na yandi mingi. Nge fwete sepela ti kulonguka na nge mpi yo fwete sadisa nge na kuzaba mambu mingi.—Nkunga 16:11.
Ndongisila: Sambu nge bakila kulonguka na nge mambote mingi, sosa kisika mosi ya pima yina bantu ta yangisa nge ve to ata kima mosi ve ta katula nge dikebi.
Mambu ya nkaka ya kusala
Tanga:
“Inki Mutindu Biblia Lenda Sadisa Mono?—Kitini 2: Tanga Biblia ti Kiese”
“Inki Mono Lenda Sala Sambu na Kutula Dikebi Kaka na Kima Mosi?”
Tala:
Baka na Internet:
Landa kusamba Yehowa
Verse ya mfunu: “Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba.”—Bafilipi 4:6.
Mambu yina yo ke tendula: Beto ke solulaka ti Nzambi na mitindu zole: Beto ke widikilaka yandi ntangu beto ke tangaka Ndinga na yandi; beto ke songaka yandi mambu ntangu beto ke samba yandi. Ntangu beto ke samba, beto lenda lomba Nzambi na kusadisa beto mpi beto lenda pesa yandi mersi sambu na mambu ya mbote yina yandi ke sadila beto.
Mambu yina lenda kumina nge: Bantangu ya nkaka, nge lenda kuma kumona nde nge ke vutukila kaka mambu ya mutindu mosi na bisambu na nge. Nkutu nge lenda yantika na kukuma ti badute kana Yehowa ke waka kibeni bisambu na nge to kana yandi ke zolaka kibeni kuwa mambu na nge.—Nkunga 10:1.
Mambu yina nge lenda sala: Na kilumbu, yindula bima yina nge lenda samba Yehowa sambu na yo. Kana na ntangu mosi buna, mambu ya luzingu ke pesa ve nzila ya kusamba mbala mosi Yehowa na mudindu, bumba dibanza yina na ntu sambu na kusonga yo Yehowa na ntangu ya nkaka ya kilumbu. Nge lenda samba sambu na mambu yina ke yangisa nge. Kansi kuvila ve kusamba yandi mpi sambu na bantu ya nkaka.—Bafilipi 2:4.
Ndongisila: Kana nge ke mona nde nge me kuma kuvutukila kaka mambu ya mutindu mosi na bisambu na nge, samba Yehowa sambu na yo. Yandi ke zola nde nge songa yandi mambu yonso yina ke yangisa nge, yo vanda bisambu na nge.—1 Yoane 5:14.
Mambu ya nkaka ya kusala
Tanga:
Baka na Internet:
Landa kutubila balukwikilu na nge
Verse ya Mfunu: “Keba ntangu yonso na nge mosi mpi na malongi na nge. . . . Kana nge ke sala yo, nge ta kudigulusa mpi nge ta gulusa bantu yina ke widikila nge.”—1 Timoteo 4:16.
Mambu yina yo ke tendula: Ntangu nge ke songa bantu ya nkaka mambu ya nge ke kwikilaka, nge ke kumisa mpi lukwikilu na nge mosi ngolo. Na nsuka, nge lenda gulusa luzingu ya bantu yina ke wa nge mpi luzingu na nge mosi.
Mambu yina lenda kumina nge: Bantangu ya nkaka, nge ta vandaka ve kibeni ti nzala ya kusonga bantu ya nkaka mambu ya nge ke kwikilaka. Nkutu mbala ya nkaka, nge ta wa boma ya kusala yo mingi-mingi na ekole.
Mambu yina nge lenda sala: Baka lukanu ya kubika ve nde mambu ya mbi mu mbandu boma, kubaka balukanu na kisika na nge. Ntumwa Polo sonikaka nde: ‘Ata mono longa ve nsangu ya mbote na luzolo na mono, mono kele kaka ti kisalu ya kikapita yina bo me pesaka mono.’—1 Bakorinto 9:16, 17.
Ndongisila: Ti nswa ya bibuti na nge, pona mpangi mosi ya ta sadisaka nge. Yandi fwete vanda Mbangi ya Yehowa yina ke pesaka mbandu ya mbote na kisalu ya kulonga nsangu ya mbote.—Bingana 27:17.
Mambu ya nkaka ya kusala
Landa kuvukana na balukutakanu ya Bukristu
Verse ya mfunu: “Beto tudila bankaka dikebi sambu na kupusa bo na kumonisa zola mpi na kusala bisalu ya mbote, beto yambula ve kuvukana kumosi.”—Baebreo 10:24, 25.
Mambu yina yo ke tendula: Beto ke kwendaka na balukutakanu ntete-ntete sambu na kusambila Yehowa. Kansi balukutakanu ke natilaka beto mpi mambote zole. Ya ntete, bampangi ya babakala mpi ya bankento ke pesaka nge kikesa. Ya zole, nge ke pesaka bo kikesa ntangu nge ke vandaka na balukutakanu mpi nge ke pesaka bakomantere.—Baroma 1:11, 12.
Mambu yina lenda kumina nge: Bantangu ya nkaka, mabanza na nge ke vandaka kisika ya nkaka. Yo ke salaka nde bangindu ya mfunu kuluta nge. Nge lenda kuma mpi ti dibanza ya kukwendaka ve na balukutakanu yonso to mpi nkutu ya kuvanda ve ata na lukutakanu mosi sambu nge sala mambu ya nkaka na ntangu yina bonso badevware ya nzo-nkanda.
Mambu yina nge lenda sala: Ya kieleka, nge fwete tula dikebi na badevware na nge ya nzo-nkanda. Kansi baka lukanu ya kuvandaka mbala na mbala na balukutakanu. Kuditudila mpi lukanu ya kubakila balukutakanu mambote. Kuvandaka kaka ve pima mutindu yina na balukutakanu, salaka ngolo sambu na kupesa bakomantere. Na nsuka ya lukutakanu, sikisaka ata muntu mosi sambu na komantere na yandi to devware ya yandi me sala na lukutakanu.
Ndongisila: Kudibongisa. Baka na Internet aplikasio JW Library® mpi na nsadisa ya kidimbu “Balukutakanu,” tala malongi yina konso lukutakanu ta tubila.
Mambu ya nkaka ya kusala