Bantu Ke Bebisa Ntoto—Inki Biblia Ke Tuba?

Sekretere ya nene ya Nations unies, António Guterres, tubaka mambu yai sambu na rapore yina kimvuka ya ke tadilaka kusoba ya climat (Groupement intergouvernemental sur l’évolution du climat) pesaka na Kintete 4 avril 2022: “Kubika fioti, mambu mingi ya bantu ke sala ta bebisa kibeni climat. Masa ta dindisa bambanza ya nene. Tiya ya ntangu (chaleur) ta kuma ngolo kibeni na mutindu mosi ya me salamaka ntete ve. Mipepe ti bamvula ya ngolo kibeni ta vanda. Mpasi ya masa ta kuma na bisika mingi. Banti mpi bambisi ya mutindu na mutindu milio mosi ta fwa. Mambu yai kele ve mwanda-mwanda to nde bo me lutisa ndilu na mutindu bo me tubila yo. Mutindu siansi ke tuba, yai mambu yina ta salama kana bantu ke soba ve mutindu na bo ya kusadila énergie.”

Na Kitatu 15 juin 2022, zulunalu mosi (The New York Times) tubaka na disolo mosi (Flooding Chaos in Yellowstone, a Sign of Crises to Come) nde: “Bantu ya siansi ke tuba mingi nde na bamvula ya ke kwisa, kusoba ya climat ta bebisa diaka bima mingi kibeni; yo ta bebisa baparki yonso 423 [na États-Unis], mingi-mingi baparki yina kele mpenza na kigonsa sambu shalere ya ntangu ke kuma ngolo. Mambu ya mbi yina lenda salama kele bonso bisumbula yai ya lugangu yina beto lenda mona mpi na Biblia: batiya mpi mishindala ya masa, ba glace ke mana mpi yo ke kuma masa, masa ya banzadi ke fuluka na ntoto mpi shalere ya ntangu ke kuma ngolo.”

Keti kilumbu kele mambu ya me tala kubeba ya ntoto ta mana? Kana ee, nani ta manisa yo? Beto tala mambu yina Biblia ke tuba mpenza.

Biblia tubilaka kubeba ya ntoto

Biblia ke tuba nde Nzambi ta “[fwa] bantu yina ke bebisaka ntoto.” (Kusonga 11:18) Verse yai ya Biblia ke longa beto mambu tatu:

1. 1. Mambu yina bantu ke salaka ta bebisa kibeni ntoto.

2. 2. Kilumbu kele bantu ta bebisa diaka ve ntoto.

3. 3. Nzambi muntu ta manisa mambu ya me tala kubeba ya ntoto kansi bantu ve.

Ntoto ta kuma mbote na bilumbu ke kwisa

Biblia ke tuba nde “ntoto ke bikalaka kimakulu.” (Longi 1:4) Bantu ta zingaka ntangu yonso na zulu na yo.

• “Bantu ya lunungu ta baka ntoto, mpi bo ta zinga kimakulu na zulu na yo.”—Nkunga 37:29.

Ntoto ta kuma diaka mbote kibeni mutindu yo vandaka ntete.

• “Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.”—Yezaya 35:1.