Keti Nkweso ya Ntoto ya Mvimba Sambu na Kubaka Kupe Lenda Vukisa Kibeni Bantu?—Inki Biblia Ke Tuba?

Bantu kiteso ya 5 miliare ke landa nsaka ya nkweso ya makulu yina Kimvuka ya bo ke bingaka FIFA ke yidikaka. Yo yantikaka na Lumingu 20 novembre 2022 mpi yo ta mana na Lumingu 18 décembre 2022. Bantu mingi lenda yindula nde mabaku ya mutindu yai ya nkweso lenda sala nde bantu kusala mambu mingi kuluta kaka kuvanda kisika mosi ntangu bo ke tala bansaka yango.

• Nelson Mandela yina vandaka prezida ya ntama ya Afrique du Sud tubaka nde: “Nsaka (sport) kele ti ngolo ya kusoba nsi-ntoto. Yo ke pesaka bantu bangindu. Yo kele ti ngolo ya kuvukisa bantu na mutindu yina me salamaka ve.”

• Gianni Infantino yina kele prezida ya FIFAa tubaka nde: “Nkweso ya makulu . . . Ke vukisaka bantu sambu yo ke pesaka bo kivuvu, kiese, na kumonisa zola ya ngolo, yo ke pusaka bantu na kuzolana, mpi na kuvanda ti kima mosi ya ke tala bo yonso.”

Keti Nkweso ya Ntoto ya Mvimba Sambu na Kubaka Kupe to nsaka ya nkaka ke salaka nde bantu kukuma mutindu yina? Keti yo kele ti kima ya nkaka yina ta sala nde bantu kuzinga na ngemba mpi bo vukana?

Keti yo ke vukisaka kibeni bantu?

Nkweso ya ke bulama mvula yai Sambu na Kubaka Kupe me vanda kaka ve nkweso ya mpamba ya makulu. Kansi yo kele sambu na mambu mingi ya nkaka. Bansaka yango me sala nde bantu kutubila mambu ya me tala luzingu ya bantu mpi mambu ya politiki. Mambu yango ya politiki me tala banswa ya bantu, kukonda kuzola bantu ya mpusu ya nitu ya nkaka mpi mutindu bansi ya nkaka kele ti mbongo mingi kansi ya nkaka kele ve ti mbongo mingi.

Ata mpidina, bantu mingi ke sepelaka kutala bansaka yina ke vukisaka bansi ya ntoto ya mvimba mu mbandu Nkweso ya Makulu yina Bansi Yonso Ke Bulaka Sambu na Kubaka Kupe. Bantu mingi ke zolaka nde bansaka ya mutindu yai kuvukisa bantu kimakulu. Kansi yo ke kuka ve kusala yo. Na kisika ya kusala mpidina, bansaka yango ke monisa mpeve ya kukabwana yina bantu kele ti yo mpi mambu yina Biblia tubaka nde yo ta salama na nsungi ya ntangu yina yo ke binga “bilumbu ya nsuka.”—2 Timoteo 3:1-5.

Kivuvu ya kieleka sambu na kuvukisa ntoto ya mvimba

Biblia kele ti kivuvu ya kieleka sambu na kuvukisa bantu yonso na nsi-ntoto. Yo ke tuba nde bantu yonso na ntoto ta vanda ya kuvukana na nsi ya lutwadisu ya guvernema yina Biblia ke binga “Kimfumu ya Nzambi.”—Luka 4:43; Matayo 6:10.

Yezu Kristu ya kele Ntotila ya Kimfumu yina ta sala yonso sambu ntoto ya mvimba kuvanda na ngemba. Biblia ke tuba nde:

• “Muntu ya lunungu ta yela bonso matiti ya mpa, mpi ngemba ta kuma mingi.”—Nkunga 72:7.

• “Yandi ta gulusa nsukami yina ke dila . . . Yandi ta gulusa bo na bampasi mpi na mubulu.”—Nkunga 72:12, 14.

Ata bubu yai, malongi ya Yezu me vukisa dezia bamilio ya bantu na bansi 239. Bantu yina me longukaka na kuyambula kumenga bantu ya nkaka. Sambu na kuzaba mambu mingi, tanga masolo ya kulanda yina kele ti ntu-diambu “Mutindu ya Kubuya Kumenga Bantu ya Nkaka.”