Bikuma ya Kuvanda Ti Kivuvu na 2023—Inki Biblia Ke Tuba?

Mvula 2023 me yantika mpi beto yonso ke zola nde mambu ya mbote kukumina beto mpi bantu ya dibuta na beto. Sambu na nki beto fwete ndima nde mambu ya mbote ta kumina beto na bilumbu ke kwisa?

Biblia ke pesaka kivuvu

Biblia ke tubilaka nsangu yai ya mbote nde bampasi ya beto ke kutana ti yo bubu yai kele sambu na ntangu fioti mpi ntama ve yo ta mana. Ya kieleka, bo sonikaka Biblia “sambu na kulonga beto, sambu na nzila ya. . . kulembika yina ke katukaka na Masonuku beto vanda ti kivuvu.”—Baroma 15:4.

• Sambu na kuzaba mambu mingi ya nkaka yina Biblia ke tubaka sambu na bilumbu ke kwisa, tanga disolo “Kivuvu ya Kieleka Sambu na Bilumbu ya Ke Kwisa.”

Kivuvu yina lenda sadisa nge bubu yai

Kivuvu yina Biblia ke pesaka kele bonso “longo sambu na luzingu na beto.” (Baebreo 6:19, noti na nsi ya lutiti) Kivuvu yango lenda sadisa beto. Yo lenda sadisa beto na kukanga ntima na bampasi ya beto ke kutana ti yo bubu yai, na kudiyangisa ve kuluta ndilu mpi na kuvanda ti kiese ya ke manaka ve. Mu mbandu:

• Tala mutindu kivuvu yina Biblia ke pesaka sadisaka muntu mosi na kuyambula kikalulu mosi ya mbi. Tala video Mu Va Sepela Diaka Ve ti Luzingu na Mu.

• Tala mutindu kivuvu yina Biblia ke pesaka lenda sadisa beto kana muntu ya beto vandaka kuzola me fwa. Tala video Lusadisu Sambu na Bantu Yina Me Bwila Mpasi ya Lufwa.

Kumisa kivuvu na nge ngolo

Bantu mingi ke zolaka nde mambu ya mbote kukumina bo kansi bo ke zabaka ve kana yo ta salama to ve. Kansi yo kele ve mutindu yina sambu na mambu yina Biblia ke tubaka. Sambu na nki? Sambu mambu yina Biblia ke tubaka me katuka na Yehowa Nzambia yandi mosi, “yina lenda kusa ve.” (Tito 1:2) Kaka Yehowa mpamba kele ti ngolo ya kulungisa mambu yonso yina yandi silaka; yandi “ke salaka mambu yonso yina yandi ke zolaka kusala.”—Nkunga 135:5, 6.

Beto ke lomba nge na kubaka mambote na kivuvu ya kieleka yina Biblia ke pesaka. Nge lenda kuma kutudila diaka Biblia ntima mingi kana nge ke ‘tadila Masonuku mbote-mbote.’ (Bisalu 17:11) Yo yina beto ke lomba nge na kulonguka Biblia ya ofele ti Mbangi ya Yehowa mosi. Yo ta sadisa nge na kuvanda ti kivuvu na mvula yai 2023!