Keti Kusadila Bantu ya Mpusu Yonso ya Nitu Mambu Kiteso Mosi Kele Ndosi ya Mpamba?—Inki Biblia Ke Tuba?

Sambu na bantu mingi, kusadila bantu ya mpusu yonso ya nitu mambu kiteso mosi kele ndosi.

• António Guterres yina kele sekretere ya nene (secrétaire général) ya Nations Unies tubaka nde: “Konso kisika na nsi-ntoto, kukonda kuzola bantu ya mpusu ya nkaka ya nitu kele bonso ndikila mosi buna ya ke bebisa ngolo ba-organizasio, bimvuka ya bantu mpi luzingu ya bantu.”

Keti kilumbu kele bo ta kuma kusadila bantu ya mpusu yonso ya nitu mambu kiteso mosi? Inki Biblia ke tuba?

Mutindu Nzambi ke tadilaka kusadila bantu ya mpusu yonso ya nitu mambu

Biblia ke longaka beto mutindu Nzambi ke tadilaka bantu yina kele ve ti mpusu ya nitu mosi.

• “Na nzila ya muntu mosi, [Nzambi] salaka makanda yonso ya bantu sambu na kuzinga na ntoto ya mvimba.”—Bisalu 17:26.

• “Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.”—Bisalu 10:34, 35.

Biblia ke monisa nde bantu yonso kele kaka na kati ya dibuta mosi mpi nde Nzambi ke ndimaka bantu ya mpusu yonso ya nitu.

Mutindu bo ta kuma kusadila bantu ya mpusu yonso ya nitu mambu kiteso mosi

Kimfumu ya Nzambi yina kele luyalu mosi na zulu muntu ta kuma kusadila bantu ya mpusu yonso ya nitu mambu kiteso mosi. Luyalu yina ta longa bantu mutindu bo fwete sadila bantu ya nkaka mambu na mutindu ya me fwana. Bantu yina ta longuka mutindu bo lenda katula bangindu yonso yina bo lenda vanda ti yo ya kukonda kuzola bantu ya mpusu ya nkaka ya nitu.

• “Bantu ya insi [ta] longuka lunungu.”—Yezaya 26:9.

• “Mbuma yina lunungu ya kieleka ta buta ta vanda ngemba, mpi mbuma ya lunungu ya kieleka ta vanda ngemba ya kimakulu mpi lutaninu.”—Yezaya 32:17.

Bubu yai, Biblia ke sadisa bamilio ya bantu na kuzaba mutindu bo lenda sadila bantu ya nkaka mambu ti luzitu mpi na mutindu ya ke monisa nde bo ke baka bo na valere.

• Sambu na kuzaba mambu mingi, tanga zulunalu Telama! yina kele ti ntu-diambu “Inki Kele Nkisi ya Bangindu ya Mbi?”

• Tanga disolo ya ke tuba nde “Comment parler de racisme à votre enfant” sambu na kuzaba mutindu bibuti lenda tubila diambu yai na nzo.