Sadisa Bantu ya Nkaka Sambu Nge Kudiwa Ve Nge Mosi​—Inki Biblia Ke Tuba?

Na nsi-ntoto ya mvimba, bantu ke kudiwaka bo mosi mpi bo ke monaka bonso nde bo lenda kuma ve banduku ya ngolo ya bantu ya nkaka. Bantu ya nkaka ya mayele ya ke talaka mambu ya sante ke ndimaka nde kana muntu ke sadisa bantu ya nkaka, yo lenda sadisa yandi na kudiwa ve mutindu yina.

• Bimvuka ya ke salaka bansosa (U.S. National Institutes of Health) ke tuba nde: “Kusadisa bantu yina kele ti mfunu ya lusadisu lenda sadisa beto na kuzinga mbote mpi na kudiwa ve bonso nde beto kele beto mosi to na kudimona ntama ti bantu ya nkaka na mawi.”

Biblia ke pesaka bandongisila ya mfunu na yina me tala mambu ya beto lenda sala sambu na kusadisa bantu ya nkaka. Kana beto ke sadila mambu yina Biblia ke tuba, yo lenda sadisa beto na kudiwa diaka ve beto mosi.

Mambu ya nge lenda sala

Kabaka. Sosa mabaku ya kulutisa ntangu ti bantu ya nkaka, mingi-mingi kuvanda ti bo kisika mosi. Kabilaka bantu ya nkaka mwa bima yina nge kele ti yo mpi sala yo na ntima ya mvimba. Kana nge sala mpidina, bantu ya nkaka ta monisila nge ntonda mpi yo lenda sala nde beno kuma banduku.

• Munsiku ya Biblia: “Beno vanda ti kikalulu ya kupesa, mpi bantu ta pesa beno.”​—Luka 6:38.

Sadila Ngolo na Nge Sambu na Kusadisa Bantu ya Nkaka. Sosa mabaku ya kusadisa bantu yina ke kutana ti mambu ya mpasi. Mu mbandu, nge lenda wila bo mawa mpi kuwidikila bo ntangu bo ke tuba to nge lenda sadila bo mambu ya mfunu yina ta sala nde bo zinga mwa mbote.

• Munsiku ya Biblia: “Banduku ke zolanaka konso ntangu.”​—Bingana 17:17, Bible en Kituba.

Sambu na kuzaba mambu mingi na yina me tala mambu ya nge lenda sala sambu na kulanda kuvanda ti kinduku ya mbote ti bantu ya nkaka, tanga disolo “Luzingu ya Dibuta mpi Banduku.”