Inki Mutindu Mambu Ke Salamaka na Feti ya Makwela ya Bambangi ya Yehowa?

Mbala mingi bafeti ya makwela ya Bambangi ya Yehowa ke vandaka ve bafeti ya mindondo-mindondo mpi yo ke vandaka ntangu mosi ya lukumu. Bo ke salaka diskure mosi ya nkufi ya me simbama na Biblia. Bantangu ya nkaka bantu yina me kwelana ke yidikaka feti sambu na bantu yina bo me bingisa. Bo ke kutanaka na nima ya diskure yina. Na feti yango bantu ke diaka mpi ke nwaka mwa kima.a Yezu kwendaka mpi na feti ya mutindu yina na mbanza Kana ntangu yandi yantikaka kisalu na yandi ya kulonga nsangu ya mbote.—Yoane 2:1-11.

Inki mutindu mambu ke salamaka na feti yango?

Kima ya kuluta mfunu na feti ya makwela kele diskure ya makwela. Bo ke salaka diskure yango na minuta 30 mpi Mbangi mosi ya Yehowa muntu ke salaka yo. Diskure yango ke simbaka bantima ya bantu mpi yo ke pesaka bo kikesa. Diskure yango ke monisaka mutindu Biblia lenda sadisa bantu yina me kwelana na kuvanda na makwela yina ta wumela, na kulanda kuzolana mpi na kuvanda na makwela ya kiese.—Baefezo 5:33.

Na bansi mingi, guvernema ke pesaka Bambangi ya Yehowa nswa kukwedisa. Yo yina na nsuka ya diskure ya makwela, bantu ya me kwelana ke salaka lusilu ya makwela mpi bo ke lwatisanaka lupetu na misapi. Na nima, Mbangi ya Yehowa yina salaka diskure ya makwela ta tuba nde bankwelani yango me kuma sesepi nkento ti bakala na kutadila nsiku.

Na bansi ya nkaka, nsiku ke lombaka nde bantu kukwenda kukwelana na biro ya leta ya ke tadilaka mambu ya makwela. Bakala ti nkento yina ke kwelana ke kwendaka na biro yango ya leta bilumbu fioti na ntwala nde bo sadila bo diskure ya makwela. Kana bakala ti nkento yina ke kwelana salaka ve lusilu ya makwela na biro ya leta yina ke tadilaka mambu ya makwela, bo lenda sala lusilu yango na nsuka ya diskure ya makwela. Kansi kana bo salaka dezia lusilu yina, bo lenda pona kana bo ta sala yo diaka. Kansi ture yai, bo ta sala yo na bangogo yina ke monisa nde bo salaka dezia lusilu yina. Na nsuka ya diskure ya makwela, bo ta sala kisambu sambu na kulomba Nzambi yandi sakumuna bakala ti nkento yina me katuka kukwelana.

Bafeti ya makwela ya Bambangi ya Yehowa ke salamaka na wapi?

Bambangi mingi ya Yehowa ke ponaka kusala nkinsi na bo ya makwela na Nzo ya Kimfumu kana mpila kele.b Kana bankwelani ta sala feti na nima ya diskure, bo ke ponaka kisika ya nkaka sambu na kusala feti yango.

Bakala mosi ti nkento mosi ke kwelana na Nzo mosi ya Kimfumu. Mbangi mosi ya Yehowa ke sala diskure ya makwela ya me simbama na Biblia.

Banani lenda kwenda na feti yango?

Kana makwela me salama na Nzo ya Kimfumu, mbala mingi bantu yonso ke kwisaka, yo vanda bo kele Bambangi ya Yehowa to ve. Kana bankwelani yina ta sala feti sambu na makwela na bo, bo mosi ta pona bantu yina bo ta bingisa na feti yango.

Muntu fwete lwata inki mutindu sambu na kukwenda na feti yango?

Ata yo ke vandaka ve ti mutindu mosi buna ya kulwata sambu na kukwenda na makwela yina ke salama na Nzo ya Kimfumu, Bambangi ya Yehowa ke salaka bikesa sambu na kulanda ndongisila ya Biblia ya kulwata na mutindu ya kukonda mindondo mpi na luzitu sambu na kupesa lukumu na nkinsi yina ya mfunu mingi. Yo ke vandaka mbote kana bantu ya nkaka me sala mpidina. (1 Timoteo 2:9) Ya kieleka, bo ke sadilaka mpi ndongisila yina sambu na konso kisika yina feti ya makwela ke salama, kana bankwelani me baka lukanu ya kusadisa feti.

Bankwelani ke ndimaka kubaka bakado?

Biblia ke siamaisaka bantu na kukaba. (Nkunga 37:21) Bambangi ya Yehowa ke sepelaka kukabila bantu ya nkaka mpi kubaka bakado. (Luka 6:38) Kansi, bo ke lombaka ve bantu na kunata bakado mpi bo ke tangaka ve bazina ya bantu yina me pesa bakado. (Matayo 6:3, 4; 2 Bakorinto 9:7; 1 Piere 3:8) Bikalulu yina ke wakanaka ve ti mambu yina Biblia ke tubaka mpi yo lenda sala nde bantu yina me kwisa na feti kudiwa ve mbote.

Bantu ke nangulaka makopa ya malafu?

Biblia ke buyisaka ve bantu na kunangula makopa ya malafu to na kututisa makopa ya malafu. Kansi bankwelani ya nkaka lenda lomba bantu yina bo me bingisa na kunangula ve makopa ya malafu sambu bo budisa ve bantu ya nkaka sakuba.—Baroma 14:21.

Keti bantu yina ta vanda na feti ya makwela ta losila bankwelani loso to kima mosi ya mutindu yina?

Ve. Na bisika ya nkaka, bo ke losilaka bantu yina me kwela loso to kima mosi ya me fwanana ti yo. Bo ke yindulaka nde yo ta natila bakwelani mambote, kiese mpi luzingu ya nda. Kansi Bambangi ya Yehowa ke buyaka mambu yina sambu yo me katukaka na mambu yina bantu ke yindulaka. Na kati ya mambu yango, beto lenda tanga kuzodila bantu shanse ya mbote, mambu yai ke fwa bansiku ya Biblia.—Yezaya 65:11.

Bima ya kudia mpi malafu ke vandaka?

Na nkinsi ya makwela ya ke salamaka na Nzo ya Kimfumu, bantu ke diaka ve bima ya feti mpi bo ke nwaka ve malafu. Bankwelani ya nkaka ke ponaka kisika yina bo ta sala feti na bo ya makwela sambu na kudia mpi kunwa malafu. (Longi 9:7) Kana bo me baka lukanu ya kupesa bantu malafu, bo ke zikisaka nde bo ta pesa bantu malafu na mutindu yina bo ta lutisa ve ndilu mpi yo ke vandaka kaka bantu yina kele bambuta na kutadila nsiku ya leta, bantu fwete nwa malafu yango.—Luka 21:34; Baroma 13:1, 13.

Keti bo ke tulaka miziki mpi bantu ke kinaka?

Kana bankwelani ta sadisa feti, bo lenda yidika miziki yina ta bula mpi makinu. (Longi 3:4) Bo fwete pona miziki ya mbote ya kutula yina ta sepedisa bo mpi bantu yina ta kwisa na feti. Mbala mingi na nkinsi yina ke salamaka na Nzo ya Kimfumu, bo ke tulaka miziki yina ntu-diambu na yo me katuka na Biblia.

Nkento mosi ti bakala mosi ke kina na feti ya makwela na bo, bo ke kina ti bantu ya bo bingisaka.

Keti Bambangi ya Yehowa ke salaka feti ya aniversere ya makwela na bo?

Bansiku ya Biblia ke ndimaka ve mpi ke buyisaka ve bantu na kusala ba-aniversere ya makwela. Yo yina Bambangi ya Yehowa yina me kwelaka ke ponaka na kusala to ve feti ya aniversere ya makwela na bo. Kana bo me pona kusala feti yina, bo ke salaka yo bo mosi to ti banduku na bo mpi bantu ya mabuta na bo.

a Konso insi lenda vanda ti mutindu na bo ya kusala mambu, mambu ya bo me yikamaka kusala mpi bansiku na bo.

b Mbangi ya Yehowa yina ke salaka diskure ya makwela, bo ke futaka yandi ve sambu na yo, bankwelani ke futaka mpi ve mbongo sambu na kusadila Nzo ya Kimfumu.