Sambu na Nki Bambangi ya Yehowa Ke Buyaka na Luzitu Yonso Kusala Bankinsi ya Insi?
Bambangi ya Yehowa ke zitisaka baluyalu mpi bidimbu ya ke monisaka baluyalu. Beto ke zitisaka mpi nswa yina bantu ya nkaka kele ti yo ya kudia ndefi na kukota na kimvuka mosi buna ya politiki (serment d’allégeance), ya kupesa drapo lusaku to ya kuyimba nkunga yina ke kumisaka insi (hymne national).
Kansi Bambangi ya Yehowa me ponaka na kusala ve mambu ya mutindu yina, sambu bo ke ndimaka nde yo ke wakanaka ve ti malongi yina kele na Biblia. Beto ke vandaka na kiese ntangu bantu ya nkaka ke zitisaka mambu ya beto ke ndimaka kaka mutindu beto ke zitisaka mambu yina bo ke ndimaka.
Na disolo yai, beto ta tadila:
Inki beto lenda sala kana nsiku mosi ya insi ke tuba nde beto fwete vukana na mambu ya mutindu yina?
Inki minsiku ya Biblia ke tubaka?
Malongi yai zole ya mfunu ya Biblia ke vandaka ti bupusi na balukanu ya beto ke bakaka:
Beto fwete sambila Nzambi mpamba. Biblia ke tuba nde: “Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.” (Luka 4:8) Mbala mingi balusilu ya kukangama kaka na insi mpi bankunga ya bo ke yimbaka sambu na bansi ke vandaka lusilu yina bantu ke salaka ya kuzola bansi na bo kuluta kima yonso ya nkaka. Yo yina Bambangi ya Yehowa ke monaka nde, yo kele ve mbote nde bo vukana na mambu ya mutindu yina.
Bambangi ya Yehowa ke monaka nde kupesa drapo lusaku kele mpi kima ya ke monisaka nde muntu ke sambila yo, to yandi ke sala lusambu ya biteki, kima yina Biblia ke buyisaka. (1 Bakorinto 10:14) Bantu ya Istware ke zabaka nde badrapo ya bansi ke vandaka bidimbu ya lusambu. Mu mbandu, tala mambu yina Carlton Hayes sonikaka: “Drapo kele kidimbu ya ntete ya ke monisaka lukwikilu mpi kidimbu ya ntete ya lusambu ya insi.”a Nsoniki Daniele Mannix tubaka sambu na Bakristu ya mvu-nkama ya ntete nde: “Bakristu vandaka kubuya . . . kupesa bimenga na . . . ya mfumu ya [Roma]—bubu yai, yo kele kiteso mosi ti kubuya kupesa drapo lusaku.”b
Ata Bambangi ya Yehowa ke pesaka ve drapo lusaku, bo ke sosaka ve kubebisa yo, kuyoka yo tiya to mpi kumonisa na mutindu mosi buna nde bo ke vwezaka yo. Bo ke zitisaka mpi bidimbu ya nkaka ya insi.
Na meso ya Nzambi, bantu yonso kele kiteso mosi. (Bisalu 10:34, 35) Biblia ke tubaka nde “na nzila ya muntu mosi, yandi salaka makanda yonso ya bantu.” (Bisalu 17:26) Yo yina, Bambangi ya Yehowa ke ndimaka nde yo kele mbi na kusadila dikanda mosi to insi mosi mambu bonso nde bo me luta makanda to bansi ya nkaka. Beto ke zitisaka bantu yonso, yo vanda bo me katukaka na wapi to ke zingaka na wapi.—1 Piere 2:17.
Inki beto ke salaka kana nsiku ya insi ke tuba nde beto fwete sala nkinsi mosi buna?
Bambangi ya Yehowa ke nwanisaka ve baluyalu. Beto ke ndimaka nde baluyalu kele na kati ya “ngidika ya Nzambi” mpi yandi me pesaka nzila nde yo vanda. (Baroma 13:1-7) Beto ke ndimaka mpi nde Bakristu fwete zitisa bamfumu.—Luka 20:25.
Ebuna kana bansiku ya insi ke fwa bansiku ya Nzambi? Bantangu ya nkaka, yo lenda salama nde bo lomba bamfumu na kusoba nsiku mosi buna.c Kana mpila ya kusoba nsiku mosi buna kele ve, Bambangi ya Yehowa ke ponaka na luzitu yonso ‘kulemfukila Nzambi na kisika ya kulemfukila bantu.’—Bisalu 5:29.
Keti Bambangi ya Yehowa ke pesaka maboko na bangindu ya mambu ya me tala luzingu ya bantu to politiki?
Ve. Bambangi ya Yehowa ke kotaka ve na mavwanga yina bantu ke basisaka na yina me tala luzingu ya bantu to mambu ya politiki. Mutindu beto ke buyaka kudia ndefi sambu na kukota ve na mambu ya politiki, kupesa drapo lusaku to kuyimba nkunga ya ke kumisaka insi ke tendula ve nde, beto ke pesaka maboko na kimvuka mosi buna to beto ke lombaka nde kima mosi buna kusoba na yina me tala politiki. Beto ke salaka buna sambu beto ke zingaka na kuwakana ti mambu ya beto ke ndimaka ya kele na Biblia.