Keti Nzambi Kele ti Zina?

Mvutu ya Biblia

Konso muntu kele ti zina. Yo yina, yo me fwana nde Nzambi mpi kuvanda ti zina. Diaka, kubinga nduku mosi na zina na yandi kele mfunu sambu na kuvanda ti kinduku ya mbote ti yandi. Ebuna sambu na nki mambu lenda vanda ve mutindu yina na yina me tala kinduku ti Nzambi?

Nzambi me sonikisaka na Biblia nde: “Mono kele Yehowa. Yo yina zina na mono.” (Yezaya 42:8) Yo kele masonga nde Nzambi kele mpi ti batitre mingi mu mbandu, “Nzambi-Nkwa Ngolo Yonso,” “Mfumu ya Kuluta Nene,” mpi “Ngangi.” Kansi, yandi ke pesaka bantu yina ke sambilaka yandi lukumu mutindu yandi ke lombaka bo na kubinga yandi na zina na yandi.​—Kuyantika 17:1; Bisalu 4:24; 1 Piere 4:19.

Na Babiblia mingi, zina ya Nzambi ke vandaka na Kubasika 6:3 (to na noti na nsi ya lutiti ya verse yai). Verse yai ke tubaka nde: “Mono vandaka kumonana na Abrahami, na Izaki, mpi na Yakobi bonso Nzambi Nkwa-Ngolo Yonso, kansi na yina me tala zina na mono Yehowa mono zabisaka bo yo ve.”

Na Kikongo, beto ke sadilaka Yehowa, zina ya Nzambi banda ntama. Bantu ya nkaka ya mayele ke tubaka nde zina ya Nzambi kele Yawe. Kansi Yehowa kele zina yina me zabanaka mingi. Bo sonikaka kitini ya ntete ya Biblia na Kiebreo. Kiebreo me swaswana ti Kikongo, sambu na Kiebreo bo ke tangaka banda na diboko ya kitata mpi ke vukaka na diboko ya kimama. Na Kiebreo, zina ya Nzambi ke vandaka ti bisono yai ya nene (consonnes) iya: יהוה. Bisono yango bo ke balulaka yo na YHWH mpi bo ke bingaka yo Tetragrame.