Keti Bambangi ya Yehowa Kele Kadibundu?

Ve, Bambangi ya Yehowa kele ve kadibundu. Kansi, beto kele Bakristu yina ke salaka bikesa sambu na kulanda mbandu ya Yezu Kristu mpi kusadila malongi na yandi.

Kadibundu kele nki?

Konso muntu ke tendulaka ngogo “kadibundu” na mutindu na yandi. Kansi beto tadila bangindu zole yina bantu mingi ke vandaka ti yo sambu na tumabundu mpi sambu na nki bangindu yina me tala beto ve.

• Bantu ya nkaka ke yindulaka nde kadibundu kele kimvuka mosi ya mpa to dibundu mosi ya ke sala mambu yina ke salamaka ve. Bambangi ya Yehowa me basisaka ve dibundu mosi ya mpa. Kansi, lusambu na beto ke landaka kibeni mbandu ya Bakristu ya mvu-nkama ya ntete. Bo me sonikaka mbandu mpi malongi ya Bakristu yai na Biblia. (2 Timoteo 3:16, 17) Beto ke kwikilaka nde Masonuku ya Santu fwete baka kisika ya ntete na yina me tala mambu yina bantu ke ndimaka sambu na lusambu.

• Bantu ya nkaka ke yindulaka nde kadibundu kele kimvuka mosi ya kele kigonsa mpi ya kele ti mfumu. Bambangi ya Yehowa ke monaka ve nde muntu mosi buna kele mfumu na bo. Kansi, beto ke zitisaka nsiku yina Yezu pesaka balongoki na yandi ntangu yandi tubaka nde: “Beno kele kaka na Ntwadisi mosi, Kristu.”​—Matayo 23:10.

Bambangi ya Yehowa kele ve kadibundu mosi ya kigonsa kansi dibundu na bo ke natilaka bo mpi bantu ya nkaka mambote. Mu mbandu, kisalu na beto ya kulonga me sadisaka bantu mingi na kukatuka na kimpika ya kunwa bima yina ke bebisaka nitu bonso malafu mpi bima yina ke lawusaka. Na ntoto ya mvimba, beto ke kangulaka mpi banzo-nkanda ya kulonguka kutanga mpi kusonika sambu na kusadisa bantu mingi na kuzaba kutanga mpi kusonika. Diaka, kana kisumbula me salama, beto ke salaka yonso sambu na kusadisa bantu. Beto ke salaka bikesa sambu na kupesa bantu ya nkaka mbandu ya mbote, kaka mutindu Yezu pesaka balongoki na yandi nsiku ya kusala yo.​—Matayo 5:13-16.