Mbeni ya Kristu Kele Nani?

Mvutu ya Biblia

Mbeni ya Kristu kele kaka ve muntu mosi buna to kimvuka mosi buna, sambu Biblia ke tuba nde ‘bambeni ya Kristu kele mingi.’ (1 Yoane 2:18) Kansi, bangogo “mbeni ya Kristu,” yina me katuka na ngogo mosi ya Kigreki ya ke tendula “kutelemina Kristu” ke tadila konso muntu yina ke:

• Buyaka kundima nde Yezu kele Kristu (Mesia) to ke ndimaka ve nde yandi kele Mwana ya Nzambi.—1 Yoane 2:22.

• Teleminaka Kristu, Muntu Yina Nzambi Me Tulaka Mafuta.—Nkunga 2:1, 2; Luka 11:23.

• Tubaka nde yandi muntu kele Kristu.—Matayo 24:24.

• Niokulaka balongoki ya Kristu, sambu Yezu ke monaka nde mambu yina bantu ke sala balongoki na yandi, yo kele nde na yandi ya bo ke sala yo.—Bisalu 9:5.

• Kudibingaka Mukristu kansi yandi ke fwaka bansiku mpi yandi ke kusaka.—Matayo 7:22, 23; 2 Bakorinto 11:13.

Bantu ya ke salaka mambu yai beto me tubila, bo kele bambeni ya Kristu; kansi Biblia ke bingaka mpi kimvuka ya bantu ya mutindu yina nde “mbeni ya Kristu.” (2 Yoane 7) Mbeni ya Kristu monanaka sambu na mbala ya ntete na ntangu ya bantumwa mpi yandi kele kaka tii bubu. Yo kele mambu yina Biblia tubilaka dezia na ntwala.—1 Yoane 4:3.

Mutindu ya kuzaba bambeni ya Kristu

• Bo ke longaka mambu ya luvunu sambu na Yezu. (Matayo 24:9, 11) Mu mbandu, bantu yina ke longaka Butatu Busantu to nde Yezu kele Nzambi Nkwa-Ngolo Yonso ke longaka ve ata fioti mambu yina Yezu longaka, sambu yandi mosi, yandi tubaka nde: “Tata kele nene kuluta mono.”—Yoane 14:28.

• Bambeni ya Kristu ke ndimaka ve mambu yina Yezu tubaka na yina me tala Kimfumu ya Nzambi. Mu mbandu, bamfumu ya nkaka ya mabundu ke tubaka nde Kristu ke yalaka na nzila ya baluyalu ya bantu. Kansi dilongi yai ke wakana ve ti mambu yina Yezu tubaka. Yandi tubaka nde: “Kimfumu na mono kele ve ya nsi-ntoto yai.”—Yoane 18:36.

• Bo ke tubaka nde Yezu kele Mfumu na bo, kansi bo ke lemfukaka ve na bansiku na yandi, mu mbandu nsiku ya kulonga nsangu ya mbote ya Kimfumu.—Matayo 28:19, 20; Luka 6:46; Bisalu 10:42.