Profesi Kele Inki?

Mvutu ya Biblia

Profesi kele nsangu ya Nzambi me pesa muntu na nzila ya mpeve santu na yandi to mbonameso ya me katuka na Nzambi. Biblia ke tubaka nde baprofete “tubaka mambu yina me katuka na Nzambi mutindu mpeve santu vandaka kutwadisa bo.” (2 Pierre 1:20, 21) Disongidila nde profete kele muntu yina Nzambi me songa mambu sambu yandi songa yo bantu ya nkaka.​—Bisalu 3:18.

Inki mutindu baprofete bakaka nsangu na Nzambi?

Nzambi sadilaka bametode ya mutindu na mutindu sambu na kusonga baprofete na yandi bangindu na yandi:

• Nsangu ya kusonika. Nzambi sadilaka yo kaka mbala mosi ntangu yandi pesaka Moize bansiku kumi yina yandi mosi sonikaka.​—Kubasika 31:18.

• Nsangu ya munoko na nzila ya bawanzio. Mu mbandu, Nzambi sadilaka wanzio mosi sambu na kusonga Moize mambu yina yandi fwete kwenda kusonga Farao yina vandaka ntotila ya Ezipte. (Kubasika 3:2-4, 10) Ntangu yo vandaka kulomba nde Nzambi kusadila bangogo ya siki-siki, yandi vandaka kutinda bawanzio bo tuba ngogo mosi-mosi yina muntu fwete sonika, mutindu yandi salaka yo ntangu yandi songaka Moize nde: “Sonika bangogo yai, sambu mono ke sala kuwakana ti nge mpi ti Izraele na kuwakana ti bangogo yai.”​—Kubasika 34:27. 7.a

• Bambonameso. Nzambi vandaka kupesa baprofete bambonameso ata bo vandaka ve ya kulala to kuzaba kibeni ve mambu. (Yezaya 1:1; Habakuki 1:1) Bambonameso ya nkaka vandaka kibeni mambu ya vandaka kusalama na ntangu muntu ke mona yo mpi yo vandaka kusala nde yandi mpi yandi tuba na ntangu yo ke salama. (Luka 9:28-36; Kusonga 1:10-17) Bantangu ya nkaka, Nzambi vandaka kupesa bantu bambonameso ntangu muntu me bwa ngambu. (Bisalu 10:10, 11; 22:17-21) Nzambi vandaka mpi kupesa baprofete bambonameso na nzila ya bandosi ntangu bo vandaka na mpongi.​—Daniele 7:1; Bisalu 16:9, 10.

• Kutwadisa bangindu ya muntu. Nzambi twadisaka bangindu ya baprofete sambu bo pesa nsangu na yandi. Yo yina Biblia ke tuba nde: “Masonuku yonso kele ya kupemama na Nzambi.” Nsa “kele ya kupemama na Nzambi,” bo lenda balula yo mpi nde “Nzambi pemaka mupepe.” (2 Timoteo 3:16; The Emphasised Bible) Nzambi sadilaka mpeve santu na yandi to ngolo yina yandi ke sadilaka bisalu sambu na kukotisa bangindu na yandi na butomfu ya bansadi na yandi. Nsangu vandaka ya Nzambi, kansi baprofete bantu ponaka bangogo ya kusonikila yo.​—2 Samuele 23:1, 2.

Keti profesi yonso ke tendulaka kaka mambu ya ta salama?

Ve. Baprofesi ya Biblia ke tubilaka kaka ve mambu yina ta salama na bilumbu ya ke kwisa. Ata mpidina, bansangu mingi ya ke katukaka na Nzambi ke tubilaka bilumbu ya ke kwisa ata yo ke tubila yo ve na pwelele yonso. Mu mbandu, baprofete ya Nzambi vandaka kukebisa bantu ya Izraele mbala na mbala sambu na mambu ya mbi ya bo vandaka kusala. Balukebisu yango vandaka kutubila balusakumunu yina bo lendaka kubaka kana bo lemfukila yo mpi bampasi yina lendaka kubwila bo kana bo buya kulemfukila yo. (Yeremia 25:4-6) Bo lendaka kumona mambote to bampasi na kutadila inki bo mosi ke pona.​—Kulonga 30:19, 20.

Bambandu ya baprofesi ya Biblia yina tubilaka ve mambu yina ta salama

• Na dibaku mosi ya Bantu ya Izraele lombaka Nzambi na kusadisa bo, yandi tindaka profete mosi sambu yandi songa bo nde mutindu bo buyuka kulemfukila nsiku na yandi, yandi ta sadisa bo ve.​—Bazuzi 6:6-10.

• Ntangu Yezu solulaka ti nkento ya Samaria, yandi songaka nkento yango mambu yina yandi me salaka na luzingu na yandi. Yezu zabaka yo kaka sambu Nzambi songaka yandi yo. Nkento yina ndimaka nde Yezu vandaka profete ata Yezu songaka yandi ve mambu yina ta salama na nima.​—Yoane 4:17-19.

• Ntangu bo vandaka kusambisa Yezu, bambeni na yandi fikaka yandi luse, bo bulaka yandi mpi bo songaka yandi nde: “Bikula! Nani me bula nge?” Bo salaka buna sambu yandi songa bo na nsadisa ya ngolo ya Nzambi nani me bula yandi, kansi ve sambu yandi songa bo mambu yina ta salama na bilumbu ke kwisa.​—Luka 22:63, 64.