BANGIUFULA YINA BALEKE KE KUDIYULAKA
Inki Mutindu Mono Lenda Pona Muntu Yina Kele Mbandu ya Mbote ya Kulanda?
Haley ke tuba nde: “Ntangu mono kutanaka ti mambu ya mpasi na nzo-nkanda, kuyindula muntu mosi ya mono sepelaka ti yandi mpi ya kutanaka ti bampasi ya mutindu mosi ti ya mono, sadisaka mono mingi kibeni. Ebuna mono mekaka kusala mpila yandi salaka. Kuvanda ti muntu mosi ya nge lenda landa mbandu na yandi salaka nde mono nunga mambu ya mpasi na pete yonso.”
Muntu yina kele mbandu ya mbote ya kulanda lenda sadisa nge na kutina bigonsa mpi na kulungisa balukanu na nge. Kima ya mfunu kele kupona muntu yina kele ti bikalulu ya mbote sambu yandi vanda mbandu yina nge lenda landa.
Sambu na nki nge fwete pona mbote-mbote?
Muntu yina nge ta pona sambu na kulanda mbandu na yandi lenda vanda ti bupusi ya mbote to ya mbi na luzingu na nge.
Biblia ke siamisaka Bakristu na kulanda mbandu ya bantu yina ke pesaka mbandu ya mbote. Yo ke tuba nde: “Ntangu beno ke tadila mbuma ya mbote ya bikalulu na bo, beno landa mbandu ya lukwikilu na bo.”—Baebreo 13:7.
Ndongisila: Bantu yina nge ta pona sambu bo vanda bambandu na nge lenda vanda ti bupusi ya mbote to ya mbi na luzingu na nge. Yo yina, pona bantu yina kele kibeni ti bikalulu ya mbote, kansi ve kaka bantu yina me zabanaka mingi to bayina kele mvula mosi ti nge.
Colin ke tuba nde: “Mono longukaka mambu mingi na mbandu ya nduku na mono mosi ya Mukristu na zina ya Adam, yo vanda na yina me tala mutindu na yandi ya kutadila mambu mpi mbandu na yandi. Yo ke yitukisaka mono kibeni mutindu mono ke vilanaka ve mambu yina yandi tubaka mpi salaka. Yandi zabaka ve nde mbandu na yandi sadisaka mono.”
Muntu ya nge ke pona sambu na kulanda mbandu na yandi lenda vanda ti bupusi na mutindu na nge ya kutadila mambu mpi ya kudiwa.
Biblia ke tuba nde: “Beno kudikusa ve. Banduku ya mbi ke bebisaka bikalulu ya mbote.”—1 Bakorinto 15:33.
Ndongisila: Muntu yina nge ta landa mbandu na yandi mpi ya nge fwete pona fwete vanda yina kele ti bikalulu ya mbote, kansi ve kaka muntu yina ke monana kitoko. Kana ve nge ta lemba nitu.
Tamara ke tuba nde: “Kana nge ke kudifwanisa ntangu yonso ti bantu yina kele kitoko, nge ta kuma kudiwa ve mbote mpi nge ta kuma kumona nde nge kele ve mfunu. Yo lenda pusa nge na kukuma kudiyangisa mingi na yina me tala mutindu nge ke monika.”
Yindula fioti: Sambu na nki yo lenda vanda mutambu kana nge pona bavedeti to bantu yina ke salaka bansaka sambu nge landa mbandu na bo?
Bantu yina nge ke pona sambu na kulanda mbandu na bo lenda sala nde nge lungisa balukanu na nge to ve.
Biblia ke tuba nde: “Muntu yina ke tambulaka ti bantu ya mayele ta kuma mayele.”—Bingana 13:20.
Ndongisila: Pona bantu yina kele ti bikalulu ya mbote yina nge ta zola kulanda. Kana nge ke tala kimuntu na bo, nge ta zaba na siki-siki mambu ya nge fwete sala sambu na kulungisa lukanu na nge.
Miriam ke tuba nde: “Na kisika ya kuditudila lukanu mosi ya mpidina-mpidina mu mbandu ‘Mono ke zola kulungisa mikumba na mono mbote-mbote,’ nge lenda tuba nde, ‘Mono ke zola kulungisa diaka mbote mikumba na mono bonso Jane. Yandi ke zitisaka ntangu mpi yandi ke bakaka ve mikumba na yandi na nsaka.’”
Na bunkufi: Kana nge pona muntu yina kele mbandu ya mbote na kulanda, nge lenda kuma mutindu ya muntu yina nge ke zola kukuma.
Kana nge ke landa mbandu ya muntu yina kele mbandu mosi ya mbote ya kulanda, yo lenda sadisa nge na kulungisa balukanu na nge nswalu.
Inki mutindu nge lenda pona?
Yo kele ti mpila zole ya nge lenda pona muntu yina kele mbandu ya mbote ya kulanda.
Yindula kikalulu mosi ya mbote yina nge ta zola kukuma ti yo, ebuna sosa muntu mosi ya nge ke zolaka mpi ya kele ti kikalulu yango.
Pona muntu mosi ya nge ke zolaka, na nima sosa kuzaba kikalulu mosi yina muntu yango kele ti yo mpi ya nge ta zola kukuma ti yo.
Lutiti ya bo me tula ti disolo yai ta sadisa nge na kusala yo.
Bantu ya nge lenda pona bonso bambandu lenda vanda:
Batoko ya mvula mosi ti nge. Miriam ke tuba nde: “Nduku na mono ya ngolo kele muntu yina mono ke zolaka kuvanda bonso yandi. Yandi ke bakaka ntangu yonso ntangu ya kutelema sambu na kutudila bantu ya nkaka dikebi. Yandi kele nkutu leke na mono, kansi yandi kele ti bikalulu ya mbote ya mono ke vandaka ve ti yo mpi yo ke pesaka mono nzala ya kulanda mbandu na yandi.”
Bambuta. Yo lenda vanda bibuti na nge to muntu ya nkaka ya dibundu na beno. Annette ke tuba nde: “Yo kele pwelele: bibuti na mono kele bambandu ya mbote sambu na mono. Bo kele ti bikalulu ya mbote kibeni. Mono ke monaka bifu na bo, kansi mono ke monaka sirtu nde bifu yina ke kangaka bo ve nzila ya kukangama kaka na Nzambi. Ntangu mono ta lungisa bamvula yina bo kele ti yo, mono ke ndima nde bantu lenda tuba mambu ya mutindu mosi sambu na mono.”
Bantu yina Biblia ke tubilaka. Melinda ke tuba nde: “Mono ponaka bantu ya mutindu na mutindu yina Biblia ke tubilaka sambu bo vanda bambandu yina mono lenda landa na mambu ya mutindu na mutindu—Timoteo, Ruti, Yobi, Piere, mwana-nkento ya fioti ya Izraele. Ntangu mono ke longukaka na kuzaba mbote-mbote bantu yina Biblia ke tubilaka, bo ke kumaka kibeni bantu ya kieleka na meso na mono. Mono sepelaka kibeni mingi ti masolo ya mono longukaka na mukanda Landa Mbandu ya Lukwikilu na Bo, mpi mono ke sadilaka ‘Index des modèles” ya ke vandaka na bitini zole ya mukanda Les jeunes s’interrogent.”
Ndongisila: Kupona ve kaka muntu mosi mpamba yina nge lenda landa mbandu na yandi. Ntumwa Polo songaka Bakristu nde: “Beno talaka bantu yina ke tambula na mutindu yina ke wakana ti mbandu yina beto pesaka beno.”—Bafilipi 3:17.
Keti nge zabaka yo? Nge lenda vanda mbandu yina bantu ya nkaka lenda landa. Biblia ke tuba nde: “Kuma mbandu sambu na bantu ya kwikama na kutuba, na bikalulu, na zola, na lukwikilu, mpi na bikalulu ya bunkete.”—1 Timoteo 4:12.
Kiana ke tuba nde: “Ata yo ta lomba nde nge yidika bikalulu na nge ya nkaka, nge lenda sadisa mpi bantu ya nkaka na kuyidika mpi bikalulu na bo. Nge ke zaba ve banani ke tala nge, mpi nge ke zaba ve inki mutindu mambu ya nge ke tuba lenda soba luzingu ya muntu ya nkaka.”