Inki Biblia Ke Tubaka na Yina Me Tala Kubasisa Divumu?

Mvutu ya Biblia

Biblia ke sadilaka ve bangogo “kubasisa divumu” sambu na kutubila kubasisa mwana yina me butuka ntete ve. Kansi, baverse mingi ke tubilaka mutindu Nzambi ke tadilaka luzingu ya muntu, yo vanda mpi ya mwana yina me butuka ntete ve.

Nzambi muntu me pesaka beto dikabu ya luzingu. (Kuyantika 9:6; Nkunga 36:9) Yandi ke monaka nde luzingu kele mfunu, yo vanda luzingu ya mwana yina kele na divumu. Yo yina kana muntu me fwa mwana yina me butuka ntete ve na luzolo yonso, yo kele bonso nde yandi me fwa muntu.

Nsiku yina Nzambi pesaka bantu ya Izraele tubaka nde: “Kana babakala ke nwana ebuna bo tutana ti nkento ya kele ti divumu mpi yandi buta matsiombe, kansi kisumbula ya ke nata lufwa kusalama ve, muntu yina me sala mbi fwete futa kibawu yina bakala ya nkento yina ta lomba; mpi yandi fwete futa yo na nzila ya bazuzi. Kansi kana kisumbula ya ke nata lufwa kusalama, nge fwete pesa luzingu sambu na luzingu.”—Kubasika 21:22, 23.a

• Luzingu ya muntu ke yantikaka nki ntangu?

• Keti Nzambi ta lolula muntu yina me basisa divumu?

• Keti kubasisa divumu kele mbi kana luzingu ya mama to ya mwana kele na kigonsa?

Luzingu ya muntu ke yantikaka nki ntangu?

Sambu na Nzambi, muntu ke yantikaka kuzinga kaka ntangu mama ke bakaka divumu. Na Ndinga na yandi, Biblia, Nzambi ke monisaka nde ata mwana me butuka ntete ve, yandi kele dezia muntu yina ke zinga. Beto tadila bambandu yina ke monisa nde Nzambi ke tadilaka mwana yina me butuka ntete ve mutindu yandi ke tadilaka muntu yina kele na luzingu.

• Na nsadisa ya mpeve santu, Ntotila Davidi songaka Nzambi nde: “Meso na nge monaka mono nkutu ntangu mono vandaka na kati ya divumu.” (Nkunga 139:16) Nzambi monaka nde Davidi vandaka dezia muntu na ntwala nkutu nde yandi butuka.

• Diaka, na ntwala nde profete Yeremia kubutuka, Nzambi zabaka nde yandi ta sadila Yeremia sambu na kulungisa lukanu mosi ya mfunu. Nzambi songaka yandi nde: “Na ntwala nde mono sala nge na divumu, mono zabaka nge, mpi na ntwala nde nge butuka, mono santisaka nge. Mono kumisaka nge mbikudi sambu na makanda.”—Yeremia 1:5.

• Luka yina vandaka nsoniki ya Biblia mpi munganga, sadilaka kaka ngogo mosi ya Kigreki sambu na kutubila mwana yina me butuka ntete ve mpi mwana yina me katuka kubutuka.—Luka 1:41; 2:12, 16.

Keti Nzambi ta lolula muntu yina me basisa divumu?

Nzambi lenda lolula bantu yina me basisaka mavumu. Kana bo ndima mutindu Nzambi ke tadilaka luzingu, yo ta vanda ve mfunu nde bo kudiyangisa kuluta ndilu sambu na mbi yina bo salaka. Biblia ke tuba nde: “Yehowa ke wilaka bantu mawa mpi ke fwilaka bo nkenda . . . Mutindu kisika yina ntangu ke basikaka kele ntama ti kisika yina ntangu ke dindaka, mutindu mosi mpi, yandi me tulaka mambu na beto ya mbi ntama ti beto.”b (Nkunga 103:8-12) Yehowa ta lolula bantu yonso yina me salaka masumu kana bo balula ntima na masonga yonso, yo vanda bayina me basisaka mavumu.—Nkunga 86:5.

Keti kubasisa divumu kele mbi kana luzingu ya mama to ya mwana kele na kigonsa?

Na kutadila mambu yina Biblia ke tubaka sambu na luzingu ya mwana yina me butuka ntete ve, ata muntu mosi ve lenda tuba nde yandi me basisa divumu sambu yandi ke mona nde sante ya mama to ya mwana ta vanda na kigonsa.

Ebuna nki beto lenda tuba kana na ntangu ya kubuta yo ke lomba nde bo pona kana bo ta gulusa luzingu ya mama to ya mwana? Na diambu yai, lukanu fwete katuka kaka na bantu yina diambu yai ke tadila kana yo ke lomba kugulusa luzingu ya mama to ya mwana.