Nkunga 46:10—“Beno Bika Kunwana mpi Beno Zaba nde Mono Kele Nzambi”

“Beno bika kunwana mpi beno zaba nde mono kele Nzambi. Bo ta kumisa mono na kati ya makanda; bo ta kumisa mono na ntoto.”—Nkunga 46:10, Mbalula ya Nsi-Ntoto ya Mpa.

“Beno vanda pima, mpi beno zaba nde mono kele Nzambi: Mono ta baka lukumu na kati ya mimpani, mono ta baka lukumu na ntoto.”—Nkunga 46:10, Bible ya roi Jacques.

Ntendula ya Nkunga 46:10

Nzambi ke lomba bantu yonso na kusambila yandi mpi na kundima nswa na yandi ya kuyala ntoto ya mvimba. Muntu mosi ve lenda tula ntembe na ngolo mpi na kiyeka na yandi; mpi bantu yonso yina ke zola kuzinga mvula na mvula fwete ndima diambu yai.—Kusonga 4:11.

“Beno bika kunwana mpi beno zaba nde mono kele Nzambi.” Bambalula ya nkaka ya Biblia ke balulaka kitini ya ntete ya verse yai nde “Be vanda pima.” Yo me pusaka bantu ya nkaka na kubakisa yo na mutindu ya mbi nde yo kele ntuma ya ke lomba bantu na kuvanda luzitu to pima na nzo-nzambi. Kansi, bangogo ya Kiebreo yina bo me balula nde “Beno bika kunwana mpi beno zaba nde mono kele Nzambi” kele mambu ya Yehowaa Nzambi yandi mosi ke tuba sambu na kulomba bantu ya makanda yonso na kuyambula kutelamina yandi mpi na kundima nde bo fwete sambila kaka yandi.

Yandi ke lomba beto na kusala mambu ya mutindu mosi na Nkunga 2. Na kapu yina, Nzambi ke sila na kunwanisa bantu yina ke telamina yandi. Kansi, bantu yina ke ndima kiyeka ya Nzambi ke sosaka lutwadisu, ngolo, mpi mayele ya Nzambi sambu yo sadisa bo. Sambu bo “ke tinaka na yandi,” bo ke vandaka na kiese mpi na lutaninu, mingi-mingi na bantangu ya mpasi.—Nkunga 2:9-12.

“Bo ta kumisa mono na kati ya makanda; bo ta kumisa mono na ntoto.” Na ntangu ya ntama, bantu kumisaka Yehowa Nzambi ntangu yandi sadilaka ngolo na yandi sambu na kutanina bansadi na yandi. (Kubasika 15:1-3) Na bilumbu ke kwisa, bantu ta kumisa yandi na kiteso ya nene kuluta ntangu bantu yonso yina ta vanda na ntoto ta ndima kiyeka na yandi mpi ta sambila yandi.—Nkunga 86:9, 10; Yezaya 2:11.

Mambu ya Bo Ke Tubila na Baverse ya Kele na Ntwala mpi na Nima ya Nkunga 46:10

Mukanda mosi ya bantu mingi ke sadilaka ke binga Nkunga 46 “nkunga ya kukumisa ngolo ya Nzambi, muntu ya ngolo ya ke nwaninaka bansadi na yandi.” Ntangu bansadi ya Nzambi vandaka kuyimba Nkunga 46, bo vandaka kumonisa nde bo ke tula ntima na makuki ya Yehowa ya kutanina bo mpi ya kusadisa bo. (Nkunga 46:1, 2) Mambu yina yibusaka bo nde Yehowa vandaka ntangu yonso ti bo.—Nkunga 46:7, 11.

Sambu na kusadisa bansadi ya Yehowa Nzambi na kutula ntima mingi na ngolo na yandi ya kutanina bo, muyimbi-bankunga ke lomba bo na kuyindula bisalu ya ke monisa ngolo na yandi. (Nkunga 46:8) Yandi ke benda dikebi na bo mingi-mingi na makuki ya Nzambi kele ti yo ya kusukisa bitumba. (Nkunga 46:9) Na mutindu mosi buna, Yehowa sukisaka bitumba na ntangu ya ntama na mutindu yandi taninaka bansadi na yandi na makanda yina vandaka bambeni na bo. Kansi, Biblia ke sila nde ntama mingi ve, Nzambi ta sala yo na mutindu ya nene kuluta ntangu yandi ta sukisa bitumba na ntoto ya mvimba.—Yezaya 2:4.

Keti bubu yai Yehowa ke landaka kusadisa bantu ya ke sambilaka yandi? Ee, yandi ke sadisaka bo. Ntumwa Polo siamisaka Bakristu na kutula mpenza ntima nde Nzambi ta sadisa bo. (Baebreo 13:6) Bangindu ya kele na Nkunga 46 ke sadisa beto na kutula ntima mingi na ngolo ya Nzambi kele ti yo ya kutanina beto. Yo ke sadisa beto na kubaka Nzambi bonso “kitininu na beto mpi ngolo na beto.”—Nkunga 46:1.

Tala video yai ya nkufi sambu na kumona na bunkufi mambu yina ke na mukanda ya Bankunga.