Yoane 15:13—“Kuzola ya Kuluta Nene ya Muntu Lenda Vanda na Yo na Ntima Yo Yai”

“Ata muntu mosi ve kele na zola ya nene kuluta yai, nde muntu kupesa luzingu na yandi sambu na banduku na yandi.”—Yoane 15:13, Mbalula ya Nsi-Ntoto ya Mpa.

“Kuzola ya kuluta nene ya muntu lenda vanda na yo na ntima yo yai: kana yandi pesa moyo na yandi sambu na banduku na yandi.”—Yoane 15:13, Bible en Kituba.

Ntendula ya Yoane 15:13

Yezu vandaka kusadisa balongoki na yandi na kuzaba nde bo fwete vanda ti zola ya ngolo mingi sambu yo pusa bo na kundima kufwa sambu na bampangi na bo.

Na verse ya kele na ntwala ya verse yai, Yezu songaka bantumwa nde: “Nsiku na mono yo yai, beno zolana beno na beno mutindu mono me zolaka beno.” (Yoane 15:12) Yezu vandaka ti zola ya nki mutindu sambu na bo? Yandi vandaka kuzola bo na ntima ya mvimba, kukonda bwimi. Ntangu yandi vandaka kulonga awa na ntoto, yandi vandaka kutula bampusa mpi mambote ya balongoki na yandi mpi ya bantu ya nkaka na kisika ya ntete. Yandi belulaka bantu ya maladi mpi longaka bo mambu ya Kimfumu ya Nzambi.a Yandi salaka nkutu bisalu ya kukonda mfunu sambu na kusadisa bantu ya nkaka. (Matayo 9:35; Luka 22:27; Yoane 13:3-5) Kansi na Yoane 15:13, Yezu vandaka kutubila zola ya mingi kuluta. Nkutu, bangunga fioti na nima ya kusonga bo mambu yai, yandi monisaka zola yina ya mingi ntangu yandi pesaka na luzolo yonso “luzingu na yandi bonso nkudulu sambu na bantu mingi.” (Matayo 20:28; 22:39) Yandi monisaka na mutindu ya kuyituka nde yandi vandaka kuzola bantu ya nkaka mingi kuluta mutindu yandi vandaka kudizola.

Yezu ke zolaka bantu. Kansi, yandi ke zolaka mingi kuluta bantu yina ke zitisaka malongi na yandi. Yandi vandaka kubaka balongoki na yandi bonso banduku na yandi ya ngolo sambu bo vandaka kulemfuka na bansiku na yandi mpi sambu bo kangamaka ti yandi na bampasi na yandi. (Luka 22:28; Yoane 15:14, 15) Yo yina, yandi vandaka ti kikuma ya mbote ya kutambika luzingu na yandi sambu na bo.

Bakristu ya mvu-nkama ya ntete sadilaka mambu yai ya Yezu na luzingu na bo, mpi bo vandaka ya kuyilama na kufwa sambu na bampangi na bo. (1 Yoane 3:16) Ya kieleka, zola ya kukonda bwimi, disongidila zola yina Yezu monisaka, zolaka kukuma kidimbu ya ntete-ntete ya kuzabila Bakristu ya kieleka.—Yoane 13:34, 35.

Mambu ya Bo Ke Tubila na Baverse ya Kele na Ntwala mpi na Nima ya Yoane 15:13

Kapu 13 tii na 17 ya mukanda ya Yoane ke tubila bandongisila ya nsuka yina Yezu pesaka bantumwa 11 ya kwikama mpi kisambu ya nsuka yina yandi salaka ti bo. Yandi fwaka ntangu fioti na nima. Na kapu 15, sambu na kupesa mbandu ya ke songa nde balongoki na yandi fwete bikala na bumosi ti yandi sambu na kumonisa nde bo kele mpenza balongoki na yandi, Yezu fwanisaka bo ti mbuma yina ke yela na nti ya vinu. Yandi siamisaka bo na kulanda “kubuta mbuma mingi.” (Yoane 15:1-5, 8) Mutindu mosi ya kusala yo kele kumonisila bantu zola ya kukonda bwimi; zola yango ke tadila mpi kulonga bantu ya nkaka nsangu ya mbote yina Yezu vandaka kulonga, disongidila “nsangu ya mbote ya Kimfumu ya Nzambi.”—Luke 4:43; Yoane 15:10, 17.

Tala video yai ya nkufi sambu na kumona na bunkufi mambu yina kele na mukanda ya Yoane.