Yezaya 26:3—“Nge Ke Pesaka Ngemba Mpenza na Bantu Yina Ke Landaka Kaka Luzolo na Nge”

“Nge ta tanina bantu yina ke yekamaka kibeni na nge; nge ta pesa bo ngemba ya ntangu yonso, sambu bo ke tudilaka nge ntima.”—Yezaya 26:3, Mbalula ya Nsi-Ntoto ya Mpa.

“Nge ke pesaka ngemba mpenza na bantu yina ke landaka kaka luzolo na nge ti kutula nge ntima.”—Yezaya 26:3, Bible en Kituba.

Ntendula ya Yezaya 26:3

Na nsadisa ya mambu yai ya ke bwisa ntima, profete Yezaya ke monisa nde Nzambi ke taninaka bantu yina ke tudilaka yandi ntima ya mvimba. Yandi ke salaka yo na mutindu yandi ke sadisaka bo na kudiwa na lutaninu mpi na ngemba.

“Nge ta tanina bantu yina ke yekamaka kibeni na nge.” Kitini yai ya verse ke tubila bantu yina kele ti lukanu ya ngolo ya kutudila Yehowwaa Nzambi ntima na bantangu yonso. Bantu yina ke tulaka ntima na Nzambi ke zabaka nde bo lenda sala ve ata kima mosi kukonda lusadisu na yandi. Mu mbandu, bo ke tulaka ve ntima na bangindu na bo mosi ntangu bo ke bakaka balukanu ya mfunu. Kansi, bo ke tadilaka bangindu ya Nzambi na mambu yonso ya bo ke salaka. (Bingana 3:5, 6) Sambu na kuzaba mutindu Nzambi ke tadilaka diambu mosi, bo ke tangaka Biblia, Ndinga na yandi, mpi ke yindulaka mingi na mambu yina bo ke tangaka. (Nkunga 1:2; 119:15) Kana bo me kutana ti mambu ya mpasi, bo ke sambaka Yehowa na masonga yonso mpi ke lombaka lusadisu na yandi. (Nkunga 37:5; 55:22) Sambu bo ke salaka mutindu yina, bo ke monisa nde bo ke tulaka ntima na Nzambi, ebuna Nzambi ke pesaka bo ngemba.

“Nge ta pesa bo ngemba ya ntangu yonso.” Na Kiebreo ya kisina, ngogo “ngemba” kele mbala zole sambu na kubula munsonso; yo yina, sambu na kumonisa yo, bo lenda balula bangogo yina nde “ngemba ya ntangu yonso,” “ngemba mpenza,” to “ngemba ya mvimba.” Na kutuba ya nkaka, bantu yina ke tudilaka Yehowa ntima ya mvimba ke vandaka ti ngemba, disongidila pima ya ntima yina ke katukaka ve na mambu ya bo ke kutana ti yo. (Nkunga 112:7; 119:165) Ngemba yai ke katukaka na kinduku ya pene-pene mpi ya ngolo ti Yehowa mpi kana muntu ke salaka ngolo na kusala mambu yina ke pesaka Nzambi kiese.—Bingana 3:32; Yezaya 48:18.

“Ngemba ya ntangu yonso” yai ke tendula ve nde Nzambi ke taninaka bansadi na yandi sambu bo kutana ve ata ti mpasi mosi mpi bo vanda ve na basusi ata fioti. (1 Samuele 1:6, 7; Yobi 6:1, 2; Nkunga 31:9) Kansi, yandi ke sadisaka bo na kukanga ntima na bampasi ya bo ke kutana ti yo. (Yezaya 41:10, 13) Yandi ke pesaka mvutu na bisambu na bo, ke pesaka bo mayele ti ngolo mpi yandi ke lembikaka bo. (Nkunga 94:19; Bingana 2:6; Yezaya 40:29) Yo yina, bo ke vandaka pima ata ntangu bo ke kutana ti mambu ya mpasi.—Bafilipi 4:6, 7.

Mambu ya Bo Ke Tubila na Baverse ya Kele na Ntwala mpi na Nima ya Yezaya 26:3

Profete Yezaya zingaka na mvuka ya nana na ntwala ya ntangu na beto. Bantu mingi ya Yuda ya ntangu yina, mpi ya bamvula yina landaka, vandaka ve kusambila Yehowa Nzambi na kwikama. Yo yina, nsuka-nsuka Yehowa pesaka nzila nde nto-mbanza na bo, Yeruzalemi, bo fwa yo na mvu 607 na ntwala ya ntangu na beto.

Kansi, bamvula kuluta nkama na ntwala ya kufwa yo, Yezaya sonikaka nkunga ya mbikudulu sambu na kukumisa Yehowa; nkunga yango kele na kapu 26. (Yezaya 26:1-6) Nkunga yango vandaka kutendula mambu yina ta salama na bilumbu ke kwisa, ntangu mbanza mosi ya insi ya Yuda, mbala ya nkaka Yeruzalemi, bo zolaka kuyidika yo diaka.

Bo yidikaka diaka Yeruzalemi na bamvula yina vandaka na nima ya mvu 537 na ntwala ya ntangu na beto. Ntangu yo salamaka, Bayuda ya kwikama yina vutukaka na Yeruzalemi lenda kudiwa na lutaninu mpi kutuba nde: “Beto kele ti mbanza mosi ya ngolo.” (Yezaya 26:1) Kansi, bibaka ya ngolo ya mbanza vandaka ve kima yina vandaka kusala nde yo vanda ngolo. Lutaninu ya mbanza vandaka kukatuka na lusakumunu mpi lutaninu ya Yehowa.—Yezaya 26:2.

Yo kele mutindu mosi bubu yai. Bantu yina ke tulaka ntima ya mvimba na Yehowa ke kudiwaka na lutaninu sambu bo ke monaka Yehowa nde yandi kele “Ditadi,” to kisika na bo ya kubumbana.—Yezaya 26:4.

Tala video yai ya nkufi sambu na kumona na bunkufi mambu yina kele na mukanda ya Yezaya.