Kupesa Lusadisu na Ntangu ya ‘Bitumba mpi ya Bansangu ya Bitumba’

Na bilumbu yai ya nsuka, beto ta wa “makelele ya bitumba mpi bansangu ya bitumba.” (Matayo 24:6) Kansi ntangu bampangi na beto ke kutanaka ti bampasi sambu na bitumba yango, bo ke bakaka lusadisu yina bo kele ti yo mfunu. Rapore No. 3 ya Nto-Kimvuka na Mvu 2022 pesaka beto bansangu ya mfunu na yina me tala kisalu ya kusadisa bampangi, yina bampangi salaka na Esti ya Eropa sambu na kusadisa bampangi na beto yina ke niokwama sambu na bitumba ya ke salama na Ukraine. Inki mutindu bampangi ke sadisa bampangi ya nkaka ata bitumba ke salama? Inki mutindu kisalu ya kusadisa bantu me sadisa bampangi na beto na Ukraine?

Inki Bima Vandaka Mfunu? Inki Mutindu Bampangi Nataka Bima Yango?

Na Kiya 24 février 2022, kilumbu bitumba yantikaka na Ukraine, Komite ya Mitambusi ndimaka nde ntalu mosi buna ya mbongo kubasika sambu na kusadisa bampangi na beto na insi yina. Na mbala mosi, komite ya filiale ya Ukraine yantikaka kusumba bima. Bo pesaka yo na Bakomite 27 ya Ke Pesaka Lusadisu na Bantu Yina Me Bwila Mpasi mpi bakomite yai ya bo tulaka, kabulaka bima yango na bampangi.

Sambu na kusadisa komite ya filiale ya Ukraine, bampangi yina ke sadilaka Yehowa na Babiro ya Ke Twadisaka Kisalu ya Bambangi ya Yehowa na Ntoto ya Mvimba yantikaka mbala mosi kusosa kuzaba bima yina bo lenda pesa bampangi. Komite ya Mitambusi mpi Komite ya Bambasisi ya Nto-Kimvuka lombaka Departema ya Ke Talaka Mambu ya Kusumba Bima na Ntoto ya Mvimba na kusala ti mimonisi ya filiale ya Ukraine mpi ya Pologne sambu na kutadila bima yina bampangi ta vanda ti yo mfunu mpi kuyidika mambu sambu na kusadisa bo. Bampangi ya departema ya Kusumba Bima, ya departema ya Kutinda Bima mpi ya departema ya Ke Talaka Mambu ya Bansiku, mpangi mosi ya Komite ya Filiale ya Ukraine mpi bampangi ya Departema ya Ke Talaka Mambu ya Kusumba Bima na Ntoto ya Mvimba vandaka kukutana konso kilumbu sambu na kutwadisa kisalu ya kusadisa bampangi.

Mpangi Jay Swinney ya Departema ya Ke Talaka Mambu ya Kusumba Bima na Ntoto ya Mvimba ke tuba nde: “Kima ya ntete, yo lombaka nde beto zaba bima yina vandaka mfunu. Beto vandaka na mfunu ya kupesa bampangi madia mpi bima ya kutudila bunkete yina bo ke sadilaka dezia. Kansi, kusosa kuzaba bima yina bampangi vandaka ti yo mfunu vandaka kima ya ntete. Yo lombaka mpi nde beto zaba mutindu ya kunata nswalu bima yango na Ukraine na ntangu yai ya bitumba mpi na mutindu yina ta tula ve luzingu na kigonsa.”

Na Kitatu 9 mars 2022, bampangi zabaka bima yina bampangi na beto ya Ukraine vandaka ti yo mfunu. Yo lombaka kupesa bampangi bakarto ya bima ya mfunu mu mbandu, misuni ya bo ke bumbaka na manzanza (viande en conserve), bambisi ya masa, bambuma, loso mpi madesu ti bima ya nkaka ya kutudila bunkete bonso savon mpi bapapie ya twalete. Na ntangu yina, ntalu ya bima yina konso mpangi lenda sadila na mposo mosi vandaka kiteso ya badolare 65. Komite ya Mitambusi monaka nde bampangi na beto mingi ta vanda ti mfunu ya bima yina. Yo yina bo ndimaka nde bampangi kusadila mbongo mingi sambu na kusala badepanse yina mpi kusadisa bampangi. Kansi inki mutindu bampangi na beto lendaka kunatila bampangi yina vandaka ti mfunu ya lusadisu bima yango kukonda kutula luzingu na bo mosi na kigonsa?

Na Lumingu 13 mars, bampangi na beto zole ya babakala ya insi Pologne mekaka ntete kusala nzietelo. Bo katuka na Betele ya Pologne mpi bo nataka bima na nzo mosi ya nene pene-pene ya Lviv na insi Ukraine. Na ntwala nde bo katuka, bampangi yina ke salaka na filiale ya Pologne ti ya Ukraine sadisaka bampangi yina zole na kuyidika nzietelo na bo. Filiale ya Pologne manisaka mambu ya mikanda yina ke pesa nswa na kukota na insi Ukraine sambu na kupesa bantu lusadisu. Bo zikisaka nde bakamio yina bampangi yango vandaka ti yo vandaka ti bidimbu ya ke songaka nde bakamio yango kele bakamio yina ke kwenda kupesa bantu lusadisu. Bo salaka mpi ti bampangi ya Ukraine sambu na kuzaba nzila yina lenda sadisa bo na kukuma nswalu ntangu bo ta kota na Ukraine. Na nsadisa ya kisalu yai ya kuyidika mbote mpi ti lusakumunu ya Yehowa, bampangi yina ya babakala pesaka bima yina bo nataka na Bakomite Yina Ke Sadisaka Bantu Yina Me Bwila Mpasi na mbanza Lviv na nima ya bangunga 24. Na nima, bampangi yango vutukaka kukonda kigonsa na Pologne.

Ata mpila nzietelo yina ya ntete ya bo mekaka kusala lutaka mbote, bampangi nataka bima na nsi ya tone mosi (tone ya Amerika). Kansi yo lombaka kunata diaka batone 220 ya bima (tone ya Amerika). Kansi inki mutindu bampangi zolaka kunata bima mingi mutindu yina mpi kukabula yo na ntangu fioti?

“Bantu na Nge Ta Kudipesa na Luzolo na Bo Mosi”

Ntangu bampangi ya ntoto ya mvimba tangaka barapore yina bo tulaka na jw.org ya vandaka kutubila mutindu bampangi na beto vandaka kumona mpasi na Ukraine, bo sosaka mutindu ya kusadisa bo. Bampangi mingi yina vandaka ntama ti Ukraine pesaka makabu ya mbongo sambu na kupesa maboko na kisalu ya Bambangi ya Yehowa yina ke salamaka na ntoto ya mvimba. Bo zabaka nde organizasio ta sadila makabu na bo na mutindu ya mbote. Kansi bampangi yina ke zingaka pene-pene ti Ukraine pesaka ntangu na bo, ngolo na bo mpi bima na bo sambu na kusadisa bampangi ya Ukraine. Yai kele mwa bambandu:

Na Pologne, bavolontere vukisaka bakarto mingi kibeni ya bima. Ba dessin yina bana salaka na maboko vandaka mpi na kati ya bima yango. Mpangi Bartosz Kościelniak ya ke salaka na Departema ya Ke Talaka Bima ya Kusumba na filiale ya Pologne ke tuba nde: “Na mabaku mingi, mono vandaka kutanga Nkunga 110:3, ya ke tuba nde ‘bantu ya Yehowa ta kudipesa na luzolo na bo mosi. Kansi sesepi, mono me mona na meso na mono mosi mutindu bampangi ke kudipesa ya mvimba. Mono me mona bavolontere mingi yina vandaka ti nzala ya kukwisa kusadisa mpi ya kele ya kuyilama na kusadisa. Mambu yai monisaka mono nde bangogo yai vandaka kibeni ya masonga.’”

Mpangi na beto mosi Mbangi ya Yehowa yina ke vandaka ti kompani mosi ya transpore ya ke vandaka ti bakamio ya ke kwendaka na bansi mingi na ntoto ya mvimba pesaka bakamio na yandi ti karbira. Yandi ke tuba nde: “Sambu na mono, yo kele dibaku ya mbote sambu na kumonisa nde mono ke zolaka bampangi mpi Yehowa. Mono kele na kiese mingi ya kusadisa bampangi.” Dikabu ya karbira yina bampangi pesaka vandaka balitre kuluta 7 700. Bampangi pesaka mpi ntangu ti ngolo na bo sambu na kusala nzietelo yina. Bo salaka bakilometre kiteso ya 48 000 sambu na kumanisa kunata bima yonso.

Na nsadisa ya kisalu ya luzolo mpi ya zola ya bampangi na beto, na Kintete 28 mars, disongidila bilumbu 15 na nima ya nzietelo ya ntete yina bampangi salaka, bampangi nataka na Ukraine batone 110 ya madia, bima ya kutudila bunkete mpi bankisi. Makabu ya luzolo ya bampangi ti bima na bo ya nkaka me sala nde, beto basisa ve mbongo mingi na mbongo yina beto vandaka ti yo mfunu sambu na kusadisa bampangi na Ukraine. Tii na kilumbu ya bubu, Bambangi ya Yehowa me tinda dezia batone (tone ya Amerika) ya bima kuluta 209 sambu na kusadisa bampangi na Ukraine. Inki mutindu bima yai sadisaka bampangi na beto?

“Zola na Beno Vandaka mpi na Kati!”

Ntangu bakarto yina ya bima kumaka na Lviv, Bakomite Yina Ke Pesaka Lusadisu na Bantu Yina Me Bwila Mpasi kabulaka yo na bampangi yina vandaka ti mfunu ya lusadisu na insi Ukraine. Bo kabulaka bakoli yango ya bima na bambanza ya kuswaswana. Bambanza ya nkaka vandaka na bakilometre kuluta 1 300 ti Lviv. Ata kisalu yai lutaka na mutindu ya mbote, yo bakaka ntangu mingi.a

Mpangi Markus Reinhardt ya Komite ya Filiale ya Ukraine ke tuba nde: “Na ntangu yai ya mpasi, bampangi na beto mingi me mona bo mosi nde Yehowa ke zolaka bo mpi nde yo kele kibeni mfunu na kulemfuka na lutwadisu yina organizasio ya Yehowa ke pesaka, yo vanda na ntwala nde kisumbula mosi kusalama. Mu mbandu, organizasio ke siamisaka konso muntu na kuvanda ti madia mpi masa ya kufwana na nzo, ya yandi lenda sadila bamposo mingi. Na kutadila ntuma yai, nkuluntu mosi na zina ya Anton yina ke sadilaka Yehowa na Kiev ke tuba nde: ‘Beto ke pesa organizasio ya Yehowa mersi sambu yo ke sadisaka beto na kuyilama sambu na mambu ya mpasi. Kuvanda ti mwa madia mpi masa ti radio me gulusaka beto.’ Beto ke pesa bampangi yina lemfukaka na ntuma yai mersi sambu biro ya filiale zwaka ntangu ya kuyidika kisalu ya kupesa bampangi lusadisu.”

Inki mutindu bampangi na beto waka ntangu lusadisu yai kuminaka bo? Mpangi Mykola ti mpangi Zinaida yina ke zingaka na Kharkiv tubaka nde: “Dikebi na beno me simba ntima na beto. Mersi mingi sambu na madia mpi bankisi. Ya kieleka, beto me mona diboko ya Yehowa ke lungisa bampusa na beto.” Mpangi Valentyna ke zingaka mpi na mbanza yango. Yandi ke tuba nde: “Banda bitumba yantikaka, bantu vandaka kutula bandonga ya nda sambu na kusumba bima. Yo vandaka ve pete na kusumba bima yina beto vandaka ti yo mfunu. Kansi Yehowa zabaka mpasi na beto mpi yandi monaka yo. Yandi ponaka bampangi sambu na kukabudila beto bima na banzo na beto mpi bakoli yango vandaka ti bima yina beto vandaka ti yo kibeni mfunu. Na bantangu ya mpasi ya mutindu yai, ntangu kivuvu ke vandaka ve, beto ke monaka mutindu Yehowa mpi organizasio na yandi ke tudilaka beto dikebi na mutindu ya nkaka. . . Beto kele na kiese ya kumona mutindu Yehowa me sadisa beto na ntangu ya me fwana.”

Mpangi Yevhen, mpangi Iryna mpi mpangi Mykyta yina tinaka mbanza Marioupol ke tuba nde: “Beto ke pesa beno mersi mingi sambu na dikebi na beno mpi lusadisu na beno sambu na dibuta na beto. Beno ndimila beto. Lusadisu yina kwisaka na ntangu ya mbote kibeni. Beno me zaba, beto yindulaka ntete nde na bakoli yai, bima mpamba vandaka na kati. Kansi ntangu beto kangulaka yo, beto monaka nde zola na beno vandaka mpi na kati!”

Ntembe kele ve nde Yehowa sadilaka mpeve santu na yandi sambu na kutwadisa bansadi na yandi na mpila nde bo natila bampangi lusadisu yai ya ke monisa zola na ntangu ya ‘bitumba mpi ya bansangu ya bitumba.’ Makabu ya luzolo yina beno ke pesaka sambu na kisalu yina ke salamaka na ntoto ya mvimba salaka mpi nde, bampangi kukuka kusala mambu yai. Beno ke pesaka mingi ya makabu yango na nzila ya Internet na donate.jw.org. Beto ke pesa beno mersi mingi sambu na kikalulu na beno ya kukaba.

Kusadisa Bampangi Nswalu Kukonda Kutula Luzingu na Kigonsa

1. 

   24 février 2022: Komite ya Mitambusi me ndima nde bampangi kubasisa mbongo sambu na kusadisa bampangi ya Ukraine, yo sadisaka filiale na kuyantika kupesa bampangi lusadisu

2. 

   24 février–8 mars 2022: Betele ya Ukraine me sumba mwa bima na insi na bo mpi me pesa yo na Bakomite Yina Ke Sadisaka Bantu Yina Me Bwila Mpasi sambu na kukabudila bampangi. Biro ya filiale yantikaka mpi kudibongisa sambu na kuyamba bima yina ta katuka na Pologne mpi kukabula yo

3. 

   9 mars 2022: Komite ya Mitambusi me ndima nde bo natila bampangi ya Ukraine bima

4. 

   10 mars 2022: Bampangi me yidika mambu sambu na kumeka kusala nzietelo ya ntete ya kukatuka na Pologne mpi kukwenda kubika madia ti bima ya nkaka na Lviv na insi Ukraine

5. 

   13 mars 2022: Bampangi me katuka na Pologne mpi me kwenda ti madia mpi bima ya nkaka na Lviv na insi Ukraine

6. 

   14-16 mars 2022: Na Nzo mosi ya Balukutakanu ya Nene ya kele pene-pene ti Poznan na Pologne, bavolontere ya Kisalu ya Kutunga kele ya kuyilama sambu na kuvukisa bakoli ya madia mpi ya bima ya kutudila bunkete

7. 

   17 mars 2022: Bilumbu iya na nima ya kukwenda kubika bima yango kukonda mpasi, bampangi me yantika kunata batone 14 (tone ya Amerika) ya bakoli na ndilu ti insi Ukraine

8. 

   21-27 mars 2022: Bampangi salaka mambu mutindu mosi, bo vukisaka bakoli yina bikalaka na Pologne, bo nataka yo na Ukraine mpi bo kabulaka yo na bangunga 24 na bisika yina bampangi vandaka ti mfunu ya lusadisu

9. 

   28 mars 2022: Bilumbu 20 na nima ya kubaka nswa, bo natilaka bampangi ya Ukraine batone (tone ya Amerika) 110 ya madia, ya bima ya kutudila bunkete mpi ya bankisi sambu na kusadisa bo

Tii bubu, Bambangi ya Yehowa me tinda dezia batone 209 (tone ya Amerika) ya bima sambu na kusadisa bampangi na Ukraine.