Bo Me Vila Ve Bifwa-Makutu

Yehowa Nzambi ke zolaka nde bantu yonso kuzaba yandi mpi Kimfumu na yandi yina kele na zulu yo vanda luzingu ya bantu yango kele nki mutindu. (1 Timoteo 2:3, 4) Yo yina, Bambangi ya Yehowa ke basisaka Babiblia mpi mikanda yina ke sadisaka na kulonguka Biblia sambu na kusadisa bantu mingi, yo vanda bifwa-makutu. Organizasio na beto me basisaka mikanda mingi ya bavideo na ndinga ya bidimbu.a Mikanda yango kele na bandinga ya bidimbu kuluta 100. Inki mutindu beto ke salaka mikanda yango mpi beto ke kabulaka yo? Bamvula mingi na nima, inki mambu beto me yidikaka?

Inki Mutindu Beto Ke Salaka Bavideo na Ndinga ya Bidimbu?

Bimvuka ya bampangi ya ke salaka kisalu ya kubalula na ntoto ya mvimba bantu ke salaka mikanda na ndinga ya bidimbu. Bampangi ya konso kimvuka ke longukaka mbote-mbote mukanda ya bo ke zola kubalula. Na nima, bo ke sosaka mutindu ya mbote ya kubalula yo na ndinga ya bidimbu. Na nima ya kubalula yo, bo ke salaka video na yo. Bilumbu yai, bimvuka 60 ya bambaludi ke balulaka ntangu yonso mikanda yina ke sadisaka na kulonguka Biblia na ndinga ya bidimbu, mpi bimvuka ya nkaka 40 ke salaka yo na kutadila ntangu na bo.

Na bamvula ya me luta, kusala bavideo na ndinga ya bidimbu vandaka kulomba mbongo mingi. Bakamera sambu na kusala bavideo mpi baapareyi ya nkaka vandaka ntalu mingi kuluta bubu. Katula yo, beto vandaka kusala bavideo na kati ya bastidio. Beto mosi bantu vandaka kutunga bastidio yango, mpi bantangu ya nkaka beto vandaka kuyidika banzo yina vandaka dezia ya kutunga sambu na kukumisa yo bastidio. Yo vandaka kulomba mbongo ya badolareb kuluta 30 000 sambu konso kimvuka ya ndinga ya bidimbu kuvanda ti baapareyi ya kusadila bavideo.

Sambu na kusadila makabu ya luzolo na mutindu ya mbote, organizasio na beto sosaka mitindu ya kuyidika mpi ya kukumisa pete kisalu ya kubalula na ndinga ya bidimbu. Beto me sadila baapareyi ya bilumbu na beto ya ke sala mbote kansi ya kele ve ntalu. Na kisika ya kusadila stidio, bimvuka ya bambaludi lenda yidika bo mosi kisika ya kusadila bavideo mpi bo lenda tula lele mosi ya vert na nima na babiro na bo mosi sambu na kusala bavideo. Kana bo kele na mfunu ya bantu mingi sambu na kusala bidimbu, bampangi-babakala mpi bankento lenda kotisa bo mosi bitini ya mukanda ya bo ke balula katuka na babiro na bo to na banzo na bo; bo ke vandaka diaka ve na mfunu ya kukwenda na stidio.

Beto me basisaka mpi baprograme yina ke sadisaka bantu ya ke salaka bidimbu na kusala kisalu na bo. Baprograme yai me salaka nde bimvuka ya bambaludi kubaka ve ntangu mingi sambu na kubasisa mukanda mosi buna na ndinga ya bidimbu mutindu yo vandaka ntete. Bampangi na beto ke sepelaka ti mambu yai ya beto me yidikaka. Mpangi mosi na zina ya Alexander ke tuba nde: “Bavideo na ndinga ya bidimbu me kumaka kubasika mingi kuluta na ntwala. Mono kele na kiese mingi sambu na yo. Mono ke talaka bavideo yango konso kilumbu.”

Na bilumbu na beto, bisadilu yina konso kimvuka ya bambaludi ke sadilaka ke bakaka mbongo na nsi ya 5 000 dolare. Yo me salaka nde beto vanda ti makuki ya kubasisa bavideo na bandinga mingi ya bidimbu.

Inki Mutindu Beto Ke Kabulaka Bavideo na Ndinga ya Bidimbu?

Kana kimvuka mosi ya bambaludi me manisa kusala video ya mukanda mosi buna na ndinga ya bidimbu, beto ke tindaka yo na bampangi yina ke sadilaka yo. Na bamvula ya me luta, beto vandaka kusala bakaseti ya bavideo yango mpi ba DVD. Kansi yo vandaka ntalu, yo vandaka kubaka ntangu mingi mpi yo vandaka kisalu mosi ya ngolo. Beto vandaka kutinda bakaseti mpi ba DVD yango na kompani mosi ya nganda sambu bo basisa yo mingi. Na nima, beto vandaka kutinda bakaseti yina mpi ba DVD na mabundu. Na 2013 mpamba, beto basisaka mbongo kuluta 2 000 000 ya badolare sambu na kusala ba DVD na ndinga ya bidimbu.

Bifwa-makutu vandaka kusepela mingi ti madia yina ya kimpeve. Kansi bavideo yina vandaka ve pete na kusadila, mingi-mingi ntangu bakaseti mpi ba DVD kumaka mingi. Bantangu ya nkaka, yo vandaka kulomba kusadila ba DVD mingi sambu na kusala video ya mukanda mosi ya Biblia. Mpangi Gilnei na Brésil ke yibuka nde: “Kana beto ke zola kutanga verse mosi, yo vandaka kulomba nde beto sosa-sosa ntete kaseti ya mbote sambu na kuzwa verse yango. Yo vandaka mpasi kibeni.” Mpangi-nkento mosi na zina ya Rafayane vandaka mpi kusadila ba DVD na ndinga ya bidimbu. Yandi ke tuba nde: “Kulonguka na mono mosi vandaka kulembisa mono. Beto vandaka kulutisa ntangu mingi na kusosa baverse mpi bareferansi.” Mpi ntangu bampangi vandaka kubasika na kisalu ya kulonga nsangu ya mbote, mbala mingi bo vandaka kunata ba DVD to bakaseti ya bavideo sambu na kusadila yo na batelevizio ya bantu yina vandaka kusepela ti nsangu. Bampangi-babakala ya nkaka nkutu vandaka kunata baapareyi yina vandaka kusadisa na kutala DVD. Kansi ntangu fioti na nima, baapareyi yina vandaka kusadisa na kutala DVD yina muntu lenda nata na maboko basikaka. Yo vandaka ti mwa televizio mpi bampangi mingi kumaka kusadila yo. Mpangi Bobby yina ke zingaka na États-Unis ke tuba nde: “Na nima ya kusonga muntu verse mosi, kana nge ke zola kusonga yandi verse ya nkaka, yo vandaka kulomba kutula DVD ya nkaka. Yo vandaka kubaka ntangu mingi mpi yo vandaka kupesa mpasi sambu na kusadila Biblia ntangu nge ke solula ti muntu.”

Na 2013, organizasio ya Yehowa basisaka aplikasio JW Library Sign Language. Aplikasio yai ke sadisaka bampangi na kubaka bavideo na ndinga ya bidimbu na Internet mpi na kutala yo na batelefone to na ba tablette na bo. Bo basisaka aplikasio yai ntete sambu na Ndinga ya Bidimbu ya Amerika. Na nima na 2017, bo yidikaka diaka aplikasio yango sambu bantu kukuma kusadila yo na bandinga ya bidimbu ya bansi yonso. Bampangi na beto na ntoto ya mvimba vandaka na kiese ya mingi. Mpangi-bakala Juscelino ke zingaka na Brésil. Yandi ke tuba nde: “Mono vandaka kundima ve. Mono vandaka kaka kuyindula mutindu Nto-Kimvuka monisaka nde bo ke zolaka beto bantu ya me fwaka makutu mpi nde bo ke zola nde beto landa kuyela na kimpeve kaka bonso bantu yina ke tubaka. Mono vandaka na kiese ya mingi, mpi aplikasio yina pesaka mono kikesa ya kulonguka diaka Biblia mingi.”

Bubu beto ke basisaka bavideo yonso yina bo ke sadilaka na baapareyi na ndinga ya bidimbu mpi beto ke kabulaka yo na nzila ya site Internet na beto mpi na aplikasio JW Library Sign Language. Yo me salaka nde, beto balula mikanda na ndinga ya bidimbu, beto sala bavideo mpi beto kabula yo na nima ya bilumbu fioti mpamba na kisika ya bangonda to ya bamvula. Yo yina, mikanda mingi ya bandinga ya bidimbu ke basikaka nzila mosi na mikanda ya bo ke sadilaka bantu yina ke tubaka.

Beto tala mambu yina bampangi na beto ya nkaka ya me fwaka makutu ke tuba. Mpangi-nkento Klízia ke tuba nde: “Organizasio ke kudibanzaka mingi sambu na bifwa-makutu na yina me tala mutindu ya kupesa beto kukonda mpasi madia ya kimpeve sambu lukwikilu na beto kulanda kuvanda ngolo. Beto lenda fwanisa ve ata kima mosi na ntoto ti mambu yina organizasio ya Yehowa ke salaka sambu na beto.” Vladimir ke tuba nde: “Bavideo yai ke monisaka mono nde Yehowa ke tudilaka bantu yina me fwaka makutu dikebi kaka mutindu yandi ke salaka sambu na bantu yina ke waka.”

Mbala mingi, bavideo na beto na ndinga ya bidimbu ke vandaka ti nsa yai: “Bo me basisa mukanda yai sambu na kulonga bantu Biblia na ntoto ya mvimba. Makabu ya luzolo ya mbote ya bantu ke pesaka ke sadisaka sambu kisalu yai kulanda kusalama.” Beto ke pesa beno mersi sambu na makabu na beno ya luzolo. Bantu mingi ke pesaka makabu yango na nzila ya Internet na donate.jw.org. Makabu yai ke pesa beto makuki ya kusala Babiblia mpi mikanda yina ke sadisaka na kulonguka Biblia sambu na kusadisa bantu yonso, ata bayina ke sadilaka ndinga ya bidimbu.