Yeremia

27 Na luyantiku ya luyalu ya Yehoyakimi mwana ya Yoziasi, ntotila ya Yuda, yai mambu yina katukaka na Yehowa mpi kwisilaka Yeremia: 2 “Yehowa me songa mono nde, ‘Kudisadila bansinga mpi banti ya vangu, mpi tula yo na nkingu na nge. 3 Na nima tindila yo ntotila ya Edomi,+ ntotila ya Moabi,+ ntotila ya bantu ya Amoni,+ ntotila ya Tire,+ mpi ntotila ya Sidoni+ na maboko ya binati-nsangu yina me kwisa kutala Sidikiya ntotila ya Yuda na Yeruzalemi. 4 Songa bo mambu yai sambu na bamfumu na bo:

“‘“Yai mambu yina Yehowa ya makesa, Nzambi ya Izraele, ke tuba; beno fwete tubila bamfumu na beno nde, 5 ‘Mono muntu salaka ntoto, bantu, ti bambisi yina kele na zulu ya ntoto na ngolo na mono ya nene mpi na diboko na mono ya kutandula; mpi mono me pesaka yo na konso muntu yina mono me zola.*+ 6 Mpi ntangu yai, mono me pesa bansi yai yonso na maboko ya nsadi na mono Nebukadenezare+ ntotila ya Babilone; mono me pesa yandi ata bambisi ya mfinda sambu yo sadila yandi. 7 Makanda yonso ta sadila yandi, mwana na yandi, mpi mutekolo na yandi tii kuna ntangu ta lunga sambu na insi na yandi+ ntangu makanda mingi mpi bantotila ya nene ta kumisa yandi mpika na bo.’+

8 “‘“‘Kana dikanda to kimfumu mosi kubuya kusadila Nebukadenezare ntotila ya Babilone mpi kubuya kutula nkingu na yo na nsi ya vangu ya ntotila ya Babilone, mono ta pesa dikanda yina ndola na mbele ya bitumba,+ na nzala, mpi na kipupa,’* Yehowa muntu me tuba, ‘tii kuna mono ta manisa bo na maboko na yandi.’

9 “‘“‘Yo yina, beno wila ve bambikudi na beno, banganga-ngombo na beno, bantu na beno yina ke lalaka bandosi, bantu na beno ya mazi, mpi banganga-nkisi na beno, yina ke tubila beno nde: “Beno ta sadila ve ntotila ya Babilone.” 10 Sambu bo ke bikudila beno mambu ya luvunu, yo yina bo ta nata beno ntama ti insi na beno mpi mono ta panza beno ebuna beno ta fwa.

11 “‘“‘Kansi dikanda yina ta tula nkingu na yo na nsi ya vangu ya ntotila ya Babilone mpi ta sadila yandi, mono ta pesa yo nzila ya kubikala* na insi na yo,’ Yehowa muntu me tuba, ‘sambu na kukuna yo mpi kuzinga na kati na yo.’”’”

12 Mono tubilaka mpi Sidikiya+ ntotila ya Yuda mutindu mosi nde: “Beno tula bankingu na beno na nsi ya vangu ya ntotila ya Babilone mpi beno sadila yandi ti bantu na yandi, ebuna beno ta bikala na luzingu.+ 13 Sambu na nki nge ti bantu na nge beno fwete fwa na mbele ya bitumba,+ na nzala,+ mpi na kipupa,+ mutindu Yehowa tubaka sambu na dikanda yina ta sadila ve ntotila ya Babilone? 14 Beno wa ve mambu ya bambikudi yina ke tubila beno nde, ‘Beno ta sadila ve ntotila ya Babilone,’+ sambu bo ke tubila beno mambu ya luvunu.+

15 “‘Sambu mono me tinda bo ve,’ Yehowa muntu me tuba, ‘kansi bo ke bikula mambu ya luvunu na zina na mono, yo yina mono ta panza beno mpi beno ta fwa, beno ti bambikudi yina ke bikudila beno.’”+

16 Mpi mono tubilaka banganga-nzambi ti bantu yai yonso nde: “Yehowa ke tuba nde, ‘Beno wa ve mambu ya bambikudi na beno yina ke tubila beno nde: “Tala! Ntama mingi ve,+ bo ta kwisa kuvutula bisadilu ya nzo ya Yehowa katuka na Babilone!” sambu bo ke bikudila beno mambu ya luvunu.+ 17 Beno wila bo ve. Beno sadila ntotila ya Babilone ebuna beno ta bikala na luzingu.+ Sambu na nki mbanza yai fwete kuma mayumbu? 18 Kansi kana bo kele bambikudi mpi kana ndinga ya Yehowa kele na bo, pardo bika bo bondila Yehowa ya makesa sambu bo nata ve na Babilone bisadilu yina me bikala na nzo ya Yehowa, na nzo ya ntotila ya Yuda, mpi na Yeruzalemi.’

19 “Sambu yai mambu yina Yehowa ya makesa ke tuba sambu na makunzi,+ Nzadi-Mungwa,*+ bapusu-pusu,+ mpi bisadilu yina me bikala na mbanza yai, 20 yina Nebukadenezare ntotila ya Babilone nataka ve ntangu yandi bakaka Yekonia mwana ya Yehoyakimi, ntotila ya Yuda, na Yeruzalemi mpi nataka yandi na Babilone, kumosi ti bantu ya lukumu ya Yuda mpi ya Yeruzalemi;+ 21 ee, yai mambu yina Yehowa ya makesa, Nzambi ya Izraele, ke tuba sambu na bisadilu yina me bikala na nzo ya Yehowa, na nzo ya ntotila ya Yuda, mpi na Yeruzalemi: 22 ‘“Bo ta nata yo na Babilone,+ mpi yo ta bikala kuna tii na kilumbu yina mono ta tudila yo dikebi,” Yehowa muntu me tuba. “Na nima mono ta baka yo diaka mpi ta vutula yo na kisika yai.”’”+