Yeremia
47 Yai mambu yina Yehowa tubilaka mbikudi Yeremia sambu na bantu ya Filistia,+ na ntwala nde Farao kufwa Gaza. 2 Yehowa ke tuba nde:
“Tala! Bamasa ke kwisa katuka na nordi.
Yo ta kuma masa ya ngolo ya ke dindisa.
Ebuna yo ta dindisa insi mpi bima yonso yina kele na kati na yo,
Mbanza mpi bantu yina ke zingaka kuna.
Bantu ta tula milolo,
Mpi konso muntu yina ke zingaka na insi yina ta dila.
3 Na makelele ya maboto ya bampunda na yandi,
Na makelele ya bapusu-pusu na yandi ya bitumba
Mpi na makelele ya makulu ya pusu-pusu na yandi,
Batata ta baluka nkutu ve sambu na bana na bo,
Sambu maboko na bo ta lemba,
4 Sambu kilumbu yina ke kwisa ta fwa bantu yonso ya Filistia;+
Yo ta fwa konso nsadisi yina me bikala na Tire+ mpi na Sidoni.+
Sambu Yehowa ta fwa bantu ya Filistia,
Yina kele bantu ya me bikala na bantu yina katukaka na kisanga ya Kaftore.*+
5 Dibandi* ta kwisa na Gaza.
Bo me kangisa Ashkeloni munoko.+
6 A! Mbele ya bitumba ya Yehowa!+
Tii nki ntangu nge ta vanda ve pima?
Vutuka na poshi na nge.
Pema mpi vanda pima.
7 Inki mutindu yo lenda vanda pima
Na ntangu Yehowa me pesa yo nsiku?
Sambu na Ashkeloni mpi lweka ya masa ya nzadi-mungwa,+
Yandi me tula yo sambu yo vanda kuna.”