Ezekiele

25 Ndinga ya Yehowa kwisilaka mono diaka nde: 2 “Mwana ya muntu, balula luse na nge na ndambu ya bantu ya Amoni+ mpi bikula mambu ya mbi sambu na bo.+ 3 Nge fwete tuba sambu na bantu ya Amoni nde, ‘Beno wa ndinga ya Yehowa Mfumu ya Kuluta Nene. Yehowa Mfumu ya Kuluta Nene me tuba nde: “Sambu nge tubaka nde ‘Aa!’ sambu na kisika na mono ya santu ntangu bo vwezaka yo, sambu na insi ya Izraele ntangu yo bikalaka ya mpamba, mpi sambu na nzo ya Yuda ntangu bo nataka bo na insi ya nzenza, 4 mono ke pesa nge na bantu ya Esti bonso kima na bo. Bo ta sala bacamp na bo* na kati na nge mpi ta tedimisa batenta na bo na kati na nge. Bo ta dia bambuma na nge mpi bo ta nwa miliki* na nge. 5 Mono ta kumisa Raba+ nseke ya kudisa bashamo, mpi insi ya bantu ya Amoni kisika ya kupema sambu na bitwisi; ebuna beno ta zaba nde mono kele Yehowa.”’”

6 “Yehowa Mfumu ya Kuluta Nene me tuba nde: ‘Sambu nge bulaka maboko na nge,+ nge bulaka makulu na nge na ntoto, mpi nge* waka kiese sambu na insi ya Izraele ti kuvweza ya ngolo ya mutindu yai,+ 7 mono ta tandula diboko na mono sambu na kupesa nge ndola mpi kupesa nge na makanda bonso kima ya bo me botula. Mono ta katula nge na kati ya bantu mpi ta fwa nge na kati ya bansi.+ Mono ta manisa nge, ebuna nge ta zaba nde mono kele Yehowa.’

8 “Yehowa Mfumu ya Kuluta Nene me tuba nde: ‘Sambu Moabi+ mpi Seire+ me tuba nde, “Tala! Nzo ya Yuda kele bonso makanda yonso ya nkaka,” 9 mono ke monisa pwelele lweka* ya Moabi na ndambu yina kele bambanza na yandi yina kele na ndilu, kitoko ya insi na yandi, Bete-yeshimoti, Baale-meoni, tii na Kiriatayimi.+ 10 Mono ta pesa yo kumosi ti bantu ya Amoni na bantu ya Esti+ bonso kima na bo, mpidina bantu ta yibuka ve bantu ya Amoni na kati ya makanda.+ 11 Mono ta pesa ndola na kati ya Moabi,+ ebuna bo ta zaba nde mono kele Yehowa.’

12 “Yehowa Mfumu ya Kuluta Nene me tuba nde: ‘Edomi me pesa nzo ya Yuda ndola sambu na kuvutula mbi mpi me nata kifu ya nene na mutindu yandi me vutudila bo mbi;+ 13 yo yina, Yehowa Mfumu ya Kuluta Nene me tuba nde: “Mono ta tandula mpi diboko na mono sambu na kupesa Edomi ndola, mono ta katula muntu ti bitwisi na kati na yo, mpi mono ta sala nde yo bikala ya mpamba.+ Katuka na Temani tii na Dedani, bo ta bwa na mbele ya bitumba.+ 14 ‘Mono ta vutula mbi na Edomi na nzila ya bantu na mono Izraele.+ Bo ta nata makasi na mono mpi nganzi na mono na Edomi, mpidina bo ta mona mutindu mono ke vutulaka mbi,’+ Yehowa Mfumu ya Kuluta Nene muntu me tuba.”’

15 “Yehowa Mfumu ya Kuluta Nene me tuba nde: ‘Sambu na kimbeni na bo ya ke manaka ve, bantu ya Filistia sosaka na nku yonso* na kuvutula mbi mpi kunata lufwa.+ 16 Yo yina, Yehowa Mfumu ya Kuluta Nene me tuba nde: “Tala! Mono ke tandula diboko na mono sambu na kunwanisa bantu ya Filistia,+ mpi mono ta katula bantu ya Kereti+ mpi ta fwa bantu yina ta bikala, bayina ke zingaka na lweka ya nzadi-mungwa.+ 17 Mono ta sala mambu ya nene sambu na kuvutudila bo mbi mpi kupesa bo bandola ya ngolo, ebuna bo ta zaba nde mono kele Yehowa ntangu mono ta vutudila bo mbi.”’”