BANGIUFULA YINA BALEKE KE KUDIYULAKA
Sambu na Nki Mono Fwete Samba?
Baleke mingi ke tubaka nde bo ke sambaka kansi bo ke salaka yo ve konso kilumbu. Bamingi ke kudiyulaka nde: ‘Keti kisambu ke sadisaka kaka na kudiwa mbote to yo kele mpenza mfunu?’
Kisambu kele nki?
Kusamba kele kusolula ti Muntu yina salaka bima yonso. Yindula fioti diambu yai! Yehowa me luta bantu na mambu yonso kansi “yandi kele ntama ve ti konso muntu na kati na beto.” (Bisalu 17:27) Nkutu Biblia ke tuba nde: “Beno kwenda pene-pene na Nzambi, ebuna yandi ta kwisa pene-pene na beno.”—Yakobo 4:8.
Inki mutindu nge lenda kwenda pene-pene na Nzambi?
Mutindu ya ntete kele kusamba. Yo ta sadisa nge na kusonga Nzambi mambu na nge.
Mutindu ya zole kele kulonguka Biblia. Yo ta sadisa nge na kuwa mambu yina Nzambi ke “tuba.”
Kusamba mpi kulonguka Biblia ta sadisa nge na kusala kinduku ya ngolo ti Nzambi.
“Kusolula ti Yehowa, Muntu ya Kuluta Zulu kele dibaku ya kuluta nene yina bantu ke vandaka ti yo.”—Jeremy.
“Kusonga Yehowa mutindu mono ke kudiwa ke sadisaka mono na kudiwa pene-pene na yandi.”—Miranda.
Nzambi ke waka bisambu?
Ata nge ke kwikilaka na Nzambi mpi ata nge ke sambaka yandi, yo lenda vanda mpasi na kundima nde yandi ke waka bisambu. Kansi Biblia ke bingaka Yehowa nde “Muntu ya ke waka kisambu.” (Nkunga 65:2) Nkutu Biblia ke lomba nge na ‘kulosa basusi na nge yonso na yandi.’ Sambu na nki? “Sambu yandi ke kudibanzaka sambu na [nge].” —1 Piere 5:7.
Mambu ya nge fwete yindula: Nge ke solulaka ti nduku na nge ya ntima mbala na mbala? Nge lenda sala mpi mutindu yina ti Nzambi. Samba yandi mbala na mbala mpi sadila zina na yandi Yehowa. (Nkunga 86:5-7; 88:9) Ee, Biblia ke lomba nge na ‘kusamba ntangu yonso.’—1 Batesalonika 5:17.
“Na kisambu mono ke solulaka ti Tata na mono ya zulu mpi mono ke songaka yandi mambu yonso ya kele na ntima na mono.”—Moises.
“Mono ke songaka Yehowa binsweki na mono kaka mutindu mono ke songaka mama to nduku na mono ya ngolo.”—Karen.
Mono lenda samba sambu na nki mambu?
Biblia ke tubaka nde: “Na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba.”—Bafilipi 4:6.
Keti yo ke tendula nde yo kele mbi ve na kusonga Nzambi bampasi na nge? Ee! Sambu Biblia ke tubaka nde: “Losila Yehowa kizitu na nge, ebuna yandi ta sadisa nge.”—Nkunga 55:22.
Ya kieleka ntangu nge ke samba, nge fwete suka ve kaka na kusonga Nzambi bampasi na nge kansi nge fwete songa yandi mambu mingi. Leke mosi ya nkento Chantalle ke tuba nde: “Nge ta vanda ve nduku ya mbote ya Yehowa kana nge ke samba yandi kaka sambu yandi sadisa nge. Mono ke yindula nde mono fwete pesa yandi ntete mersi. Diaka, mambu yina ke pusa mono na kupesa yandi mersi fwete vanda mingi.”
Mambu ya nge fwete yindula: Inki ke pusaka nge na kupesa Nzambi mersi? Nge lenda yindula bima tatu yina lenda pusa nge na kupesa Yehowa mersi bubu yai?
“Ata diambu mosi ya fioti mu mbandu, kutala kintuntu mosi ya kitoko, lenda pusa beto na kupesa Yehowa mersi na kisambu.”—Anita.
“Yindula kima mosi ya Nzambi me salaka yina ke sepedisaka nge to verse mosi ya Biblia yina ke simbaka mpenza ntima na nge. Na nima, pesa Yehowa mersi sambu na yo.”—Brian.