Keti nge me bakaka dezia dibanza ya kutanga Biblia kansi nge vutukaka nima sambu nge yindulaka bonso bantu yai ya beto me katuka kutubila? Sambu na bantu mingi, kutanga Biblia ke lembisaka nitu. Ebuna kana bo zabisa nge nde Biblia lenda sadisa nge na kuvanda ti luzingu mosi ya mbote mpi ya kiese? Ebuna kana bo songa nge nde kele ti bametode yina lenda sadisa nge na kutanga yo na mutindu yina lenda sepedisa nge? Keti nge ta zola kuzaba mambote yina Biblia lenda natila nge?

Beto tadila mambu yina bantu ya nkaka me tubaka sambu na mambote yina bo bakaka ntangu bo yantikaka kutanga Biblia.

Ezekiel yina me katuka kulungisa bamvula 20 ke tuba nde: “Mono vandaka ntete bonso muntu yina ke nata kamio kukonda kuzaba kisika yandi ke kwenda. Kansi kutanga Biblia me sadisaka mono na kuvanda ti luzingu mosi ya mbote. Yo kele ti bandongisila ya mbote yina mono lenda sadila konso kilumbu.”

Frieda, yina me katuka mpi kulungisa bamvula 20, ke tuba nde: “Mu vandaka kusala mambu kukonda kuyindula. Kansi kutanga Biblia me sadisaka mu na kudiyala mpi na kuwakana mbote ti bantu. Yo yina bubu yai mu me kumaka ti banduku mingi.”

Nkento mosi ya bamvula kuluta 50 na zina ya Eunice ke tuba mutindu yai sambu na Biblia: “Yo ke sadisaka mu na kukuma muntu ya mbote mpi na kusoba bikalulu na mu ya mbi.”

Mutindu bantu yai mpi bantu mingi ya nkaka ya ke tangaka Biblia me bakisaka yo, kutanga Biblia lenda sadisa nge na kuvanda ti luzingu ya mbote kuluta. (Yezaya 48:17, 18) Biblia lenda sadisa nge na (1) kubaka balukanu ya mbote, (2) kupona banduku ya mbote, (3) kudiyangisa ve kuluta ndilu, mpi (4) diambu ya kuluta mbote, kulonguka kieleka na yina me tala Nzambi. Bandongisila yina kele na Biblia me katukaka na Nzambi, yo yina yo ta natila nge kaka mambote kana nge sadila yo. Nzambi ke pesaka ve bandongisila ya mbi.

Diambu ya mfunu kele kuyantika kutanga Biblia. Inki bametode lenda sadisa nge na kuyantika kutanga Biblia kukonda mpasi mpi na mutindu yina lenda pesa nge kiese mingi?

Inki metode lenda sadisa nge na kusepela kutanga Biblia mpi kubakila yo mambote mingi? Tula dikebi na bangindu tanu yina me sadisaka bantu mingi.

Sosa kisika ya mbote. Sosa kisika mosi ya pima. Katula bima yina lenda vwalangasa mabanza na nge sambu nge tula dikebi kaka na mambu yina nge ke tanga. Nsemo mpi mupepe ya mbote lenda sadisa nge na kubaka mambote mingi ntangu nge ke tanga Biblia.

Vanda ti mabanza ya mbote. Biblia me katukaka na Tata na beto ya zulu. Yo yina, nge ta baka mambote mingi kana nge kele ti mabanza bonso ya mwana-fioti yina kele ya kuyilama sambu tata na yandi ya zola kulonga yandi. Kana nge kele ti bangindu ya mbi sambu na Biblia, sala bikesa sambu na kukatula yo sambu Nzambi kulonga nge.—Nkunga 25:4.

Samba na ntwala ya kutanga. Biblia kele ti bangindu ya Nzambi. Yo yina, beto kele ti mfunu ya lusadisu na yandi sambu na kubakisa yo. Nzambi me sila nde yandi ta pesa “mpeve santu na bantu yina ke lombaka yandi yo.” (Luka 11:13) Mpeve santu lenda sadisa nge na kubakisa bangindu ya Nzambi. Na nima, yo ta kangula mabanza na nge sambu nge bakisa “ata mambu ya mudindu ya Nzambi.”—1 Bakorinto 2:10.

Tanga sambu na kubakisa. Kutanga ve kaka sambu na kumanisa kitini yina nge ke tanga. Yindulaka mbala na mbala mambu yina nge ke tanga. Kudiyula bangiufula bonso yai: ‘Inki bikalulu muntu yina mu ke tanga mambu na yandi monisaka? Inki mutindu mu lenda sadila mambu yai na luzingu na mono?’

Kuditudila balukanu yina nge ta lungisa. Kana nge ke zola kubaka mambote ntangu nge ke tanga Biblia, yantika na kulonguka mambu yina ta tomisa kibeni luzingu na nge. Nge lenda kuditudila balukanu bonso yai: ‘Mu ke zola kulonguka mambu mingi na yina me tala Nzambi.’ ‘Mu ke zola kukuma muntu ya mbote, bakala to nkento ya mbote.’ Na nima, pona baverse ya Biblia yina ta sadisa nge na kulungisa balukanu yina.a

Bangindu yai tanu ta sadisa nge na kuyantika. Kansi nki nge lenda sala sambu nge baka diaka kiese ya mingi ntangu nge ke tanga Biblia? Disolo ya ke landa ta tubila bangindu ya nkaka.

Sambu na nge, kutanga Biblia ke vandaka nki mutindu? Keti yo ke lembisaka nge? To keti yo ke pesaka nge kiese? Yo ke tadila mutindu nge ke tanga yo. Beto tala mambu yina nge lenda sala sambu nge sepela mingi na kutanga yo.

Pona Biblia ya mbote mpi yina kele na ndinga ya bilumbu yai. Kana nge ke tanga mukanda mosi ya me fuluka ti bangogo ya mpasi to bangogo ya ntama yina nge me zaba ve, ntembe kele ve nde nge ta sepela ve kutanga mukanda yina. Yo yina nge fwete sosa Biblia yina ke sadilaka ndinga yina nge ta bakisa kukonda mpasi mpi yina ta simba ntima na nge. Kansi yo fwete vanda mpi Biblia mosi ya bo me balula mbote-mbote mpi na siki-siki.a

Sadila ba-apareyi ya bilumbu yai. Bubu yai, nge lenda zwa Biblia ya bo me niema mpi yina bo me tula na apareyi. Nge lenda tanga ba Biblia ya nkaka na Internet, to nge lenda baka yo mpi kutula yo na ordinatere, na tableti to na telefone sambu na kutanga. Ba Biblia ya nkaka kele ti bisadilu yina lenda sadisa nge na kuzwa nswalu baverse ya nkaka ya ke tubila diambu yina nge ke tanga to nkutu yo lenda sadisa nge na kufwanisa bambalula mingi. Na bandinga ya nkaka, bo me salaka mpi Biblia ya kuwidikila kana nge ke zolaka ve kutanga. Bantu mingi ke sepelaka kuwidikila Biblia ntangu bo kele na bisi, ntangu bo ke yobisa bilele, to ntangu bo ke sala bisalu ya nkaka yina ke kanga bo ve nzila ya kuwidikila. Nge lenda meka mpi metode yina me fwana sambu na nge.

Sadila bisadilu ya kulongukila Biblia. Bisadilu ya kulongukila Biblia lenda sadisa nge na kubaka mambote mingi ntangu nge ke tanga Biblia. Bakarti ya bansi yina Biblia ke tubilaka ta sadisa nge na kuzaba bisika yina bo ke tubila na baverse ya nge ke tanga mpi mambu yina salamaka na bisika yango. Masolo ya nkaka mu mbandu yina kele na zulunalu yai to na kitini “La Bible et vous” ya site Internet jw.org lenda sadisa nge na kuzaba ntendula ya bitini mingi ya Biblia.

Soba bametode. Kana nge ke mona nde kutanga Biblia banda luyantiku tii na nsuka ke lembisa nge nitu, nge lenda yantika kutanga kitini yina ke sepedisaka nge mingi. Mpidina nge ta wa nzala ya kutanga. Kana nge ke zola kuzaba bantu yina Biblia ke tubilaka mingi, nge lenda tanga baverse yina ke tubila bo. Lupangu yina kele na luyantiku ya disolo yai ke tubila metode mosi. Ntu-diambu na yo kele “Zaba Bantu Yina Biblia Ke Tubilaka Sambu na Kubakisa Biblia Mbote.” To mbala ya nkaka nge lenda tanga disolo mosi-mosi ya Biblia to nge lenda tanga yo na ndonga yina mambu salamaka. Sambu na nki ve kumeka metode mosi na kati ya bametode yai?

Biblia kele ve mukanda bonso mikanda ya nkaka. Yo kele ti bandongisila yina me katuka na Ngangi na beto. (2 Timoteo 3:16) Nsangu na yo lenda vanda ti bupusi ya ngolo na luzingu na beto. Biblia ke tuba nde: “Ndinga ya Nzambi kele ya moyo mpi ngolo.” (Baebreo 4:12) Yo kele ti ngolo ya kusoba luzingu na beto na mitindu zole ya mfunu—yo lenda pesa beto lutwadisu sambu na luzingu ya konso kilumbu bubu yai mpi yo lenda sadisa beto na kuzaba Nzambi ti balusilu na yandi.—1 Timoteo 4:8; Yakobo 4:8.

Yo lenda soba luzingu na nge bubu yai. Biblia lenda sadisa nge na mambu ya luzingu na nge. Yo ke pesaka bandongisila ya mbote na mambu yai:

• Bangwisana na nge ti bantu ya nkaka. —Baefezo 4:31, 32; 5:22, 25, 28, 33.

• Mawi mpi mavimpi ya nitu.—Nkunga 37:8; Bingana 17:22.

• Bikalulu ya mbote.—1 Bakorinto 6:9, 10.

• Mambu ya mbongo.—Bingana 10:4; 28:19; Baefezo 4:28.a

Na Asie, bakala mosi ya me katuka kukwelana ti nkento na yandi monaka nde bandongisila ya Biblia kele mfunu. Bonso bantu mingi ya nkaka yina me katuka kukwelana, yo vandaka mpasi sambu bo yikana ti bikalulu na bo mpi bo solula kukonda mpasi. Kansi bo yantikaka kusadila mambu yina bo vandaka kutanga na Biblia. Inki salamaka na nima? Vicent ke tuba nde: “Mambu yina mu vandaka kutanga na Biblia sadisaka mu na kukanga ntima na zola yonso na bampasi yina beto vandaka kukutana ti yo na makwela na beto. Kuzitisa mambu ya Biblia ke tubaka me sadisaka beto na kuzinga na kiese.” Nkento na yandi Annalou ke tuba nde: “Kutanga bambandu yina kele na Biblia me sadisaka beto. Ntangu yai mu ke sepelaka na makwela na beto mpi na balukanu yina beto me kuditudilaka na luzingu.”

Yo lenda sadisa nge na kuzaba Nzambi. Katula mambu yina Vicent tubaka sambu na makwela, yandi ke tuba diaka nde: “Kutanga Biblia ke salaka nde mono kudiwa kibeni pene-pene ya Yehowa bubu yai.” Mambu yina Vicent me tuba ke benda dikebi na diambu mosi ya mfunu—Biblia lenda sadisa nge na kuzaba Nzambi. Kana nge sala mpidina, bandongisila ya Nzambi ta natila nge mambote mpi nge ta zaba yandi bonso nduku na nge. Nge ta bakisa mpi nde yandi ke tubila mutindu luzingu ta vanda mbote na bilumbu ke kwisa, ntangu yina nge lenda vanda ti “luzingu ya kieleka,” disongidila luzingu ya kukonda nsuka. (1 Timoteo 6:19) Yo kele ve ti mukanda ya nkaka yina lenda tubila diambu ya mutindu yai.

Kana nge yantika kutanga Biblia mpi nge landa kutanga yo, nge mpi lenda baka mambote yai—yo ta soba luzingu na nge bubu yai mpi nge ta zaba Nzambi. Kansi mutindu nge ke tanga Biblia, nge lenda kudiyula bangiufula mingi. Kana yo salama mpidina, yibuka mbandu ya mbote ya Mfumu mosi ya nsi ya Etiopia yina zingaka bamvula 2 000 me luta. Yandi vandaka ti bangiufula mingi na yina me tala Biblia. Ntangu bo yulaka yandi kana yandi vandaka kubakisa mambu yina yandi vandaka kutanga, yandi tubaka nde: “Inki mutindu mono lenda zaba kana muntu kutendudila mono ve?”b Na nima, yandi ndimaka na luzolo yonso nde Filipo kusadisa yandi. Filipo zabaka mbote-mbote Biblia mpi vandaka longoki ya Yezu. (Bisalu 8:30, 31, 34) Kiteso mosi, kana nge ke zola kuzaba mambu mingi na yina me tala Biblia, beto ke lomba nge na kufulusa formilere yina kele na www.pr2711.com to na kusonikila Bambangi ya Yehowa na adresi mosi yina kele na zulunalu yai. Nge lenda solula mpi ti Bambangi ya Yehowa yina kele pene-pene na nge to kukwenda na Nzo ya Kimfumu yina kele kisika nge ke zingaka. Keti nge lenda baka Biblia mosi bubu yai mpi kubika nde yo sadisa nge na kuvanda ti luzingu ya kuluta mbote?