Beto me gangamaka ti mpusa ya kuwila bankaka mawa mpi kumenga mambu ya nku
DISOLO YINA KELE NA LUTITI YA ZULU
Sambu na Nki Bantu Ke Tubaka nde Nzambi Kele Nku?
KETI ngiufula yina kele na lutiti ya zulunalu yai ke pesa nge mpasi na ntima? Bantu ya nkaka ta ndima mutindu yina, kansi bantu mingi ke kudiyulaka kana Nzambi kele muntu ya nku; mpi bankaka ke tubaka nde yandi kele mpenza muntu ya nku. Sambu na nki?
Bantu ya nkaka ke yulaka ngiufula yai sambu na bisumbula ya lugangu yina ke salamaka. Bo ke kudiyulaka nde: “Sambu na nki Nzambi ke bikaka nde mambu yai kusalama? Keti yandi kele mafu-mafu? To keti yandi kele muntu ya nku?”
Bankaka ke yulaka ngiufula yina ntangu bo ke tangaka masolo ya Biblia. Mu mbandu ntangu bo ke tangaka masolo bonso ya Noa mpi Mvula ya Ngolo, bo ke kudiyulaka nde: ‘Sambu na nki Nzambi ya zola fwaka bantu yina yonso? Keti yandi kele muntu ya nku?’
Keti bantangu ya nkaka nge mpi ke kudiyulaka mutindu yina? To keti nge ke monaka nde, nge ta kuka ve kupesa mvutu na bantu yina ke yulaka ngiufula yina? Yo vanda mpidina to ve, beto tadila ngiufula mosi yina lenda sadisa beto.
SAMBU NA NKI BETO KE MENGAKA MAMBU YA NKU?
Na bunkufi, beto ke mengaka mambu ya nku sambu beto ke zabaka kuswaswanisa mambu ya mbote mpi ya mbi. Diambu yai ke salaka nde beto vanda ya kuswaswana kibeni ti bambisi. Ngangi na beto salaka beto na kifwani “na yandi.” (Kuyantika 1:27) Yo ke tendula nki? Yandi me pesaka beto makuki ya kumonisa bikalulu na yandi ti bansiku na yandi ya bikalulu ya mbote, mpi kuswaswanisa mambu ya mbote ti ya mbi. Yindula diambu yai: Sambu Nzambi me pesaka beto makuki ya kuswaswanisa mambu ya mbote ti ya mbi, keti yo ke monisa ve nde Nzambi mpi ke mengaka yo?
Biblia ke ndimaka dibanza yai, sambu na kati ya Biblia, Nzambi ke zabisa beto nde: “Banzila na mono ti bangindu na mono me luta ya beno.” (Yezaya 55:9) Kana beto ke tuba nde Nzambi kele muntu ya nku, keti yo ta monisa ve nde mambu yina Biblia ke tuba kele ya luvunu—to nkutu banzila na beto me luta ya yandi? Ntembe kele ve nde, yo ta vanda mayele na kutadila mambu mingi na ntwala ya kundima diambu yina. Ziku beto fwete kudiyula nde, kana Nzambi kele ve muntu ya nku sambu na nki mambu ya nkaka yina yandi ke salaka ke monanaka bonso ya nku. Sambu na kusadisa beto na kubakisa yo, bika beto tadila ntendula ya ngogo “nku.”
Kana beto tuba nde muntu mosi kele muntu ya nku, yo ke monisaka nde mabanza na yandi kele ya mbi. Muntu ya nku kele muntu yina ke sepelaka kumona bantu ya nkaka ke niokwama to yina ke tulaka ve dikebi na bampasi na bo. Yo yina, tata yina ke pesaka mwana na yandi ndola kaka sambu na kuniokula yandi kele muntu ya nku. Kansi tata yina ke pesaka mwana na yandi ndola sambu na kulonga yandi to kutanina yandi, kele tata ya mbote. Sambu beto ke zabaka ve ntangu yonso bikuma yina ke pusaka bantu ya nkaka na kusala diambu mosi buna, yo ke vandaka mpasi ve na kubakila bo bangindu ya mbi.
Bika beto tadila bikuma zole yina ke pusaka bantu ya nkaka na kuyindula nde Nzambi kele muntu ya nku—bisumbula ya lugangu yina beto ke mona bubu yai mpi bandola ya Nzambi yina beto ke tangaka na Biblia. Keti mambu yina ke monisaka mpenza nde Nzambi kele muntu ya nku?