Beto Lemba Ve Na Kusala Mambu Ya Mbote

“Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote.”​—GALATIA 6:9.

1, 2.  (a) Sambu na nki kukanga ntima kele mfunu sambu na kusadila Nzambi? (b) Inki mutindu Abrami kumonisaka kikalulu ya kukanga ntima, mpi nki kusadisaka yandi na kusala yo?

BETO Bambangi ya Yehowa, beto kevandaka na kyese na kusala luzolo ya Nzambi. Beto kewaka mpi ve “kilo” na kulungisa mukumba yina beto balongoki kele na yo. (Matayo 11:29) Kansi, kusadila Yehowa ti Yezu kevandaka ve ntangu yonso pete. Ntumwa Polo kumonisaka yo pwelele ntangu yandi longisilaka bampangi na yandi Bakristu nde: “Beno fweti kanga ntima, sambu na kusala mambu yina ya Nzambi ke zolaka ti na kubaka mambu yina ya yandi me silaka beno.” (Baebreo 10:36) Kukanga ntima kele mfunu sambu kusadila Nzambi lenda vanda mpasi.

² Luzingu ya Abrahami kele mpenza mbandu ya mbote ya kendimisa dyambu yai. Mbala mingi yo lombaka nde yandi pona na kati ya mambu ya mpasi mpi yandi kutanaka na mambu mingi ya mpasi na luzingu na yandi. Mambu yango kuyantikaka ntangu Nzambi kulombaka yandi na kukatuka na bwala Ure kisika yandi vandaka na luzingu mosi ya mbote. Ntama mingi ve, yandi kutakana na mambu yai: nzala, kimbeni ya bantu yina vandaka kuzinga penepene ti yandi, kubikalaka fyoti nde bo botula yandi nkento na yandi, kimbeni ya bampangi na yandi yankaka, mpi bitumba. Mimekamu ya kuluta nene vandaka kukinga yandi na ntwala. Kansi Abrami kuyambulaka ve na kusala mambu ya mbote. Dyambu yai kesimba mpenza ntima na beto kana beto yibuka nde yandi vandaka ve ti Ndinga ya Nzambi ya mvimba, mutindu beto kele na yo bubu yai. Ata mpidina, ntembe kele ve nde yandi zabaka mbikudulu ya ntete, yina Nzambi kutubaka nde: “Mono tatula kimbeni na kati na nge ti nkento mpi na kati ya nkuna na nge ti nkuna ya nkento.” (Kuyantika 3:15, NW) Sambu Nkuna zolaka kubutuka na kikanda ya Abrami, yo ke pwelele nde Satana zolaka kumenga yandi. Mutindu Abrami kubakisaka dyambu yai, ntembe kele ve nde yo sadisaka yandi na kukanga ntima na kyese yonso na ntwala ya mimekamu ya Satana.

3. (a) Sambu na nki bubu yai bantu ya Yehowa fwete zaba nde bo tamona mpasi? (b) Inki nsyamisa mambu yina Galatia 6:9 ketuba kepesa beto?

³ Bantu ya Yehowa fwete zaba mpi nde bampasi tabwila bo. (1 Piere 1:6, 7) Yo yina, Kusonga 12:17 kekebisaka beto nde Satana ke na ‘kunwanisa’ bapakulami yina mebikalaka. Satana kesonga mpi makasi na yandi na “mameme ya nkaka” sambu bo kesalaka kumosi ti bapakulami. (Yoane 10:16) Katula kimbeni yina Bakristu lenda kutana na yo na kisalu ya kulonga ya bo kesalaka na meso ya bantu yonso, bo lenda kutana mpi ti mambu mingi yina lenda pusa bo na kusala mambu ya mbi na luzingu na bo. Polo kesyamisa beto nde: “Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote.” (Galatia 6:9) Ya kyeleka, ata Satana kesosa kubwisa lukwikilu na beto, beto fwete nwana ti yandi, mpi kuvanda ti lukwikilu ya ngolo. (1 Piere 5:8, 9) Inki mambote beto lenda baka kana beto kele na luzingu ya kwikama? Yakobo 1:2, 3 ketendula nde: “Bampangi na mono, kana bampasi ya mutindu na mutindu ke bwila beno, beno fweti baka yo bonso mambu mosi ya kiese; sambu beno zaba nde, kana lukwikilu na beno kele kaka ata na ntangu ya mpasi, mpidina ke songa nde beno zaba kukanga ntima.”

Kunwanisa ya Kimuntu-kimuntu

4. Inki mutindu Satana kesadilaka kunwanisa ya kimuntu-kimuntu sambu na kumeka kuzenga kwikama ya bantu ya Nzambi?

⁴ Luzingu ya Abrami kele mpenza mbandu ya kesonga “bampasi ya mutindu na mutindu” yina Mukristu lenda kutana na yo bubu yai. Mu mbandu, yo lombaka nde yandi kwenda kunwanisa bantu ya Shineare yina kwisaka kunwanisa bo. (Kuyantika 14:11-16) Mpila ya kuyituka kele ve na kumona nde Satana kelanda na kunwanisa bansadi ya Nzambi na kusadilaka kimbeni. Banda na nsuka ya Mvita ya Zole ya Inza ya Mvimba, bansi mingi mebuyisaka kisalu ya kulonga yina Bambangi ya Yehowa kesalaka. Annuaire des Témoins de Jéhovah 2001 ketubila mambu ya nku yina Bakristu ya Angola kukutanaka na yo na maboko ya bambeni. Sambu bo ketulaka ntima na Yehowa, bampangi na beto yina kezingaka na bansi yina mekangamaka ngolo mpi mebuyaka na kuyambula kusala kisalu! Na ntangu bo kekutanaka ti mambu yai yonso, bo kesalaka ve bambeni na bo mambu ya nku to kubuya kulemfuka na luyalu, kansi bo kelandaka na kusala kisalu ya kulonga na mayele yonso.​—Matayo 24:14.

5. Inki mutindu batoko yina kele Bakristu lenda kutana na kimbeni na nzo-nkanda?

⁵ Kansi, kimbeni kemonanaka ve kaka na mambu ya nku. Nsukansuka Nzambi kusakumunaka Abrahami sambu yandi butaka bana zole: Ismaele ti Izaki. Kuyantika 21:8-12 kesonga beto nde kilumbu mosi Ismaele “vandaka kusakana” na Izaki. Na mukanda na yandi na bantu ya Galatia, Polo kemonisa nde yo vandaka ve bansaka ya mpamba-mpamba yina bana ya fyoti kesalaka, sambu yandi ketuba nde Ismaele vandaka kumonisa Izaki mpasi! (Galatia 4:29) Yo yina, yo kele masonga na kutuba nde, kuseka ya banduku na beto ya nzo-nkanda mpi mafingu ya bambeni, kevandaka mutindu mosi ya kunyokula beto. Toko mosi ya Mukristu na zina ya Ryan keyibuka mutindu yandi monaka mpasi na ntwala ya bana ya nzo-nkanda na bo: “Baminuta kumi na tanu yina beto vandaka kusala na bisi na kukwenda na nzo-nkanda mpi na kuvutuka vandaka kumonana bonso bangunga sambu na kuvweza yina bo vandaka kuvweza mono. Bo vandaka kuyoka mono ti bibende ya ba atashe ya bapapie yina bo vandaka kuyoka na tiya ya babriké.” Sambu na nki bo vandaka kumonisa yandi mpasi mutindu yina? “Sambu malongi ya Nzambi yina mono vandaka kulonguka kukumisaka mono ya kuswaswana ti batoko yankaka na nzo-nkanda na beto.” Kansi, sambu na lusadisu ya bibuti na yandi, Ryan kukukaka kukanga ntima na kwikama yonso. Batoko, keti mafingu ya banduku na beno ya nzo-nkanda kelembisaka beno nitu? Beno yambula ve! Kana beno kanga ntima na kwikama yonso, mambu yina Yezu kutubaka talungana na beno: “Kiese na beno kana bo ke fingaka beno, kana bo ke monisaka beno mpasi, kana bo ke kusilaka beno mambu ya mbi ti ya luvunu ya mutindu na mutindu sambu beno kele balonguki na mono.”​—Matayo 5:11.

Basusi ya Luzingu ya Konso Kilumbu

6. Inki mambu lenda bebisa kuwakana yina kele na kati ya Bakristu bubu yai?

⁶ Mimekamu mingi ya beto kekutanaka na yo bubu yai kekatukaka na basusi ya luzingu ya konso kilumbu yina beto kevandaka na yo. Yo lombaka mpi nde Abrahami kukanga ntima na ntangu mavwanga kubasikaka na kati ya bansadi na yandi ti ya mwana-mpangi na yandi Loti. (Kuyantika 13:5-7) Mutindu mosi bubu yai, kimuntu ya kuswaswana yina beto kevandaka na yo mpi kimpala ya fyoti-fyoti lenda bebisa kuwakana yina beto kele na yo na kati na beto to nkutu kubebisa ngemba ya dibundu. “Sambu kana kimpala ti kimbeni kele, mambu ya kisakasaka ti mbi ya mutindu na mutindu mpi fweti vanda.” (Yakobo 3:16) Yo kele mfunu mpenza nde beto pesa ve nzila nde lulendo kubebisa ngemba na beto, mutindu Abrahami kusalaka, mpi beto sosa mambote ya bantu yankaka!​—1 Korinto 13:5; Yakobo 3:17.

7. (a) Inki Mukristu fwete sala kana mpangi na yandi Mukristu mesala kima mosi yina mepesa yandi mpasi na ntima? (b) Inki mutindu Abrahami kupesaka mbandu ya mbote na yina metala kutanina bangwisana ya mbote ti bantu yankaka?

⁷ Kuzinga na ngemba lenda vanda mpasi kana beto kezaba nde mpangi mosi ya Mukristu mesala beto dyambu mosi ya mbi kukonda kikuma. Bingana 12:18 ketuba nde: “Bituba-tuba ya bantu yo ke lwadisaka bantu ya nkaka bonso mbele, kansi mambu ya muntu ya mayele ke belulaka.” Ata bituba-tuba lenda pesa muntu mpasi mingi. Mpasi yango kekumaka dyaka mingi kana beto wa nde bo metonga beto to nde bo metuba mambu ya mbi na zina na beto. (Nkunga 6:6, 7) Ata mpidina, Mukristu lenda bika ve nde basusi yina yandi kele na yo na ntima kunata yandi na kuyambula kusadila Nzambi! Kana mambu ya mutindu yai mekumina nge, baka dibanza ya kusolula na malembe yonso ti muntu yina mepesa nge mpasi na ntima, beno yidika makambu yango. (Matayo 5:23, 24; Efezo 4:26) Yilama na kulolula muntu yina. (Kolosai 3:13) Kana beto bumba ve makasi na ntima, beto lenda kuma dyaka ti bangindu ya mbote mpi kutomisa kinduku ti mpangi na beto. Abrahami kukangilaka ve Loti makasi kana yandi wilaka yandi yo. Yo kemonana pwelele na mutindu yandi kwendaka nswalu kubotula Loti ti dibuta na yandi na maboko ya bambeni!​—Kuyantika 14:12-16.

Mimekamu Yina Beto Mosi Kekudisosilaka

8. (a) Inki mutindu Bakristu lenda ‘kudipesa mpasi mingi na ntima’? (b) Inki kusadisaka Abrahami na kuvanda na bangindu ya bukati-kati na yina metala bima ya kinsuni?

⁸ Ntembe kele ve nde mimekamu yankaka beto kekudisosilaka yo beto mosi. Mu mbandu, Yezu kusongaka balongoki na yandi nde: “Beno bumba kimvwama awa na nsi-ntoto ve. Awa na nsi-ntoto baniama ke diaka yo, yo ke bwaka matadi, bamiyibi ke kotaka na nzo na ngolo na kwenda kuyiba yo.” (Matayo 6:19) Kansi, bampangi mingi ‘kudipesaka mpasi mingi na ntima’ sambu bo tulaka bima ya kinsuni na ntwala ya mambu yina metala Kimfumu. (1 Timoteo 6:9, 10) Abrahami kundimaka na kuvidisa bima ya kinsuni sambu na kupesa Nzambi kyese. “Sambu na lukwikilu na yandi, yandi kwendaka kuzinga na nsi yina ya Nzambi silaka yandi, bonso nde yandi vandaka nzenza. Yandi vandaka kulala na kati ya nzo ya ntenta ti Izaki na Yakobi, sambu Nzambi silaka bo mpi kiteso mosi. Sambu Abrahami vandaka kuvingila bwala yina ke na banzo ke na fondasio ya mvula na mvula, bwala yina ya Nzambi salaka plan na yo ti ya yandi tungisaka.” (Baebreo 11:9, 10) Lukwikilu yina Abrahami kuvandaka na yo sambu na “bwala,” to luyalu ya Nzambi, yina takwisa na ntwala, kusadisaka yandi na kutula ve ntima na yandi na kimvwama. Keti yo tavanda ve mayele nde beto mpi kusala mutindu mosi?

9, 10. (a) Inki mutindu mpusa ya kuzwa kisika ya lukumu lenda natila beto mumekamu? (b) Inki mutindu mpangi mosi lenda monisa nde yandi kele ‘muntu ya meluta fioti’?

⁹ Beto tadila dyambu yankaka. Biblia kepesa ngindu yai ya mbote: “Kana muntu kuyindula nde yandi kele muntu ya mfunu, kisi yandi kele muntu ya mpamba, yandi ke kudikusa ka yandi.” (Galatia 6:3) Bo kelongisila beto dyaka na kukonda kusala kima mosi ‘sambu na lukumu na beto mosi, to sambu na mabanza ya mpamba-mpamba ya kudisonga; kansi beto kudikulumusa na meso ya bantu ya nkaka.’ (Filipi 2:3) Bantu mingi kekudisosilaka mimekamu sambu bo kesadilaka ve ndongisila yai. Sambu kima kepusaka bo na kudipesa mingi kevandaka mpusa ya kuzwa kisika ya lukumu olie ya kuvanda na nzala ya kusala “kisalu mosi ya mbote,” bo kelembaka nitu mpi kevidisaka kyese na bo kana bo kezwa ve mikumba na kati ya dibundu.​—1 Timoteo 3:1.

¹⁰ Abrahami kupesaka mbandu ya mbote sambu na yina metala ‘kukonda kudisonga.’ (Roma 12:3) Ntangu yandi kutanaka ti Melkizedeki, Abrahami kusalaka ve mambu sambu na kumonisa nde yandi meluta bantu yankaka sambu yandi kele nduku ya Nzambi. Kansi, yandi ndimaka nde Melkizedeki meluta yandi na mpila yandi pesaka yandi dikabu ya kumi ya bima na yandi sambu yandi vandaka nganga-Nzambi. (Baebreo 7:4-7) Mutindu mosi mpi bubu yai Bakristu fwete ndima na kuzinga bonso ‘bantu yina meluta fioti’ mpi kusosa ve kudisonga na meso ya bantu. (Luka 9:48) Kana bantu yina ketwadisa dibundu kemonisa bonso nde bo kezola ve kupesa nge mikumba yankaka, kuditala mbotembote na masonga yonso sambu na kuzaba bisika yina kelomba nde nge tomisa na kimuntu na nge to na mutindu ya nge kesalaka mambu. Na kifulu ya kuwa makasi sambu na mikumba yina nge kele na yo ve, sadila mbote mukumba yina nge kele na yo, mukumba ya kusadisa bantu yankaka na kuzaba Yehowa. Ee, “beno kudikulumusa na nsi ya diboko ya ngolo ya Nzambi, na mpila nde yandi ta tedimisa beno na kilumbu yina ya yandi me tulaka.”​—1 Piere 5:6.

Lukwikilu na Mambu Yina Kemonikaka Ve

11, 12. (a) Sambu na nki bantu mingi mevilaka nde mambu kekwenda nswalunswalu? (b) Inki mutindu Abrahami kupesaka mbandu ya mbote na mpila yandi tulaka kivuvu na yandi na lukwikilu yina yandi vandaka na yo na balusilu ya Nzambi?

¹¹ Mumekamu yankaka lenda basika sambu nsuka ya ngidika ya bima yai kemonana bonso nde yo kesukinina. 2 Piere 3:12 ketuba nde, Bakristu fwete “vingila [mpi kuvila ve ata fyoti, NW] kilumbu ya Nzambi.” Kansi, bantu mingi kekingaka “kilumbu” yai banda bamvula mingi, bankaka bamvula mingi kuluta. Yo lenda sala nde bankaka kuyantika kulemba nitu mpi kuvila nde mambu ke na kukwenda nswanswalu.

¹² Beto tadila dyaka mbandu ya Abrahami. Na luzingu na yandi ya mvimba, yandi tulaka kivuvu na lukwikilu yina yandi vandaka na yo na balusilu ya Nzambi, ata yonso zolaka kulungana ve na ntangu yandi vandaka kuzinga. Ya kyeleka, yandi zingaka bamvula mingi sambu yandi monaka mutindu mwana na yandi Izaki kuyelaka. Kansi, yo lombaka kukinga bamvu-nkama mingi na ntwala nde bana ya Abrahami kukuma bonso “bambwetete na zulu” to bonso “bambuma ya zelo na lweka ya masa.” (Kuyantika 22:17) Kansi, Abrahami kukumaka ve mawa-mawa to kulemba nitu. Yo yina, ntumwa Polo kutubaka mambu yai sambu na Abrahami ti bambuta yankaka: “Bantu yina yonso vandaka na lukwikilu ntangu bo fwaka. Bo bakaka ve mambote yina ya Nzambi silaka bo, kansi bo monaka yo, bo mpi ndimaka yo ntangu bo vandaka ntama na yo. Ebuna bo tubaka nde: ‘Beto kele kaka banzenza, beto ke na bwala ve awa na nsi-ntoto.’”​—Baebreo 11:13.

13. (a) Inki mutindu Bakristu kele bonso “banzenza” bubu yai? (b) Sambu na nki Yehowa tasukisa ngidika ya bima yai?

¹³ Kana Abrahami kukukaka na kutula kivuvu na yandi yonso na balusilu yina kulungana na yo kuvandaka “ntama,” bubu yai beto fwete vanda mpenza na kivuvu ya kuluta, sambu kubika fyoti kibeni mambu yai kulungana! Bonso Abrahami, beto fwete kudimonaka bonso “banzenza” na ngidika ya Satana, beto fwete buya na kuvanda na luzingu ya kusosa kaka byese. Ya kyeleka, beto tazola nde “nsuka ya mambu yonso” kukwisa sesepi yai, kansi yo kuma penepene mpamba ve. (1 Piere 4:7) Mbala yankaka beto kebelaka maladi mosi ya ngolo. To bampasi ya mbongo lenda lutila beto mingi kibeni. Kansi, beto fwete vila ve nde, Yehowa tanata ve nsuka kaka sambu na kukatula beto na mambu ya mpasi ya beto kekutanaka na yo kansi sambu na kusantisa zina na yandi mosi. (Ezekiele 36:23; Matayo 6:9, 10) Nsuka takwisa ve kaka na ntangu yina beto mezola, kansi yo takwisa na ntangu yina tavanda mbote sambu na kulungisa balukanu ya Yehowa.

14. Inki mutindu kukanga ntima ya Nzambi kepesaka mambote na Bakristu yankaka bubu yai?

¹⁴ Yibuka mpi nde, “bantu ya nkaka ke yindulaka nde Nzambi me sukinina na kusala mambu yina ya yandi silaka, kansi mpidina ve. Nzambi ke kangaka ntima sambu na beno, sambu yandi ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” (2 Piere 3:9) Simba nde, Nzambi “ke kangaka ntima sambu na beno,” disongidila bantu yina kele na kati ya dibundu ya Bukristu. Ziku, bantu yankaka na kati na beto kele na mfunu ya ntangu mingi sambu na kubalula luzingu na bo mpi kutomisa yo sambu “na kuvanda bantu ya mbote ti ya kukonda kifu na meso ya Nzambi, beno tula mpi ngolo sambu na kuzinga na ngemba ti yandi.” (2 Piere 3:14) Kana mpidina, keti beto tapesa ve mersi mutindu Nzambi mekangaka ntima?

Mutindu ya Kuzwa Kyese Ata na Kati ya Bampasi

15. Inki mutindu Yezu kuvandaka kaka na kyese ntangu yandi vandaka kumona mpasi, mpi nki mutindu kulanda mbandu na yandi kenatilaka Bakristu mambote bubu yai?

¹⁵ Luzingu ya Abrahami kelonga Bakristu malongi mingi bubu yai. Yandi monisaka lukwikilu mpamba ve, kansi yandi zabaka kukanga ntima, yandi vandaka mayele, kikesa, ti zola yina kuvandaka ve na bwimi. Yandi tulaka lusambu ya Yehowa na kisika ya ntete na luzingu na yandi. Kansi, beto fwete vila ve nde mbandu ya kuluta mbote ya beto fwete landa kele yina Yezu Kristu kubikaka. Yandi kutanaka mpi ti bampasi mpi mimekamu mingi, kansi yandi vidisaka ve kyese na yandi ntangu yandi vandaka kumona bampasi yina yonso. Sambu na nki? Sambu mabanza na yandi yonso kuvandaka kaka na mambu yina vandaka kukinga yandi na ntwala. (Baebreo 12:2, 3) Yo yina, Polo kusambaka nde: “Nzambi yina ke pesaka beto kikesa, ke songaka beto mpi nki mutindu beto fweti kanga ntima, yandi kupesa beno ngolo ya kuwakana mbote-mbote na kati na beno; mpidina beno ta landa mbandu ya Yesu Kristo.” (Roma 15:5) Kana beto kele na mabanza ya mbote, beto lenda vanda na kyese ata na kati ya bampasi yina Satana lenda natila beto.

16. Inki beto lenda sala kana beto kemona bonso nde mpasi ya beto kemona meluta kiteso?

¹⁶ Kana nge kemona bonso nde mpasi na nge meluta kiteso, kuvila ve nde Yehowa kezolaka nge kaka mutindu yandi vandaka kuzola Abrahami. Yandi kezola nde nge katuka na mpasi yina. (Filipi 1:6) Tula ntima na nge yonso na Yehowa, nde ‘yandi ta bika ve nde Satana kumeka nge na kumeka yina me luta ngolo na nge. Kansi, kana mpukumunu me kwisila nge, kaka na ntangu yo yina Nzambi ta pesa nge ngolo; mpidina mpukumunu lenda bwisa nge ve.’ (1 Korinto 10:13) Yedisa kikalulu ya kutanga Ndinga ya Nzambi konso kilumbu. (Nkunga 1:2) Sambaka mbala na mbala, mpi lombaka Yehowa na kusadisa nge sambu nge vanda na kikesa ya kulanda na kukanga ntima. (Filipi 4:6) Yandi ta “pesa mpenza Mpeve na yandi na bantu yina ke lombaka yandi Mpeve.” (Luka 11:13) Sadilaka mbote bima yonso yina Yehowa kepesaka beto sambu nge tanina kimpeve na nge, mu mbandu, mikanda yina kesadisaka beto na kulonguka Biblia. Sosaka mpi lusadisu ya bampangi yankaka. (1 Piere 2:17) Kwendaka mbala na mbala na balukutakanu ya Bukristu, kisika nge tabaka kikesa yina nge kele na yo mfunu sambu na kulanda kukanga ntima. (Baebreo 10:24, 25) Vanda na kyese na kuzaba nde kukanga ntima na nge tasala nde Nzambi kundima nge, zaba mpi nde kwikama na nge kepesaka yandi kyese!​—Bingana 27:11; Roma 5:3-5.

17. Sambu na nki Bakristu kevidisaka ve kivuvu na bo?

¹⁷ Nzambi kuzolaka Abrahami bonso “nduku” na yandi. (Yakobo 2:23) Ata mpidina, luzingu ya Abrahami kufulukaka na mimekamu mpi bampasi mingi. Yo yina, Bakristu fwete zaba nde bo takutana ti mambu ya mutindu yai na “bilumbu ya nsuka” yai ya mpasi. Ya kyeleka, Biblia kekebisa beto nde “bantu ya mbi ti bantu ya luvunu, mbi na bo ta kwisa mingi.” (2 Timoteo 3:1, 13) Na kifulu ya kuvidisa kivuvu na beto, beto fwete zaba nde bampasi yina beto kekutanaka na yo kele kidimbu ya kesonga nde nsuka ya ngidika ya Satana mekuma penepene. Kansi Yezu keyibusa beto nde “muntu yina ta kanga ntima tii na nsuka, yandi ta guluka.” (Matayo 24:13) Ebuna, ‘kulemba ve na kusala mambu ya mbote!’ Landa mbandu ya Abrahami, mpi vanda na kati ya bantu yina “ke na lukwikilu, yina ke kangaka ntima, ebuna bo ke bakaka mambu yina ya Nzambi silaka.”​—Baebreo 6:12.

Keti Nge Simbaka?

• Sambu na nki bubu yai bantu ya Yehowa fwete zaba nde bo takutana ti mimekamu mpi mpasi?

• Na nki mitindu Satana lenda nwanisa beto kimuntu-kimuntu?

• Inki mutindu Bakristu lenda manisa mavwanga yina mebwila bo?

• Inki mutindu lulendo ti bwimi lenda nata mimekamu?

• Inki mutindu Abrahami kupesaka mbandu ya mbote na yina metala kukinga kulungana ya balusilu ya Nzambi?

[Kifwanisu ya kele na lutiti 18]

Batoko mingi yina kele Bakristu kemonaka mpasi na mafingu ya banduku na bo

[Kifwanisu ya kele na lutiti 21]

Na bilumbu yina Abrahami kuvandaka na luzingu, kulungana ya balusilu ya Nzambi kuvandaka “ntama,” kansi yandi tulaka kivuvu na yandi na balusilu yango