Ntangu Luzolo ya Nzambi Tasalama na Ntoto

NTANGU Yezu kulongaka balongoki na yandi na kusamba nde, “Luzolo na nge kusalama awa na ntoto bonso na zulu,” yandi vandaka kutuba yo na kikuma sambu yandi vandaka kuzinga na zulu ti Tata. (Matayo 6:10; Yoane 1:18; 3:13; 8:42) Na ntwala nde Yezu kukuma muntu, yandi vandaka kumona mutindu bima yonso yina kuvandaka na zulu ti na ntoto vandaka kulanda luzolo ya Nzambi na nsungi mosi buna. Yo vandaka bantangu mosi ya mambu vandaka kusalama na kyese.​—Bingana 8:27-31.

Bigangwa ya ntete ya Nzambi kuvandaka bigangwa ya kimpeve to ‘bawanzyo ya ngolo mingi yina kelandaka bansiku ya Mfumu Nzambi.’ Bo vandaka bantu ‘yina kesalaka mambu ya yandi ketubaka.’ (Nkunga 103:20, 21) Keti konso wanzyo kuvandaka ti kimpwanza ya kusala mambu mutindu yandi mezola? Ee, mpi ntangu ntoto kusalamaka, “bawanzio . . . vandaka kutula milolo sambu na kiese.” (Yobi 38:7) Milolo ya bo vandaka kutula kumonisaka kyese na bo na mambu yina Nzambi kanaka kusala, mpi bo ndimaka luzolo ya Nzambi.

Na nima ya kusala ntoto, Nzambi kubongisaka yo na mpila nde bantu kuzinga pana mpi nsukansuka yandi gangaka bakala ti nkento. (Kuyantika, kapu 1) Keti dyambu yai ya Nzambi kusalaka kufwanaka nde bo tudila yo milolo? Disolo ya kupemama ketuba nde: “Nzambi monaka nde mambu yonso ya yandi salaka yo kele mbote mpenza,” ee, yo vandaka ya kukuka.​—Kuyantika 1:31.

Inki kuvandaka luzolo ya Nzambi sambu na bibuti na beto ya ntete ti bana na bo? Kuyantika 1:28 kemonisa nde yo vandaka mpi ya mbote mpenza: “Yandi [Nzambi] sakumunaka bo nde: ‘Beno buta bana mingi, mpidina bana na beno ta zingaka na bisika yonso na nsi-ntoto ti kuyala yo. Beno yala bambisi ya masa, bandeke ti bambisi yonso ya nsi-ntoto.’” Sambu na kulungisa mukumba yai ya kitoko, yo lombaka nde bibuti na beto ya ntete kuzinga tii kuna to mvula na mvula. Yo lombaka mpi nde bana na bo kuzinga mvula na mvula. Ata kima mosi kumonisaka ve nde bo zolaka kukutana ti mambu ya mpasi, ya kukonda lunungu, ya mawa, to lufwa.

Yo vandaka ntangu mosi yina luzolo ya Nzambi vandaka kusalama na zulu ti na ntoto. Bayina vandaka kulungisa luzolo na yandi vandaka na kyese na kusala yo. Inki kima kubebisaka makambu?

Kima mosi ya kukonda kukana kubebisaka luzolo ya Nzambi. Kima yango vandaka kutendula ve nde mambu tatoma dyaka ve. Kansi, yo nataka nsungi mosi ya nda ya mawa mpi ya mpasi yina kunataka mavwanga na yina metala luzolo ya Nzambi sambu na bantu. Bampasi yina mepanzanaka na beto yonso. Inki kuvandaka bampasi yango?

Luzolo ya Nzambi na Nsungi Mosi ya Kukolama

“Wanzio” mosi ya Nzambi kuzwaka mpila ya kubebisa luzolo ya Nzambi sambu na bantu, lukanu na yandi kuvandaka ya kusosa mambote na yandi mosi. Sambu yandi kudipesaka mingi na kutadila mutindu ya yandi fwete lungisa lukanu na yandi, yandi kumaka kumona nde yandi lenda sala yo mpi yandi sepilaka na yo mpenza. (Yakobo 1:14, 15) Yo fwete vanda nde yandi vandaka kuyindula nde kana bantu yina ya ntete kuwila yandi na kisika ya kuwila Nzambi, Nzambi fwete ndima na ngolo na kukabula kimfumu ti yandi. Yo lenda vanda nde yandi yindulaka dyaka nde Nzambi zolaka kufwa bo ve, sambu yo zolaka kusala nde Nzambi kukuka ve na kulungisa lukanu na yandi. Yandi yindulaka nde Yehowa Nzambi fwete soba lukanu na yandi, na kundimaka pozisio ya wanzyo yina na mpila nde bantu ya Nzambi kusalaka kukuma kulemfukila yandi ntangu yai. Mambu yai kusalaka nde nkolami yina kufwana mpenza na kubingama nde Satana disongidila “Mutelemini.”​—Yobi 1:6.

Sambu na kulungisa mpusa na yandi, Satana kwendaka kusolula ti nkento. Yandi syamisaka nkento na kubuya luzolo ya Nzambi mpi na kulanda minsiku na yandi mosi, nde: “Luvunu! Beno ta fwa ve. . . . Beno ta vanda bonso yandi Nzambi, beno ta zaba mambu ya mbote ti mambu ya mbi.” (Kuyantika 3:1-5) Ntangu nkento kuwaka mpidina, yandi yindulaka nde yandi tabaka kimpwanza, mpi yandi monaka nde luzingu na yandi tatoma mingi kana yandi ndima dibanza ya Satana. Na nima, yandi ndimisaka bakala na yandi na kusala bonso yandi.​—Kuyantika 3:6.

Luzolo ya Nzambi kuvandaka ve mutindu yai sambu na bankwelani yina. Bo mosi kuzolaka mutindu yina. Mpi yo natilaka bo bampasi. Nzambi kuzabisaka bo dezia nde kana bo sala mpidina, bo tafwa. (Kuyantika 3:3) Nzambi kugangaka bo ve sambu bo zinga mbote kukonda lutwadisu na Yandi. (Yeremia 10:23) Dyaka, yo salaka nde bo kuma bantu ya kukonda kukuka, ebuna kukonda kukuka ti lufwa zolaka kukota tii na bana na bo. (Roma 5:12) Satana lendaka kukuka ve na kukatula bo bampasi yina.

Keti mambu yai kusalaka nde Nzambi kusoba lukanu to luzolo na yandi kimakulu sambu na bantu ti ntoto? Ve. (Yezaya 55:9-11) Kansi yo basisaka mpenza bangyufula ya nene yina kulombaka nde bamvutu na yo kubasika: Keti bantu lenda vanda ‘bonso Nzambi,’ mpi kuzaba “mambu ya mbote ti mambu ya mbi,” mutindu Satana kutubaka? Na bangogo yankaka, kana bo pesa beto ntangu ya kufwana, keti beto mosi lenda kuka na kubaka lukanu ya mambu yina kele ya mbote ti ya mbi, yina kenataka mambote ti bampasi, na mambu yonso ya luzingu na beto? Keti Nzambi mefwana nde beto zitisa yandi na mambu yonso, sambu mutindu na yandi ya kuyala meluta mbote? Keti yo mefwana mpenza nde beto lemfukila luzolo na yandi na ntima mosi? Inki mvutu nge tapesa?

Metode ya kupesa mvutu na bangyufula yai kuvandaka kaka mosi na meso ya bigangwa yonso ya ngangu: Yo lombaka nde Nzambi kupesa nzila na bantu yina kusosaka kimpwanza na mpila nde bo sosa kunungisa kimpwanza na bo. Kufwa bo na mbala mosi zolaka kupesa ve nzila na kuzwa bamvutu na bangyufula yina. Kubikisa bantu nde bo landa na kuzinga na nsungi mosi ya kufwana zolaka kupesa bamvutu na bangyufula yina sambu malanda ya lukanu na bo zolaka kumonana pwelele. Nzambi kumonisaka nde yandi tamanisa makambu yango na mutindu yai ntangu yandi songaka nkento nde yandi tabuta bana. Dibuta ya bantu zolaka kuyantika na kuzinga. Lukanu yai ya Nzambi kubakaka mesalaka nde beto vanda bubu yai na luzingu!​—Kuyantika 3:16, 20.

Kansi, dyambu yai zolaka kusala ve nde Nzambi kupesa bantu ti mpeve yina ya kukolamaka nswa ya kusala mambu yonso mutindu bo vandaka kuzola. Nzambi kubuyaka ve nde yandi tavanda dyaka ve mfumu, yandi tubaka mpi ve nde yandi talungisa dyaka ve lukanu na yandi. (Nkunga 83:19) Yandi monisaka dyambu yai pwelele ntangu yandi tubaka na ntwala nde nkuna na yandi tafwa nkolami yango mpi nde yandi takatula mambu yonso ya mpasi. (Kuyantika 3:15) Yo yina kemonisa nde banda na luyantiku, Nzambi kupesaka dibuta ya bantu lusilu nde yandi takatula bampasi.

Na ntwala nde mambu yango kusalama, bibuti na beto ya ntete kudikatulaka na nsi ya kimfumu ya Nzambi, mpi bo salaka mutindu mosi sambu na bana na bo. Sambu Nzambi kukanga nzila nde bampasi ya lukanu na bo kunataka kulanda ve na kuvanda tii kuna, yo lombaka nde yandi pusa bo na kusala luzolo na yandi na ngolo na mambu yonso. Kana yandi salaka mutindu yina, yo zolaka kumonisa mpi nde yandi kezola ve nde bo meka kuzinga kukonda lutwadisu na yandi.

Na kutuba ya mbote, bantu lendaka kupona nde Nzambi kuyala bo. Bo lendaka kulonguka mambu yina Nzambi kezolaka sambu na bantu na nsungi yai mpi kulanda yo mbotembote mpenza. (Nkunga 143:10) Ata mpidina, bantu yango zolaka kaka kukutana ti bampasi na nsungi yai yonso ya beto mebakaka ntete ve mvutu na ngyufula yina ya kusosa kuzaba kana bantu lenda zinga bo mosi kukonda lutwadisu ya Nzambi.

Malanda ya kikalulu yina bantu kukumaka na yo ya kupona mambu ya bo mosi mezola kumonanaka pwelele na luyantiku ya luzingu ya bantu. Kaini, mwana ya ntete ya kubutukaka na dibuta ya bantu, kufwaka mpangi na yandi Abele sambu “yandi vandaka kusala mambu ya mbi, kansi mpangi na yandi vandaka kusala mambu ya mbote.” (1 Yoane 3:12) Nzambi kuzolaka ve nde Kaini kusala dyambu ya mutindu yina, sambu Nzambi kukebisaka yandi mpi na nima yandi pesaka yandi ndola. (Kuyantika 4:3-12) Kaini kuponaka kimpwanza ya kulanda minsiku na yandi mosi yina vandaka kukatuka na Satana mpi yo monisaka nde yandi “vandaka muntu ya Muntu ya mbi.” Bantu yankaka mpi kusalaka bonso yandi.

Ntangu bantu kuzingaka na ntoto na nsungi mosi ya bamvula kuluta 1 500, “Nzambi monaka” nde “mbi na bo, mbi ti nku na bo mpi panzanaka na nsi-ntoto yonso.” (Kuyantika 6:11) Yo lombaka nde Nzambi kusala dyambu mosi sambu na kutanina ntoto na mpila nde yo beba ve. Nzambi nokisaka mvula ya ngolo na ntoto ya mvimba mpi yandi taninaka dibuta mosi ya lunungu: Noa, nkento na yandi, bana na yandi ya babakala, ti bankento na bo. Dibuta yango, yo yina mebutaka bana yina ke na luzingu tii bubu yai. (Kuyantika 7:1) Beto yonso mekatukaka na dibuta yina.

Banda na ntangu ya Noa, luzingu ya bantu kemonisa nde Nzambi ketwadisaka bantu ya masonga yina kezolaka kuzaba luzolo na yandi. Yandi pesaka babakala ya kwikama mpeve na yandi sambu bo sonika mambu yina yandi vandaka kuzabisa bo na mpila nde konso muntu yina tasosa lutwadisu na yandi kutanga yo. Mambu yango kele na kati ya Biblia. (2 Timoteo 3:16) Na zola yonso, yandi pesaka bantu ya kwikama nzila ya kusala kuwakana ti yandi, bo kumaka nkutu banduku na yandi. (Yezaya 41:8) Yandi pesaka bo mpi ngolo yina bo vandaka na yo mfunu sambu na kukanga ntima na bampasi yina bantu kekutanaka na yo na bamvu-funda yai ya bo kezingaka kukonda lutwadisu ya Nzambi. (Nkunga 46:2; Filipi 4:13) Beto fwete monisa mpenza ntonda sambu na mambu yai yonso!

“Luzolo na Nge Kusalama” Kimakulu

Mambu ya Nzambi mesadilaka bantu tii bubu yai kele yo yina mpamba ve ya yandi mekanaka na kusadila bantu. Ntumwa Piere kusonikaka nde: “Kansi beto ke vingila nde Nzambi kubasisa zulu ya mpa ti ntoto ya mpa, yina ya yandi silaka beto; kuna bantu yonso ta lemfuka kaka na Nzambi konso ntangu.” (2 Piere 3:13) Kutuba yai ya kifwani ketadila luyalu ya mpa yina tayala bantu mpi kimvuka ya mpa ya bantu yina tavanda na nsi ya lutwadisu ya luyalu yango.

Na kusadilaka kutuba mosi ya pwelele kibeni, profete Daniele kusonikaka nde: “Kansi ntangu ya bantotila yina ta yala, Nzambi ya zulu ta tula ntotila mosi yina ta yalaka tii kuna. . . . Kansi yandi ta fwa bantotila yonso ebuna yandi ta yalaka tii kuna.” (Daniele 2:44) Mbikudulu yai ketubila na ntwala nde ngidika ya bima ya bubu yai yina kebebisaka luzingu ya bantu tafwa mpi Kimfumu, to luyalu ya Nzambi tayinga na kisika na yo. Ya kyeleka, yai kele mpenza nsangu mosi ya mbote! Mavwanga ti bwimi yina mefuluka bubu yai na ntoto ti nku mpi kubangisa yina kebebisa ntangu yonso ntoto yai tavanda dyaka ve.

Inki ntangu mambu yai tasalama? Balongoki ya Yezu kuyulaka nde: “Mambu yai yonso tabwa na nki ntangu, mpi nki tavanda kidimbu ya kuvanda na nge ti ya nsuka ya ngidika ya bima?” (NW) Kitini mosi ya mvutu yina Yezu kupesaka ketuba nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—Matayo 24:3, 14.

Bantu yonso mezabaka nde kisalu yai ya kusamuna kesalama ntangu yai na inza ya mvimba. Ziku nge kemonaka yo na kisika yina nge kezingaka. Na mukanda These Also Believe, Profesere Charles S. Braden kusonikaka nde: “Bambangi ya Yehowa metaka mpenza kimbangi na ntoto ya mvimba. . . . Ata dibundu mosi ve ya inza yai memonisaka dezia kikesa ti kukwamina ya kuluta nene na yina metala kupanza nsangu ya mbote ya Kimfumu bonso Bambangi ya Yehowa.” Bambangi kelonga nsangu ya mbote na bansi kuluta 230 mpi na bandinga penepene na 400. Kisalu yai ya Biblia kutubilaka na ntwala mesalamaka ntete ve na kiteso yina yo kesalama bubu yai na inza ya mvimba. Yai kele mosi na kati ya bidimbu yina kemonisa nde ntangu yina Kimfumu ya Nzambi tayinga baluyalu ya bantu mekuma mpenza penepene.

Kimfumu yina Yezu kutubaka nde yo talongama kele yo yina ya yandi longaka beto na kusamba na kisambu na yandi ya mbandu: “Kimfumu na nge kwisa, luzolo na nge kusalama awa na ntoto bonso na zulu.” (Matayo 6:10) Ya kyeleka, Kimfumu kele kima yina ya Nzambi tasadila sambu na kulungisa lukanu na yandi, luzolo na yandi, sambu na bantu ti ntoto.

Yo ketendula nde inki? Bika nde Kusonga 21:3, 4 kupesa mvutu: “Mono waka ndinga ya ngolo katukaka na kiti ya kimfumu nde: ‘Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.’” Na ntangu yango yina, luzolo ya Nzambi talungana mpenza na mambu yonso na ntoto ti na zulu.a Keti nge tazola ve kuzinga na kati na yo?

[Noti na nsi ya lutiti]

[Kifwanisu ya kele na lutiti 4]

Kusosa kuzinga kukonda lutwadisu ya Nzambi tanata bampasi