Mambu Yina Kuzaba Zina ya Nzambi Kelombaka
KETI zina na nge kele ti ntendula mosi ya sipesiali? Na bansi yankaka, bantu kevandaka ti kikalulu ya kupesa mwana zina yina kele ti ntendula mingi. Zina ya bo keponaka lenda monisa balukwikilu mpi minsiku ya bibuti to bivuvu na bo sambu na makwisa ya mwana na bo mpi mutindu bo kezola nde yandi kuvanda.
Kikalulu ya kupesa bantu bazina ya kele ti ntendula mingi kele ve kikalulu ya mpa. Na ntangu ya ntama, mbala mingi bo vandaka kupesa bantu bazina na kutadila ntendula na yo. Zina lendaka kumonisa mukumba yina bo vandaka kuvingila nde muntu kulungisa na luzingu na yandi. Mu mbandu, ntangu Yehowa kuzabisaka Davidi mukumba yina mwana na yandi Salomo zolaka kulungisa na makwisa, yandi tubaka nde: “Zina na yandi ta vanda Salomo [disongidila “Ngemba”] sambu ntangu yandi ta vanda ntotila, bantu ya Israele ta vanda na ngemba, ntoto mpi ta vanda pima.”—1 Bansangu 22:9.
Bantangu yankaka Yehowa kupesaka zina ya mpa na muntu mosi yina vandaka penepene ya kulungisa mukumba mosi ya mpa. Nkento ya Abrahami yina vandaka kubuta ve kubakaka zina ya Sara, yina ketendula “Mwana ya Ntotila.” Sambu na nki? Yehowa kutendulaka nde: “Mono ta sakumuna yandi, yandi ta butila nge mwana ya bakala, yandi Sara ta kuma mama ya makanda mingi ya bantu; bana ya nkaka ya bana na yandi bo ta vanda bamfumu ya nene.” (Kuyantika 17:16) Yo ke pwelele nde, kubakisa sambu na nki Sara kubakaka zina ya mpa zolaka kutendula kubakisa mukumba na yandi ya mpa.
Inki beto lenda tuba sambu na zina yina meluta bazina yonso na mfunu—Yehowa? Yo ketendula inki? Ntangu Moize kuyulaka Nzambi zina na yandi, Yehowa kuvutulaka nde: “Mono kele muntu yina ya mono kele.” (Kubasika 3:14) Mbalula ya Rotherham kebalula bangogo yai nde: “Mono Takuma konso mutindu yina mono mezola.” Zina ya Yehowa kemonisa nde yandi kele Nzambi yina kele ti mikumba mingi. Beto baka mbandu mosi ya pete: Yo lenda lomba nde mama mosi kulungisa mikumba mingi konso kilumbu ntangu yandi kekeba bana na yandi—bonso munganga, mulambi, longi—na kutadila mpusa yina kemonana. Yo kele mutindu mosi ti Yehowa, kansi na kiteso mosi ya kuluta mpenza. Sambu na kulungisa lukanu na yandi ya zola sambu na bantu, yandi lenda kuma konso mutindu yina yandi mezola, mpi kulungisa konso mukumba yina kele mfunu. Yo yina, kuzaba Yehowa na zina na yandi kelombaka kubakisa mikumba mingi ya yandi kele na yo mpi kuzitisa yo ti kumonisa ntonda sambu na yo.
Yo kele mawa sambu kitoko ya kimuntu ya Nzambi kele ya kubumbana sambu na bantu yina mezaba yandi ve na zina na yandi. Kansi, kana nge longuka Biblia, yo lenda sadisa nge na kubakisa mikumba ya Yehowa bonso Ndongisi ya mayele, Ngulusi ya ngolo, Mupesi ya bima yonso, mpi buna na buna. Ya kyeleka, ntendula ya nene ya zina ya Yehowa kele ya kuyituka mpenza.
Kansi, kuzaba Nzambi na zina na yandi kevandaka ve ntangu yonso pete. Disolo ya kelanda tamonisa sambu na nki.
[Kifwanisu ya kele na lutiti 4]
Shrine of the Book, Photo © The Israel Museum, Jerusalem