‘Sambu na Nsemo na Nge Beto Kemonaka Nsemo’
NSEMO kele kima mosi ya beto ketudilaka ve dikebi mingi katula kaka kana kuran mezengana mpi kisika ya beto kele mekota na mpimpa. Yo kele kyese na kumona nde “kima ya kepesaka beto nsemo” yina kevandaka na zulu, disongidila ntangu, lenda yambula ve na kupesa nsemo na yo. Sambu na nsemo yina kekatukaka na ntangu, beto lenda mona, kudya, kupema, mpi kuzinga.
Sambu nsemo kele mfunu mingi sambu luzingu kuvanda, beto fwete yituka ve na kutanga na mukanda ya Kuyantika nde Nzambi kusalaka nsemo na kilumbu ya ntete ya kisalu na yandi. “Nzambi tubaka nde: ‘Nsemo kuvanda.’ Ebuna nsemo kuvandaka.” (Kuyantika 1:3, NW) Bantu ya lukumu bonso Ntotila Davidi vandaka kundima ntangu yonso nde Yehowa kele nto ya luzingu mpi ya nsemo. Davidi kusonikaka nde: “Nge muntu kele nto ya moyo; beto ke mona mwini [to, nsemo] sambu na mwini na nge.”—Nkunga 36:10.
Bangogo ya Davidi kele ti ntendula ya kyeleka mpi ya kifwani. Mukanda mosi (Encyclopædia Britannica) ketuba nde: “Ya kyeleka, nsemo kele kima ya kesalaka nde beto mona.” Ebuna yo keyika nde: “Bansangu mingi kekotaka na butomfu ya muntu na nzila ya meso kuluta na banzila yankaka ya nitu.” Sambu mambu mingi ya beto kelongukaka kelutaka na meso, ya kevandaka na mfunu ya nsemo sambu yo sala mbote, Masonuku kesadilaka mpi nsemo na mpila mosi ya kifwani.
Yo yina, Yezu kusongaka balongoki na yandi nde: “Mono kele mwinda sambu na bantu yonso. Muntu yina ke landaka mono yandi ta tambula na mpimpa ata mbala mosi ve, kansi yandi ta vanda na mwini yina ke pesaka moyo.” (Yoane 8:12) Nsemo ya kifwani yina Yezu kutubilaka vandaka nsangu ya kyeleka yina yandi longaka, nsangu yina zolaka kupesa nsemo na mabanza mpi na ntima ya bawi na yandi. Nsukansuka, na nima ya bamvula mingi ya mpimpa ya kimpeve, balongoki ya Yezu kubakisaka lukanu ya Nzambi sambu na bantu mpi kivuvu ya Kimfumu ya Nzambi. Ya kyeleka, nsangu yai kuvandaka kibeni “mwini yina ke pesaka moyo,” sambu kuzaba mambu yai yonso lenda nata na luzingu ya mvula na mvula. Yezu kutubaka na kisambu yina yandi salaka na Tata na yandi ya zulu nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Bika nde beto baka ve nsemo yai ya kimpeve bonso kima mosi ya mpamba!