“Longa Mwana”

SAMBU na kusala masamba ya mbote, yo kelombaka ve kaka kupanza bankeni na ntoto na nima nge kwenda ka nge. Ebuna, nge kwisa kuvutuka na nima ya bangonda sambu na kukatula bambuma. Yo kelombaka kisalu mingi: Kubongisa ntoto, kukuna bankeni, kulosila masa, kusakula matiti sambu bimenina kuyela mbote.

Yai kele mbandu mosi ya mbote ya kesonga nde mambu yina Bingana 22:6 ketuba kele ya kyeleka: “Longa mwana mutindu yandi fweti zinga, ebuna ntangu yandi [ta] kuma mbuta yandi ta vila yo ve.” Ya kyeleka, sambu bana kusansama mbote, malongi ya bibuti kele mfunu mingi kibeni.

Kansi, na inza ya bubu ya kepesaka nswa na mambu yonso, bibuti mingi kelandaka ve ndongisila yai. Na ntangu bibuti kelandaka mambu ya bantu ketubaka nde bana fwete longuka na kusala makambu bo mosi, bana na bo kelutaka kuyungana. Nzila ya mutindu yai kelutaka kunata bana ya baleke na kusadila bangindu ya mbi ya bantu yina kezitisaka ve bansiku mpi kevandaka ti bikalulu ya mbi.​—⁠Bingana 13:⁠20.

Yo meluta mbote kibeni nde bibuti kulonga bana na bo bansiku ya Bukristu yina kekatukaka na Nzambi na ntangu bo kele ntete ya fyoti! Inki ntangu bo fwete longa bo? Polo ketuba nde: “Katuka na kileki.” Timoteo bo longaka yandi mutindu yina. Mama na yandi Enise ti nkaka na yandi Loisi kulongaka Timoteo “Mukanda ya Nzambi.” Yo yina yandi “longukaka” na ‘kutula yo ntima.’ Ebuna nki mbuma yo butaka? Malongi yai vandaka mfunu mingi sambu yo “pesaka” yandi mayele yina ‘ta gulusa yandi.’​—⁠2 Timoteo 1:5; 3:​14, 15.

Yo kele mutindu mosi bubu yai. Bibuti yina ‘ke lembaka ve na kusala mambu ya mbote’ tabaka balusakumunu mingi kana bo “sala kaka.” (Galatia 6:⁠9) Ntotila Salomo ketuba nde: “Tata ya mwana ya mbote fweti vanda kaka na kiese.”​—⁠Bingana 23:⁠24.

[Lupangu ya kele na lutiti 32]

KETI NGE TAZOLA MVUTUKILU MOSI?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, République démocratique du Congo, to na mosi na adresi mebonga na nge yina kele na lutiti 2.