DILONGI 44
Keti Bafeti Yonso Ke Sepedisaka Nzambi?
Yehowa ke zolaka nde beto sepela ti luzingu mpi yandi ke zolaka nkutu nde bantangu ya nkaka beto sala mpi bafeti. Keti yo ke tendula nde bafeti yonso ke pesaka yandi kiese? Inki beto fwete sala sambu na kumonisa nde beto ke zolaka Yehowa na ntangu ya bafeti?
1. Sambu na nki bafeti mingi ke sepedisaka ve Yehowa?
Nge lenda yituka na kuzaba nde bafeti mingi ke wakanaka ve ti malongi ya Biblia mpi nde yo me katukaka na mabundu ya luvunu. Bafeti ya nkaka ke vandaka ti kuwakana ti bisalu ya bampeve ya mbi to mpi malongi yina ke tubaka nde moyo ke fwaka ve. Bafeti to mambu ya nkaka ya bantu ke salaka me katukaka na malongi ya luvunu. Bo ke salaka yo sambu bo ke yindulaka nde mambu ya mbi ta kumina bo kana bo ke zitisa ve nsiku mosi buna ya bambuta. (Yezaya 65:11) Yehowa ke kebisaka bansadi na yandi nde: “Beno kabwana ti bo, mpi beno yambula kusimba kima ya mvindu.”—2 Bakorinto 6:17.a
2. Inki mutindu Yehowa ke waka sambu na bafeti yina bo ke pesaka bantu lukumu mingi?
Yehowa ke kebisaka beto sambu beto bwa ve na mutambu ya ‘kutula ntima na bantu.’ (Tanga Yeremia 17:5.) Bantu ke salaka bafeti ya nkaka sambu na kukumisa bamfumu to bantu yina me fwaka sambu na insi. Bantu ya nkaka ke salaka mpi bafeti sambu na dipanda to sambu na kupesa lukumu na bidimbu ya ke monisaka insi, mu mbandu drapo. (1 Yoane 5:21) Bafeti ya nkaka mpi ke kumisaka bimvuka ya politiki to bimvuka ya nkaka ya bantu. Inki mutindu Yehowa ta wa kana beto ke pesa muntu to kimvuka mosi lukumu mingi, mingi-mingi kana muntu to kimvuka yango ke pusa bantu na kusala mambu ya ke wakana ve ti luzolo na yandi?
3. Inki mambu lenda sala nde Nzambi kundima ve bafeti ya nkaka?
Biblia ke buyisaka “kulutisa ndilu na kunwa malafu, kusala bankinsi yina bantu ke salaka mambu ya kisaka-saka, [mpi] kusala bankinsi yina bantu ke nwaka malafu mingi.” (1 Piere 4:3) Na bafeti ya nkaka, bantu ke kudiyalaka ve mpi bo ke salaka mambu ya nsoni kibeni. Yo yina, sambu beto landa kuvanda banduku ya Yehowa beto fwete buya kibeni bafeti ya bantu ke salaka mambu yai ya mvindu.
LONGUKA MAMBU MINGI
Beto tala mambu ya nge fwete sala sambu na kubaka balukanu ya ke sepedisaka Yehowa na mambu ya bafeti.
4. Buya bafeti yina ke sepedisaka ve Yehowa
Beno tanga Baefezo 5:10 mpi na nima beno pesa mvutu na bangiufula yai:
Inki beto fwete zikisa ntete na ntwala ya kubaka lukanu kana beto ta sala feti mosi to ve?
Inki bafeti bantu mingi mpenza ke salaka na kisika yina nge ke zingaka?
Keti nge ke yindula nde bafeti yango ke pesaka Yehowa kiese?
Mu mbandu, keti nge me kudiyulaka dezia mutindu Nzambi ke waka ntangu bantu ke salaka bafeti ya aniversere ya lubutuku? Biblia ke tubilaka ve ata fioti nsadi mosi ya Yehowa yina salaka feti ya aniversere ya lubutuku kansi yo ke tubila bafeti zole ya lubutuku ya bantu yina vandaka ve kusambila Yehowa. Beno tanga Kuyantika 40:20-22 mpi Matayo 14:6-10. Na nima, beno pesa mvutu na bangiufula yai:
nki mambu ya mutindu mosi salamaka na bafeti yai zole?
Mutindu masolo yai ya Biblia me monisa yo, nge ke yindula nde Yehowa ke waka nki mutindu ntangu bantu ke salaka bafeti ya aniversere ya lubutuku?
Nge lenda kudiyula diaka nde ‘Keti Yehowa ke kudiyangisaka mpenza kana mono me kwenda na feti mosi ya lubutuku to na feti ya nkaka yina ke wakana ve ti mambu ya Biblia ke tubaka?’ Beno tanga Kubasika 32:1-8. Na nima, beno tala VIDEO mpi beno pesa mvutu na bangiufula ya ke landa.
Sambu na nki beto fwete sosa kuzaba kana mambu ya beto ke zola kusala ke pesaka Yehowa kiese?
Inki mutindu beto lenda sala yo?
Bangiufula ya ta sadisa nge na kuzaba kana feti mosi ke sepedisaka ve Nzambi
Keti yo ke wakana ti malongi ya Biblia? Sambu na kubaka mvutu, sosa kuzaba ntete kisina na yo.
Keti yo ke pesaka lukumu mingi na bantu, na bimvuka to na bidimbu ya ke monisaka insi? Beto ke kumisaka Yehowa kuluta bima yonso ya nkaka mpi beto ke tulaka ntima nde yandi mpamba ta manisa bampasi na ntoto.
Keti mambu ya ke salamaka na feti yango ke wakanaka ti minsiku ya Biblia? Beto fwete landa kuvanda bunkete na mambu ya beto ke yindula, ke tuba mpi ke sala.
5. Sadisa bantu ya nkaka na kuzitisa mambu ya nge ke kwikilaka
Yo lenda vanda mpasi na kubuya kusala feti mosi ya ke sepedisaka ve Yehowa kana bantu ya nkaka ke pusa nge na ngolo na kusala yo. Yo yina nge fwete vanda ntima-nda mpi luzitu ntangu nge ke tendudila bo sambu na nki nge ke buya kusala yo. Sambu na kuzaba mutindu ya kusala yo, beno tala VIDEO.
Beno tanga Matayo 7:12 mpi na nima beno pesa mvutu na bangiufula yai:
Mutindu verse yai ke monisa yo, keti yo kele mbote na kubuyisa bampangi ya dibuta na beno yina kele ve Bambangi ya Yehowa na kusala feti mosi?
Inki nge lenda sala sambu na kundimisa bampangi ya dibuta na beno nde nge ke zolaka bo mpi nge ke sepelaka ti bo ata nge ta sala ve feti ti bo?
6. Yehowa ke zolaka nde beto vanda na kiese
Yehowa ke zolaka nde beto lutisa bantangu ya mbote ti bampangi ya mabuta na beto mpi banduku na beto. Beno tanga Longi 8:15 mpi na nima beno pesa mvutu na ngiufula yai:
Mutindu verse yai ke monisa yo, nki ke ndimisa nge nde Yehowa ke zolaka nde beto vanda na kiese?
Yehowa ke zolaka nde bansadi na yandi kulutisa bantangu ya mbote mpi ya kiese. Beno tala VIDEO sambu na kumona kiese ya mingi yina bampangi ke vandaka ti yo na balukutakanu ya nene ya bansi mingi.
Beno tanga Bagalatia 6:10 mpi na nima beno pesa mvutu na bangiufula yai:
Keti sambu na kumonisa nde beto ke “sala mambu ya mbote” na bantu ya nkaka, yo ta lomba kaka nde beto sala bafeti yina bantu mingi mpenza ke salaka?
Inki ke pesaka nge kiese mingi: Keti yo kele kuvingila kaka kilumbu mosi ya feti sambu na kukabila muntu kado to kukabila yandi yo konso ntangu ya nge ke zola?
Bantangu ya nkaka, Bambangi ya Yehowa mingi ke lutisaka ntangu ya mbote na dibaku mosi buna ti bana na bo to nkutu ke pesaka bana na bo bakado yina bo yindulaka ve. Kana nge kele ti bana, nki mwa mambu ya mbote nge lenda sala sambu na kusepedisa bo?
BANTU YA NKAKA KE TUBAKA NDE: “Kusosa kuzaba kisina ya feti mosi kele mpenza ve mfunu. Yo kele kaka sambu na kulutisa ntangu ya mbote ti bampangi na beto ya dibuta mpi banduku.”
Inki mvutu nge ta pesa?
NA BUKUNFI
Yehowa ke zolaka nde beto lutisa ntangu ya kiese ti bampangi na beto ya dibuta mpi banduku na beto. Kansi yandi ke zolaka mpi nde beto buya bafeti yina ke sepedisaka yandi ve.
Inki Nge Me Simba?
Inki bangiufula beto lenda kudiyula sambu na kuzaba kana feti mosi ke sepedisaka Yehowa to ve?
Inki mutindu beto lenda tendudila bampangi na beto ya dibuta mpi banduku na beto sambu na nki beto ke salaka ve bafeti ya nkaka?
Inki mutindu nge me zaba nde Yehowa ke zolaka nde beto vanda na kiese mpi beto lutisa ntangu ya kiese?
TALA MPI
Tala mwa bafeti yina Bakristu fwete sala ve.
“Sambu na Nki Bambangi ya Yehowa Ke Salaka Ve Bafeti ya Nkaka?” (Disolo ya kele na jw.org)
Tala bikuma iya ya ke ndimisaka beto nde bafeti ya aniversere ya lubutuku ke sepedisaka ve Nzambi.
Tala mutindu bana ya ke zolaka Yehowa lenda pesa yandi kiese na ntangu ya bafeti.
Bakristu mingi kibeni ke salaka ve feti ya Noel. Inki mutindu bo ke waka sambu na lukanu yai ya bo me bakaka?
“Bo Me Zwaka Kima Mosi ya Mfunu Mingi Kuluta” (Disolo ya kele na Nzozulu ya Nkengi)