• Banani Ke Longaka Nsangu ya Mbote?
    Zinga Mvula na Mvula!—Kulonguka ya Biblia Yina Ta Natila Nge Mambote
    • Dilongi 21. Bakala mosi ya kele na nzila na mbanza mosi, ke solula ti Bambangi ya Yehowa zole na lweka ya shario mosi ya mikanda.

      DILONGI 21

      Banani Ke Longaka Nsangu ya Mbote?

      Kubika fioti, Yehowa ta sadila Kimfumu na yandi sambu na kumanisa bampasi na beto yonso. Yai kele kibeni nsangu ya mbote yina bantu yonso fwete zaba. Yezu zolaka nde balongoki na yandi kulonga nsangu yai na bantu yonso! (Matayo 28:19, 20) Inki mutindu Bambangi ya Yehowa ke sadilaka mambu yai ya Yezu tubaka?

      1. Inki mutindu Matayo 24:14 ke lungana bubu yai?

      Yezu tubaka nde: “Bo ta [longa] nsangu yai ya mbote ya Kimfumu na ntoto ya mvimba.” (Matayo 24:14) Bambangi ya Yehowa ke vandaka na kiese ya kusala kisalu yai ya mfunu. Beto ke longaka nsangu ya mbote na ntoto ya mvimba na bandinga kuluta 1 000! Yo ke lombaka bikesa mingi kibeni mpi kuyidika mambu mbote-mbote sambu na kusala kisalu yai ya nene. Beto lenda sala ve kisalu yai kukonda lusadisu ya Yehowa.

      2. Inki bikesa beto ke salaka sambu na kulonga bantu nsangu ya mbote?

      Beto ke longaka nsangu ya mbote na bisika yonso yina beto ke kutaka bantu. Beto ke longaka “nzo na nzo” bonso Bakristu ya ntete. (Bisalu 5:42) Kulonga nsangu ya mbote nzo na nzo kele mutindu ya mbote mpenza ya kulonga sambu yo ke sadisaka beto na kusolula ti bantu mingi kibeni konso mvula. Beto ke longaka mpi nsangu ya mbote na bisika ya bantu mingi sambu bantangu ya nkaka beto ke kutaka ve bantu na banzo na bo. Beto ke salaka yonso sambu na kusonga bantu mambu ya Yehowa mpi mambu yina yandi ke kana na kusala.

      3. Banani fwete longa nsangu ya mbote?

      Bakristu yonso ya kieleka fwete longa bantu ya nkaka nsangu ya mbote. Beto ke bakaka ve kisalu yai na nsaka. Beto ke longaka na kiteso ya ngolo na beto sambu beto ke zabaka nde luzingu ya bantu kele na kigonsa. (Tanga 1 Timoteo 4:16.) Bo ke futaka beto ve sambu na kusala kisalu yai sambu Biblia ke tubaka nde: “Beno me baka ya ofele, beno pesa mpi ya ofele.” (Matayo 10:7, 8) Bantu yonso ve ke ndimaka nsangu ya mbote ya beto ke longaka, ata mpidina beto ke landaka kulonga sambu beto ke lemfukilaka Yehowa mpi sambu yo ke pesaka yandi kiese.

      LONGUKA MAMBU MINGI

      Beto tala diaka bikesa yina beto Bambangi ya Yehowa ke salaka sambu na kulonga nsangu ya mbote na ntoto ya mvimba mpi mutindu Yehowa ke sadisaka beto.

      A. Bambangi ya Yehowa zole ke longa nsangu ya mbote na ngumba mosi ya kele ti matiti mingi na insi Costa Rica. B. Bambangi ya Yehowa iya ke longa milobi-mbisi nsangu ya mbote na dibungu mosi na Étas-Unis. C. Bambangi ya Yehowa zole ke longa bakala mosi nsangu ya mbote na bwala mosi na Bénin. D. Mbangi ya Yehowa mosi ke longa nkento mosi nsangu ya mbote na zandu yina bo ke tekaka bima na babwatu na Thaïlande. E. Bambangi ya Yehowa zole ke longa nkento mosi nsangu ya mbote na ntwala ya matadi ya nene yina kele bonso ba CD na bisanga Yap. F. Bambangi ya Yehowa zole ke longa nkento mosi nsangu ya mbote na kisika mosi ya kele ti ba neige na lweka ya ka-masa mosi na Suède.

      Bo ke longa nsangu ya mbote na ntoto ya mvimba: (A) Costa Rica, (B) États-Unis, (C) Bénin, (D) Thaïlande, (E) Bisanga Yap, (F) Suède

      4. Beto ke salaka ngolo sambu na kulonga bantu yonso

      Bambangi ya Yehowa ke salaka bikesa mingi sambu na kulonga bantu ya nkaka nsangu ya mbote na bisika yonso. Beno tala VIDEO mpi na nima beno pesa mvutu na ngiufula ya ke landa.

      VIDEO: Bo Ke Samuna na “Kisika ya Kuluta Ntama na Ntoto” (7:38)

      • Inki ke yitukisa nge na bikesa yina Bambangi ya Yehowa ke salaka sambu na kulonga nsangu ya mbote?

      Beno tanga Matayo 22:39 mpi Baroma 10:13-15. Na nima beno pesa mvutu na bangiufula yai:

      • Inki mutindu kisalu na beto ya kulonga ke monisaka nde beto ke zolaka bantu ya nkaka?

      • Inki mutindu Yehowa ke tadilaka bantu yina ke longaka nsangu ya mbote?​—Tala verse 15.

      5. Beto kele banduku ya kisalu ya Nzambi

      Mambu mingi ke monisaka nde Yehowa muntu ke twadisaka kisalu na beto. Mu mbandu, kilumbu mosi na nima ya midi na insi Nouvelle-Zélande, mpangi mosi na zina ya Paul kutanaka ti nkento mosi ntangu yandi vandaka kulonga nsangu ya mbote nzo na nzo. Na suka-suka ya kilumbu yango, nkento yina sambaka Nzambi. Yandi sadilaka zina ya Nzambi, Yehowa mpi lombaka yandi nde muntu mosi kukwisa kutala yandi sambu na kusadisa yandi na kuzaba Yehowa. Paul ke tuba nde: “Bangunga tatu na nima, mono kumaka na nzo na yandi.”

      Beno tanga 1 Bakorinto 3:9 mpi na nima beno pesa mvutu na ngiufula yai:

      • Inki mutindu mambu bonso yai ya salamaka na Nouvelle-Zélande ke monisa nde Yehowa muntu ke twadisaka kisalu ya kulonga nsangu ya mbote?

      Beno tanga Bisalu 1:8 mpi na nima beno pesa mvutu na ngiufula yai:

      • Sambu na nki beto ke vandaka na mfunu ya lusadisu ya Yehowa sambu na kusala kisalu yai?

      Keti nge zabaka yo?

      Konso mposo na balukutakanu na beto ya kati-kati ya mposo, beto ke bakaka formasio yina ke sadisaka beto na kulonga. Kana nge me kwendaka dezia na lukutakanu mosi, nki nge ke yindula sambu na formasio ya beto ke bakaka?

      Bampangi zole na lukutakanu ya dibundu ke sala disolo ya ke monisa mutindu ya kulonga nsangu ya mbote.

      6. Beto ke lemfukaka na nsiku ya Nzambi

      Bambeni sosaka kukanga Bakristu ya ntete nzila ya kulonga nsangu ya mbote. Kansi bo salaka ngolo sambu na kunwanina ‘nswa ya kulonga nsangu ya mbote’ na ntwala ya bamfumu. (Bafilipi 1:7) Bambangi ya Yehowa ke salaka mpi mutindu mosi bubu yai.a

      Beno tala VIDEO.

      VIDEO: Bo Ke Nwaninaka Nswa ya Kulonga Nsangu ya Mbote na Batribinale (2:28)

      Beno tanga Bisalu 5:27-42 mpi na nima beno pesa mvutu na ngiufula yai:

      • Sambu na nki beto ta bika ve ata fioti kulonga nsangu ya mbote ata bambeni kubuyisa beto?​—Tala verse 29, 38 mpi 39.

      MUNTU YA NKAKA LENDA YULA NGE NDE: “Sambu na nki Bambangi ya Yehowa ke longaka nzo na nzo?”

      • Inki mvutu nge ta pesa?

      NA BUNKUFI

      Yezu songaka balongoki na yandi na kulonga nsangu ya mbote na bansi yonso. Yehowa ke sadisaka bansadi na yandi na kusala kisalu yai.

      Inki Nge Me Simba?

      • Banani ke longaka nsangu ya mbote na ntoto ya mvimba?

      • Inki mutindu kisalu na beto ya kulonga nsangu ya mbote ke monisaka nde beto ke zolaka bantu ya nkaka?

      • Keti nge ke ndima nde kisalu ya kulonga nsangu ya mbote ke pesaka beto kiese? Sambu na nki?

      Mambu ya Kusala

      TALA MPI

      Tala mutindu Bambangi ya Yehowa ke longaka nsangu ya mbote na bambanza ya nene.

      Kampanie ya Sipesiale ya Kulonga Nsangu ya Mbote na Bisika ya Bantu Mingi na Paris (5:11)

      Inki mutindu Bambangi ya Yehowa ke sadisaka bantu yina ke tinaka babwala na bo?

      Bo Ke Pesa Bantu ya Me Tina Babwala na Bo Masa ya Kimpeve (5:59)

      Landa mutindu mpangi-nkento mosi kele na kiese sambu yandi ke longaka ntangu yonso nsangu ya mbote.

      Mono Kele na Kiese Mpila Mono Ponaka Kisalu Yai (6:29)

      Tala mutindu balukanu ya mfunu yina batribinale ya nkaka bakaka me salaka nde beto kuma kulonga kukonda mpasi nsangu ya mbote.

      “Bansamuni ya Kimfumu Ke Nata Mambu na Batribinale” (Kimfumu ya Nzambi Ke Yala!, kapu 13)

      a Nzambi muntu ke pesaka beto nswa ya kulonga. Yo yina beto Bambangi ya Yehowa, beto ke vandaka ve na mfunu ya kulomba bamfumu nswa sambu na kulonga nsangu ya mbote.

  • Kimfumu ya Nzambi Ke Yala Bubu Yai!
    Zinga Mvula na Mvula!—Kulonguka ya Biblia Yina Ta Natila Nge Mambote

    • 5. Mambu ya nsi-ntoto me sobaka banda na 1914

      Beno tala VIDEO.

      VIDEO: Mambu ya Nsi-Ntoto Me Sobaka Banda na 1914 (1:10)

      Yezu tubilaka mambu yina ta salama na ntoto ntangu yandi ta kuma Ntotila. Beno tanga Luka 21:9-11 mpi na nima beno pesa mvutu na ngiufula yai:

      • Inki mambu na kati ya mambu yai nge ke monaka to ke waka?

      Ntumwa Polo tubilaka bikalulu ya mbi yina bantu ta kuma ti yo na bilumbu ya nsuka ya bimfumu ya bantu. Beno tanga 2 Timoteo 3:1-5 mpi na nima beno pesa mvutu na ngiufula yai:

      • Inki bikalulu na kati ya bikalulu yai ya mbi nge ke monaka na bantu bubu yai?

      Biwanisu: Yo ke monisa mambu ya ke salama na nsi-ntoto mpi bikalulu yina bantu me kumaka ti yo na bilumbu ya nsuka. 1. Mfumu mosi ya basoda me telama, yandi me nangula maboko mpi ke tuba na ndinga ya ngolo. 2. Banzo ya kubwa na nima ya kunikana ya ntoto. 3. Baavio ya bitumba. 4. Bantu me lwata bamaske mpi ke tambula na bala-bala. 5. Bantu ya mubulu me panza banzo zole ya etage ya nda mingi mpi yo ke pela tiya. 6. Bakala mosi ke kuditobula bima ya ke lawusaka. 7. Bakala mosi me kanga dikofi mpi yandi ke nganina nkento na yandi. 8. Bima ya ke lawusaka mpi malafu ya mutindu na mutindu. 9. Bankento zole me lwata bilele yina bantu mingi ke lwata, bo me lwata mayaka ti bima ya makutu mpi bo ke kanga foto. 10. Muntu mosi ke budisa miziki na konsere. 11. Muntu mosi ya kimvuka ya bantu ya mubulu ke zola kuta kima mosi.

      6. Inki beto fwete sala mutindu beto me zaba nde Kimfumu ya Nzambi ke yala?

      Beno tanga Matayo 24:3, 14 mpi na nima beno pesa mvutu na bangiufula yai:

      • Inki kisalu ya mfunu ke monisa nde Kimfumu ya Nzambi ke yala bubu yai?

      • Inki mutindu nge lenda pesa maboko na kisalu yango?

      Kimfumu ya Nzambi ke yala bubu yai mpi kubika fioti yo ta yala ntoto ya mvimba. Beno tanga Baebreo 10:24, 25 mpi na nima beno pesa mvutu na ngiufula yai:

      • Inki konso muntu na kati na beto fwete sala mutindu beto “ke mona kilumbu ke finama”?

      Bifwanisu: 1. Longoki mosi ya Biblia me kwenda na lukutakanu ya Bambangi ya Yehowa. 2. Longoki yango ke longa muntu mosi ya yandi me zabanaka ti yandi nsangu ya mbote.

      Inki nge ta sala kana nge me longuka kima mosi ya lenda sadisa mpi kugulusa bantu ya nkaka?