Banani Kesamuna Nsangu ya Mbote?

“Bo ta longaka . . . na nsi-ntoto ya mvimba.”​—MATAYO 24:14.

BAMBANGI ya Yehowa ke na kusamuna nsangu ya mbote na nsi-ntoto ya mvimba. Bo kesalaka yo na mitindu ya kuswaswana. Mutindu mosi kele na nzila ya . . .

Disolo na Kati ya Bantu Zole to Mingi. Bonso Yezu mpi balongoki na yandi, Bambangi ya Yehowa kekwendaka na bantu sambu na kuzabisa bo nsangu ya mbote. (Luka 8:1; 10:1) Bo kevingilaka ve kaka nde bantu kukwisa na bo. Kuzabisa bantu mambu ya metala Kimfumu ya Nzambi kele kima yina Bambangi yonso​—bamilio kuluta nsambwadi—​kesalaka. Bo kelongaka na nzo na nzo, na balabala, na nzila ya telefone, mpi na mitindu yankaka. Na mvula yina meluta, Bambangi kulutisaka kiteso ya bangunga kuluta miliare mosi ti ndambu na kisalu yai.

Bo kelongaka bantu ve kaka mambu ya metala Kimfumu ya Nzambi kansi mpi ‘mambu yonso ya Yezu kusongaka bo.’ (Matayo 28:20) Mbala na mbala, bo kelongukaka Biblia ya ofele ti bantu kuluta bamilio nana na banzo na bo.

Bambangi kesamuna na ntoto ya mvimba​—na bansi 236. Bo kelongaka bantu ya bansi ya kuswaswana. Bo kelongaka na bansi mpi na bambanza, na mfinda ya Amazone mpi ya Sibérie, na ntoto ya zelo na zelo ya Afrika mpi na Bangumba ya Himalaya. Bo kefutaka bo ve sambu na kisalu yai; bo kesalaka yo na mbongo na bo mosi mpi kesadilaka ntangu na bo mosi, mpi zola ya Nzambi ti ya mfinangani kepusaka bo na kusala mutindu yina. Bo kezabisaka mpi nsangu ya mbote na nzila ya . . .

Balutiti ya Kunyemama. Zulunalu yai, yina zina na yo ya mvimba kele, Nzozulu ya Nkengi Kesamunaka Kimfumu ya Yehowa, kebasikaka ntangu yai na bandinga 185 mpi ntalu ya konso nimero yina kebasikaka kele kuluta bamilio 42. Zulunalu yankaka, Réveillez-vous !, yina kesamunaka mpi Kimfumu, kebasikaka na bandinga 83 mpi ntalu ya konso nimero yina kebasikaka kele kiteso ya bamilio 40.

Mikanda, tumikanda, batrakiti, ba CD/​MP3, mpi ba DVD yina ketendulaka malongi ya Biblia kele na bandinga kiteso ya 540. Bambangi mebasisaka mpi mekabulaka bamiliare kuluta 20 ya bisadilu yai na bamvula kumi ya meluta, yina mwayene na yo kele ya bisadilu tatu na konso muntu na nsi-ntoto!

Bambangi ya Yehowa menyemaka to melombaka bantu yankaka na kunyemina bo bambalula ya kuswaswana ya Biblia. Les Saintes Écritures​—Traduction du monde nouveau—​yina Bambangi mebalulaka, menyemaka, mpi mekabulaka—kele ntangu yai na mvimba to na ndambu na bandinga 96. Bo mekabulaka bakopi kuluta bamilio 166. Bambangi kesamunaka mpi nsangu ya mbote ya Kimfumu na nzila ya . . .

Balukutakanu ya Bukristu. Balukutakanu yina bo kesalaka konso mposo na Banzo ya Kimfumu kevandaka ve kaka bisalu ya dibundu; yo kesalamaka sambu na kulonga. Badiskure kesalamaka na bantu-dyambu yina kekatukaka na Biblia, mpi bo kelongukaka Biblia na nsadisa ya Nzozulu ya Nkengi mpi mikanda yankaka. Na balukutakanu, Bambangi kelongukaka mpi mutindu ya kuvanda bansamuni ya kikesa ya nsangu ya mbote.

Bambangi kelongukaka malongi ya kiteso mosi na mabundu kuluta 107 000 yina kele na nsi-ntoto ya mvimba, dyambu yina kemonisaka bumosi na bo. Bantu yonso lenda kwisa na balukutakanu yai. Bo kesalaka ve nsisani na balukutakanu yai. Ya kyeleka, mambu yai yonso zolaka kuvanda mfunu ve kana Bambangi vandaka kusadila ve mambu yina bo kesamunaka. Yo yina, bo kesalaka bikesa sambu kusamuna nsangu ya mbote na nzila ya . . .

Mbandu na Bo. Bo kesalaka ngolo sambu na kupesa mbandu ya mbote ya mefwana na Bakristu, na kusalaka yonso ya bo lenda sala sambu na kusadila bankaka mambu mutindu bo kezolaka nde bo sadila bo. (Matayo 7:12) Ata bo kele bantu ya kukonda kukuka mpi kesalaka bifu bantangu yankaka, bo kevandaka na mpusa ya masonga ya kumonisa zola na bantu yonso na kulongaka bo kaka ve nsangu ya mbote kansi mpi na kusadisaka bo kana mpila kele.

Bambangi ya Yehowa kesalaka ve bikesa sambu na kusoba nsi-ntoto na kisalu na bo ya kusamuna. Kansi, ntangu Yehowa tamona nde kisalu yango mesalama na mutindu yandi zodilaka, nsuka takwisa, mutindu Yezu kubikulaka. Dyambu yango tatendula nki sambu na ntoto mpi bantu ya kele na ntoto?

[Kifwanisu ya kele na lutiti 7]

Bambangi ya Yehowa kesamuna nsangu ya mbote na nsi-ntoto ya mvimba

“Nsuka” Kele Inki?

“. . . Ebuna na nima, nsuka . . . ta kwisa.”​—MATAYO. 24:14.

NA BILUMBU yina meluta, bantu vandaka kutubila mambu mingi ya metala nsuka ya nsi-ntoto. Mikanda, bafilme mpi bazulunalu, banda na yina kesekisaka tii na yina ketubilaka bangindu ya siansi, vandaka kutubila nsuka bonso kilumbu mosi ya mbi mpenza. Yo vandaka kutubila mpi lufwa ya ntoto na mvita mosi ya nikleyere, ntangu yo tatutana ti ngolo mosi ya zulu (astéroïde), na maladi yina kefwaka, na kusoba ya ba climat na kintulumukina, to na basoda yina takatuka na mpwasa.

Mabundu kele mpi ti mabanza ya kuswaswana na yina metala nsuka; bamingi kelongaka nde “nsuka” tafwa bima yonso yina kezingaka ya kele na nsi-ntoto. Sambu na kutubila Matayo 24:14, muntu mosi ya kelongukaka teolozi kusonikaka bangogo yai ya kepesa boma: “Verse yai kele mosi ya baverse ya kuluta mfunu na Ndinga ya Nzambi ya mvimba . . . Bantu ya bilumbu na beto kevingila mbungula mosi ya nene yina tasalama ntama mingi ve, kansi bantu fyoti mpamba na kati na beto kemeka kubakisa kyeleka yai.”

Mbala mingi, kutadila mambu mutindu yai kesalaka nde bantu kuvila kyeleka mosi ya mfunu: Yehowa Nzambi kusalaka ntoto mpi ‘kukumisaka yo ngolo; yandi salaka yo ve nde yo vanda ya mpamba, kansi yandi yidikaka yo sambu bantu kuzinga muna.’ (Yezaya 45:18) Yo yina, ntangu Yezu kutubilaka “nsuka,” yandi zolaka kutuba ve nde ntoto tafwa; mpi nde bantu yonso tafwa. Kansi, yandi zolaka kutuba nde bantu ya mbi​—bayina kebuyaka na ntu ngolo yonso kuzinga na kuwakana ti lutwadisu ya zola ya Yehowa—​tafwa.

Beto tadila mbandu mosi. Yindula nde nge vandaka ti nzo mosi ya kitoko mpi nge pesaka nzila nde bantu kuzinga ya mpamba kukonda kufuta mbongo. Bantu yankaka vandaka kuzinga na ngemba na kati na bo mpi vandaka kutanina nzo na nge. Kansi, bantu yankaka vandaka kusala kima ve kansi bo vandaka kubasisa mavwanga, kunwana, mpi kunyokula bantu yina ya mbote. Bo bebisaka nzo na nge mpi kubuyaka na ntu ngolo yonso kuwila nge ntangu nge vandaka kubuyisa bo na kusala mpidina.

Inki nge zolaka kusala sambu na kuyidika dyambu yina? Keti nge zolaka kufwa nzo na nge? Ata fyoti ve. Ntembe kele ve nde, nge zolaka kubasisa bantu yina ya mbi mpi kuyidika bisika yina bo bebisaka.

Yehowa tasala mutindu mosi. Na nsadisa ya mpeve santu, muyimbi-bankunga kusonikaka nde: “Bantu yina ke tulaka ntima na Mfumu Nzambi bo ta zinga na ngemba na ntoto, kansi bantu yina ke salaka mbi Nzambi ta kula bo. Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto.”​—Nkunga 37:9-11.

Ntumwa Piere kutubilaka dyambu yina. Na ngolo ya mpeve yandi sonikaka nde: “Nzambi salaka zulu ti ntoto katuka ntama. Yandi basisaka ntoto na masa, yandi salaka ntoto mpi na masa; kiteso mosi, Nzambi fwaka bantu ya ntama kaka na masa yina fulukaka na ntoto yonso.” (2 Piere 3:5, 6) Awa, ntumwa Piere ketubila Mvula ya Ngolo ya bilumbu ya Noa. Bantu ya mbi kufwaka, kansi ntoto kufwaka ve. Mvula ya Ngolo yina kunokaka na ntoto ya mvimba kupesaka “mbandu na bantu ya mbi sambu na mambu yina ta bwila bo.”​—2 Piere 2:6.

Na nima, Piere kuyikaka dyaka nde: “Nzambi . . . me bumbaka zulu ti ntoto yai ke zingaka tii bubu yai, sambu na kufwa yo kimakulu na tiya.” Kana beto suka kaka na bangogo yai, beto lenda vanda ti dibanza ya kifu. Kansi simba nde, verse yai kelanda kutuba nde: ‘Nzambi tafwa bantu ya mbi.’ Lufwa yai kele ve sambu na ntoto kansi sambu na bantu ya mbi. Inki mambu tasalama na nima? Piere kusonikaka nde: “Beto ke vingila nde Nzambi kubasisa zulu ya mpa [Kimfumu ya Mesia ya Nzambi] ti ntoto ya mpa, [kimvuka ya bantu ya lunungu] yina ya yandi silaka beto; kuna bantu yonso ta lemfuka kaka na Nzambi konso ntangu.”​—2 Piere 3:7, 13.

Mbikudulu ya Biblia kemonisa dyaka nde ntangu yina “nsuka” takwisa mefinama. Tanga Matayo 24:3-14 mpi 2 Timoteo 3:1-5 sambu na kumona mambu yina kendimisa bukyeleka yai.a

Keti nge keyindula nde yo keyitukisa nge na kumona nde bantu mingi kele ti bangindu mingi ya kisakasaka na yina metala Matayo 24:14, verse yina ata mwana-fyoti lenda bakisa? Yo kele ti bikuma yina kesala nde bantu kuvanda ti bangindu ya kuswaswana. Satana mekangaka bantu meso sambu bo bakisa ve bakyeleka ya mfunu ya kele na Ndinga ya Nzambi. (2 Korinto 4:4) Dyaka, Nzambi mebumbaka lukanu na yandi na bantu ya lulendo mpi memonisaka yo na bantu ya kudikulumusa. Sambu na dyambu yai, Yezu kutubaka nde: “Tata, nge muntu kele Mfumu ya ntoto ti ya zulu, mono ke pesa nge mersi, sambu mambu yina ya nge me bumbaka na bantu ya mayele ti na bantu yina me longukaka, nge me kwisa kuzabisa yo na bantu yina me longukaka ve.” (Matayo 11:25) Yo kele mpenza lukumu na kuvanda na kati ya bantu ya kudikulumusa yina kebakisaka ntendula ya Kimfumu ya Nzambi, mpi kevingilaka balusakumunu yina yo tanata na bantu yonso yina kepesaka maboko na Kimfumu yango!