Bambangi Bakristu Sambu Na Kimfumu Ya Nzambi
“ ‘Beno fwete kusamuna bantoma’ ya muntu yina kubingaka beno katuka na tombe tii na nsemo na yandi ya kuyitukisa.”—1 PIERE 2:9, NW.
NA BANTANGU ya kuyitaka ntangu ya Bukristu, lisiti ya nda ya bambangi kumonisaka na kikesa yonso nde Yehowa kele Nzambi mosi kaka ya kyeleka. (Baebreo 11:4–12:1) Ngolo na lukwikilu na bau, bau kulemfukilaka bansiku ya Yehowa nkatu kubanga mpi bau kubuyaka na kusumuka na mambu ya metala lusambu. Bau kutaka kimbangi ya ngolo sambu na kimfumu ya Yehowa ya luyalanganu ya mvimba.—Nkunga 18:21-23; 47:1, 2.
2 Mbangi ya nsuka mpi ya kuluta nene ya ntangu ya kuyitaka ntangu ya Bukristu kuvandaka Yoane Mbotiki. (Matayo 11:11) Yandi kupesamaka dibaku ya kusamuna kukwisa ya Nsolami, mpi yandi kumonisaka Yezu na bantu bonso Mesya ya kusilamaka. (Yoane 1:29-34) Yezu kele mbangi ya kuluta nene ya Yehowa, “Mbangi ya kwikama mpi ya kyeleka.” (Kusonga 3:14, NW) Sambu Izraele ya kinsuni kubuyaka Yezu, Yehowa kubuyaka bau mpi kuponaka dibuta ya mpa, Izraele ya kimpeve ya Nzambi, sambu yau kuvanda mbangi na yandi. (Yezaya 42:8-12; Yoane 1:11, 12; Galatia 6:16) Piere kutubilaka mbikudulu mosi yina metala Izraele mpi kumonisaka nde yau kelungana na “Izraele ya Nzambi,” dibundu ya Bukristu, ntangu yandi kutubaka nde: “Beno kele bantu yina ya Nzambi solaka, beno kele banganga-Nzambi ya Mfumu ya nene, beno kele bantu ya santu mpenza. Nzambi solaka beno sambu beno [fwete kusamuna bantoma ya muntu yina kubingaka beno katuka na tombe tii na nsemo na yandi ya kuyitukisa, NW].”—1 Piere 2:9; Kubasika 19:5, 6; Yezaya 43:21; 60:2.
3 Bangogo ya Piere kemonisa nde mukumba ya ntete ya Izraele ya Nzambi kele ya kuta kimbangi na bantu yonso na yina metala nkembo ya Yehowa. Na bilumbu na beto, “kibuka ya nene” ya bambangi yina kekembila mpi Nzambi na meso ya bantu yonso, mevukanaka ti dibuta yai ya kimpeve. Bau keboka na ndinga ya ngolo sambu bantu yonso kuwa nde: “Nzambi na beto yina me vanda na kiti ya kimfumu, ti Mwana-dimeme, bo bantu ke gulusaka beto.” (Kusonga 7:9, 10; Yezaya 60:8-10) Inki mutindu Izraele ya Nzambi ti bankundi na yau lenda kulungisa kimbangi na bau? Na nsadisa ya lukwikilu ti bulemfu na bau.
Bambangi ya Luvunu
4 Lukwikilu ti bulemfu kelombaka kuzinga na kulandaka minsiku ya vumi. Mfunu ya dyambu yai kemonana na yina ya Yezu kutubaka sambu na bamfumu ya mabundu ya Bayuda ya bilumbu na yandi. Bau “kubakaka kiti ya Moize” bonso balongi ya Nsiku. Nkutu bau kutindaka bamisionere na kubalula ntima ya bantu ya kukonda lukwikilu. Kansi, Yezu kutubilaka bau nde: “Beno ke kwendaka kutambula na banzadi-mungwa ti na nsi-ntoto ya mvimba sambu na kusosa ata muntu mosi kele Muyuda ve ti kusala yonso na mpila nde yandi kukuma Muyuda. Ebuna, kana yandi me kuma Muyuda, beno ke sala na mpila nde yandi kuvanda muntu mosi ya kuluta beno na mbi yina me fwana kwenda na [Gehenne, NW].” Bantu ya mabundu yai kuvandaka bambangi ya luvunu—lulendo, lengu, mpi nkatu zola. (Matayo 23:1-12, 15) Na okazio mosi Yezu kutubilaka Bayuda ya nkaka nde: “Tata na beno kele [Dyabulu, NW], beno ke zolaka kusala mambu yina ya tata na beno ke zolaka.” Sambu na inki yandi kukaka kutuba kima ya mutindu yina na dibuta ya kusolama ya Nzambi? Sambu bau zolaka ve kubumba bangogo ya Mbangi ya nene ya Yehowa.—Yoane 8:41, 44, 47.
5 Mutindu mosi, na bamvunkama kubanda na ntangu ya Yezu, bankama ya mafuku ya bantu na kati ya Kikristu mebulaka ntulu nde bau kele balongoki na yandi. Kansi, bau mesalaka ve luzolo ya Nzambi mpi, mpila yina, bau kendimamaka ve na Yezu. (Matayo 7:21-23; 1 Korinto 13:1-3) Kikristu metindaka bamisionere, nkatu mbefula, bamingi na kati na bau kuvandaka masonga. Kansi, bau kulongaka bantu na kusambila nzambi ya Butatu Busantu yina keyokaka bansumuki na bilungi ya tiya, mpi bantu mingi na kati ya bankwikidi na bau kemonisaka nzikisa ya fyoti nde bau kele Bakristu. Mu mbandu, Rwanda, nsi mosi ya Afrika, kuvandaka ntoto mosi ya mbutu sambu na bamisionere ya Katolika ya Roma. Kansi, Bakatolika ya Rwanda kuvukanaka na ntima mosi na mvita ya bikanda ya mekatuka kusalama na nsi yango. Mbutu na kati ya kilanga yango ya bamisionere kemonisa nde yau kubakaka ve kimbangi ya Bukristu ya kyeleka na Kikristu.—Matayo 7:15-20.
Kuzinga na Kulandaka Minsiku ya Vumi
6 Nkadilu ya mbi ya bantu yina kebulaka ntulu nde bau kele Bakristu kenataka nsembolo na zulu ya “nzila ya kieleka.” (2 Piere 2:2) Mukristu ya kyeleka kezingaka na kuwakana ti minsiku ya vumi. Yandi keyibaka ve, kekusaka ve, keyibaka ve bamvutu na nzo-nkanda to na mambu ya nkaka, to kesalaka ve mansoni. (Roma 2:22) Ya kyeleka, yandi kegondaka ve nkweno. Bakristu babakala ya kekengilaka na zola yonso mabuta na bau. Bankento kendimaka kinkengi yina na bulemfu yonso. Bana kelongamaka na bibuti na bau mpi mpila yina, bau kebongisamaka sambu na kukuma Bakristu ya bambuta ya kebaka mukumba na bau. (Efezo 5:21–6:4) Ya kyeleka, beto yonso kele ya kukonda kukuka mpi kesalaka bifu. Kansi, Mukristu ya kyeleka kelemfukilaka bansiku ya Biblia mpi kesalaka kikesa ya kyeleka sambu na kusadila yau. Yau kemonanaka na bantu ya nkaka mpi yau kepesaka kimbangi ya mbote. Na baokazio ya nkaka, bayina vandaka kutelamanina ntete kyeleka kutalaka nkadilu ya mbote ya Mukristu mosi mpi bau kunungamaka.—1 Piere 2:12, 15; 3:1.
7 Yezu kumonisaka ndambu ya mfunu ya nkadilu ya Bukristu ntangu yandi kutubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoane 13:35) Inza ya Satana kele ya kufuluka ti “kukonda lunungu, mambi, bizolazola, kutula meso na bima ya ngani, kugonda, maswana, luvunu, bungubi, songi-songi, kutonga, bambeni ya Nzambi, kilau, lulendo, kudisonga, zola ya mambi, kukonda bulemfu na bibuti.” (Roma 1:29, 30, NW) Na nzyunga ya mutindu yai, organizasio ya inza ya mvimba ya kele ti zola fwete kuvanda nzikisa ya ngolo ya mpeve ya Nzambi ya kesala—kimbangi ya ngolo. Bambangi ya Yehowa kele organizasio ya mutindu yina.—1 Piere 2:17.
Bambangi Kele Balongoki ya Biblia
8 Sambu na kununga na kupesa kimbangi ya mbote, Mukristu fwete kuzaba mpi kuzola minsiku ya Yehowa ya lunungu mpi kuyina mpenza mbebisa ya inza. (Nkunga 97:10) Inza kebendaka na kusikisaka kuyindula na yau, mpi mpeve na yau lenda kuvanda mpasi na kutelamanina. (Efezo 2:1-3; 1 Yoane 2:15, 16) Inki lenda kusadisa beto na kulunda nkadilu ya mbote ya mabanza? Kulonguka ya Biblia ya mbala na mbala mpi ya kufuluka na ntendula. Nsoniki ya Nkunga 119 kuvutukilaka mbala mingi zola na yandi ya nsiku ya Yehowa. Yandi kutangaka yau mpi kuyindululaka na zulu na yau mbala na mbala, “kilumbu ya mvimba.” (Nkunga 119:92, 93, 97-105) Yau yina, yandi kukaka kusonika nde: “Mono ke zolaka mambu ya luvunu ve ata fyoti, mono ke buyaka yo mpenza, kansi mono ke zolaka bansiku na nge.” Dyaka, zola na yandi ya mudindu kupusaka yandi na kusala. Yandi ketuba nde: “Mono ke kumisa nge mbala nsambwadi-nsambwadi konso kilumbu sambu nge ke sambisaka bantu mbote.”—Nkunga 119:163, 164.
9 Mutindu mosi, kulonguka na beto ya mbala na mbala ya Ndinga ya Nzambi mpi kuyindulula na zulu na yau tasimba bantima na beto mpi tapusa beto na ‘kukumisa yandi’—kuta kimbangi na yina metala Yehowa—mbala na mbala, ata “mbala nsambwadi-nsambwadi konso kilumbu.” (Roma 10:10) Na kuwakana ti dyambu yai, nsoniki ya nkunga ya ntete ketuba nde muntu yina keyindululaka mbala na mbala na zulu ya ndinga ya Yehowa “ta kuma bonso nti yina ke menaka penepene na mwa-masa; yo ke butaka bambuma na yo konso mvula, matiti na yo mpi ke yumaka ve. Mambu yonso ya yandi ke salaka ke vandaka mbote.” (Nkunga 1:3) Ntumwa Polo mpi kumonisaka ngolo ya Ndinga ya Nzambi ntangu yandi kusonikaka nde: “Masonuku yonso kele ya kupemama na Nzambi mpi mfunu sambu na kulonga, na kusemba, sambu na kuvutula mambu na ndonga, sambu na kulonga na lunungu, na mpila nde muntu ya Nzambi lenda kukuma mpenza ya kukuka sambu na bisalu yonso ya mbote.”—2 Timoteo 3:16, 17, NW.
10 Kuyela ya nswalunswalu ya ntalu ya bansambidi ya kyeleka na mvunkama yai ya 20 kemonisa lusakumunu ya Yehowa. Na ntembe ve, bonso kimvuka, Bambangi yai ya ntangu na beto sambu na kimfumu ya Nzambi mekunaka zola ya nsiku ya Yehowa na kati ya bantima na bau. Bonso muyimbi ya Bankunga, bau kepusama na kulemfukila nsiku na Yandi mpi na kuta kimbangi na kwikama yonso “mpimpa ti mwini” na yina metala nkembo ya Yehowa.—Kusonga 7:15.
Bisalu ya Ngolo ya Yehowa
11 Na mvu-nkama ya ntete, mpeve santu kupesaka ngolo na bambangi Bakristu ya kwikama sambu na kusala bimangu, yina kupesaka nzikisa ya ngolo nde kimbangi na bau kuvandaka ya kyeleka. Ntangu Yoane Mbotiki kuvandaka na boloko, yandi kutindaka balongoki na yandi na kuyufula Yezu nde: “Keti nge kele muntu yina fweti kwisa, to beto fweti vingila muntu ya nkaka?” Yezu kuvutulaka ve nde ee to ve. Kansi, yandi kutubaka nde: “Beno kwenda kuzabisa Yoane mambu yai ya beno ke wa ti ya beno ke mona: Bantu ya kufwa-meso ke mona diaka, bantu ke na makulu ya kifu ke tambula, bantu ke na maladi ya lepre ke beluka, bantu ya kufwa-makutu ke wa, bantu yina me fwa ke telema na lufwa, bansukami ke wa Nsangu ya Mbote. Kiese na muntu yina ke na ntima zole ve sambu na mono.” (Matayo 11:3-6) Bisalu yai ya ngolo kuvandaka bonso kimbangi sambu na Yoane nde Yezu kuvandaka mpenza “Muntu yina fweti kwisa.”—Bisalu 2:22.
12 Mutindu mosi, mingi na kati ya balandi ya Yezu kubelulaka bantu ya maladi mpi nkutu bau kufutumunaka bafwa. (Bisalu 5:15, 16; 20:9-12) Bimangu yai kuvandaka bonso kimbangi ya kukatukaka na Nzambi yandi mosi sambu na mambote na bau. (Baebreo 2:4) Mpi bisalu ya mutindu yina kumonisaka ngolo ya Yehowa ya kuluta mingi. Mu mbandu, yau kele ya kyeleka nde Satana, kele “mfumu ya inza,” kele na mwaye ya kunata lufwa. (Yoane 14:30; Baebreo 2:14) Kansi, ntangu Piere kufutumunaka Dorkasi, nkento ya kwikama, yandi kukaka kusala yau kaka na ngolo ya Yehowa, sambu Yandi kaka muntu lenda kuvutula luzingu.—Nkunga 16:10; 36:9; Bisalu 2:25-27; 9:36-43.
13 Bubu yai, bisalu yango ya kimangu kesalamaka dyaka ve. Lukanu na yau mesalamaka. (1 Korinto 13:8) Ata mpila yina, beto kele kaka ti masolo na yau na kati ya Bilbia, yina batadi mingi kutelaka kimbangi. Bubu yai, ntangu Bakristu ketula dikebi na mambu yai ya kyeleka, bisalu yina kepesa kaka kimbangi ya ngolo sambu na ngolo ya Yehowa. (1 Korinto 15:3-6) Dyaka, na ntangu ya ntama na bilumbu ya Yezaya, Yehowa kumonisaka mbikudulu ya kyeleka bonso nzikisa ya nene ya kumonisaka nde Yandi kele Nzambi ya Kyeleka. (Yezaya 46:8-11) Bambikudulu ya Biblia mingi ya kupemama na Nzambi kelungana bubu yai—Mingi na kati na yau kelungana na dibundu ya Bukristu. (Yezaya 60:8-10; Daniele 12:6-12; Malashi 3:17, 18; Matayo 24:9; Kusonga 11:1-13) Ye mpi na kumonisaka mbotembote nde beto kezinga na “bilumbu ya nsuka,” ndungisa ya bambikudulu yai kenungisa Yehowa bonso Nzambi mosi kaka ya kyeleka.—2 Timoteo 3:1.
14 Nsukansuka, Yehowa kesala kaka bima ya nene, bima ya ngituka, sambu na bansadi na yandi. Nsemo ya kekuma mingi malembemalembe na yina metala kyeleka ya Biblia ketwadisama na mpeve ya Yehowa. (Nkunga 86:10; Kusonga 4:5, 6) Kuyela ya kuluta mingi ya metubilama na inza ya mvimba kele nzikisa ya kemonisa nde Yehowa ‘kesala nswalu mambu yai . . . na ntangu na yo.’ (Yezaya 60:22) Ntangu munyokudi ya ngolo kebwaka na nsi mosi mpi ya nkaka na bilumbu ya nsuka, mvibudulu ya kikesa ya bansadi ya Yehowa kesalamaka sambu na nsadisa ya ngolo ya mpeve santu. (Nkunga 18:1, 2, 17, 18; 2 Korinto 1:8-10) Ee, nkenda ya bubu yai ya Bambangi ya Yehowa kele yau mosi kimbangi ya ngolo ya kemonisa nde Yehowa kele Nkwa Kimfumu.—Zakaria 4:6.
Nsangu ya Mbote ya Fwete Kusamunama
15 Yehowa kuponaka Izraele bonso mbangi na yandi sambu na makanda. (Yezaya 43:10) Kansi, kaka bantu ya Izraele ndambu kupesamaka ntuma na Nzambi na kwenda kulonga bantu yina kuvandaka ve bantu ya Izraele, mpi yau kuvandaka ntangu yonso sambu na kusamuna bamfundusu ya Yehowa. (Yeremia 1:5; Yonasi 1:1, 2) Ata mpila yina, bambikudulu yina kele na Masonuku ya Kiebreo kemonisa nde, kilumbu, Yehowa zolaka kubalula dikebi na yandi na mabuta mingi, mpi yandi mesalaka yau na nzila ya Izraele ya kimpeve ya Nzambi. (Yezaya 2:2-4; 62:2) Na ntwala ya kumata na zulu, Yezu kutumaka Balandi na yandi nde: “Beno kwenda kukumisa bantu [ya mabuta, NW] yonso balongoki na mono.” (Matayo 28:19) Na ndambu na yandi, Yezu kudipesaka mingi na “bantu ya Izraele yina kele bonso mameme ya me vilaka,” balandi na yandi kutindamaka na “mabuta yonso,” ata nkutu na “nsuka ya ntoto.” (Matayo 15:24; Bisalu 1:8) Kimbangi ya Bukristu kulombamaka nde bantu yonso kuwa yau.
16 Polo kumonisaka nde yandi kubakisaka mambu yai mbote. Penepene na mvula 61 T.B., yandi kukaka kutuba nde nsangu ya mbote vandaka “kubuta mbuma mpi kukuma mingi na inza ya mvimba.” Nsangu ya mbote kuvandaka ve kaka ya dibuta mosi to na luvambunu mosi, bonso yina vandaka kutadila “lusambu ya bawanzyo.” Kansi, yau vandaka “kusamunama na lugangu ya mvimba yina kele na nsi ya zulu.” (Kolosai 1:6, 23; 2:13, 14, 16-18, NW) Yau yina, Izraele ya Nzambi na mvunkama ya ntete kulungisaka kisalu ya “ ‘kusamuna bantoma’ ya muntu yina kubingaka [bau] katuka na tombe tii na nsemo na yandi ya kuyitukisa.”
17 Ata mpila yina, kisalu yina ya kusamuna ya mvunkama ya ntete kuvandaka kaka kumeka ntomo ya mambu yina zolaka kulungana na bilumbu ya nsuka. Na kutubilaka mingimingi ntangu na beto, Yezu kutubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:14; Marko 13:10) Keti mbikudulu yai melunganaka? Ya kyeleka, yau melunganaka. Kubanda na luyantiku ya fyoti na 1919, kusamunama ya nsangu ya mbote mepanzanaka ntangu yai na bansi kuluta 230. Kimbangi bau kewa yau na bandambu ya madidi mingi na Nordi ti na bandambu ya ntangu mingi. Bau keta kimbangi na bakontina ya nene, mpi bisanga ya kingenga kesosama na mpila nde bantu ya kezingaka kuna lenda kubaka kimbangi. Ata nkutu na kati ya mavwanga ya nene, bonso ya Bosnie ti na Herzegovine, nsangu ya mbote kelanda na kusamunama. Bonso na mvunkama ya ntete, kimbangi kebuta mbuma “na inza ya mvimba.” Nsangu ya mbote kesamunama pwelele “na lugangu ya mvimba yina kele na nsi ya zulu.” Mbutu? Ntete, ndambu ya Izraele ya Nzambi ya “mekatuka na bansi yonso mpi bandinga yonso mpi bantu yonso mpi mabuta yonso” mevukisamaka. Ya zole, mafuku ya “kibuka ya nene” ya kukatukaka na “makanda yonso mpi na bansi yonso mpi na bantu yonso mpi bandinga yonso,” kuyantikaka na kukotisama. (Kusonga 5:9; 7:9, NW) Matayo 24:14 kelanda na kulungana na bunda.
18 Kusamunama ya nsangu ya mbote na inza ya mvimba kesadisa na kumonisa nde kumonana ya kimfumu ya Yezu meyantikaka. (Matayo 24:3) Dyaka, yau kele nzila ya kuluta nene ya “mbutu ya ntoto” kekatulama, mutindu yau ketwadisa bantu na kivuvu ya kyeleka mosi kaka sambu na bantu, Kimfumu ya Nzambi. (Kusonga 14:15, 16, NW) Sambu kaka Bakristu ya kyeleka kevukana na kusamuna nsangu ya mbote, kisalu yai ya mfunu kesadisa na kuswaswanisa Bakristu ya kyeleka ti ya luvunu. (Malashi 3:18) Na mutindu yai, yau kesala sambu na luguluku ya bayina kesamuna ye mpi ya bayina kendima. (1 Timoteo 4:16) Kuluta dyaka, kusamuna nsangu ya mbote kenata lukembilu ti lukumu na Yehowa Nzambi, yina kutumaka nde yau kusalama, yina kesadisaka bayina kesalaka yau, mpi yina kebutisaka yau mbuma.—2 Korinto 4:7.
19 Mpila ya kuyituka kele ve nde ntumwa Polo kupusamaka na kutuba nde: “Kana mono ke zabisaka ve Nsangu ya Mbote mono zolaka kumona mawa!” (1 Korinto 9:16) Bubu yai, Bakristu kekudiwaka kiteso mosi. Yau kele dibaku ya nene mpi mukumba ya nene na kuvanda “Bankundi ya kisalu ya Nzambi” na kumwangaka nsemo ya kyeleka na inza yai ya tombe. (1 Korinto 3:9, NW; Yezaya 60:2, 3) Kisalu ya kuyantikaka fyoti na 1919 mekumaka ntangu yai mingi mpenza. Penepene na Bakristu mafuku tanu keta kimbangi sambu na kimfumu ya Nzambi mutindu bau kesala bangunga kuluta mafunda ya mafuku konso mvula sambu na kunata nsangu ya luguluku na bantu ya nkaka. Kyese ya inki mutindu yau kele na kuvukana na kisalu yai ya kusantisa zina ya Yehowa! Mutindu beto kekota na mvula ya kisalu 1996, bika beto kubaka lukanu ya kukonda kuvutuka nima. Kansi, beto talunda kuluta na ntwala bangogo ya Polo kusonikilaka Timoteo nde: “Samuna ndinga, tatamana na yau.” (2 Timoteo 4:2, NW) Ntangu beto kesala mpila yina, beto kesamba ti bantima na beto ya mvimba nde Yehowa talanda na kusakumuna bikesa na beto.
[Study Questions]
1. Inki kimbangi ya ngolo kupesamaka na yina metala Yehowa na bantangu ya kuyitaka ntangu ya Bukristu?
2. (a) Nani kele Mbangi ya Yehowa ya kuluta nene? (b) Nani kuyingaka dibuta ya Izraele bonso mbangi ya Yehowa? Inki mutindu beto kezaba yau?
3. Inki kele mukumba ya ntete ya Izraele ya Nzambi mpi ya “kibuka ya nene”?
4. Sambu na inki Bayuda ya ntangu ya Yezu kuvandaka bambangi ya luvunu?
5. Inki mutindu beto kezaba nde Kikristu mepesaka kimbangi ya luvunu na yina metala Nzambi?
6. Na inki mitindu nkadilu ya mbote kele ndambu ya mfunu ya kupesila kimbangi?
7. Sambu na inki yau kele mfunu nde Bakristu kuzolana bamosi ti bankaka?
8, 9. (a) Inki mutindu muyimbi Bankunga kusyamisamaka na kulonguka na yandi ya Nsiku ya Nzambi mpi na kuyindulula na zulu na yau? (b) Na inki mitindu kulonguka ya Biblia ti kuyindulula tasyamisa beto na kulanda kupesa kimbangi?
10. Inki kemonana pwelele na yina metala bansadi ya Yehowa na bilumbu yai ya nsuka?
11, 12. Inki kulunganaka na bimangu ya Yezu ti ya balandi na yandi kusalaka?
13. (a) Na inki mutindu bimangu ya Biblia kelanda na kuta kimbangi ya ngolo ya Yehowa? (b) Inki mutindu ndungisa ya mbikudulu kele mfunu mingi na kundimisa Kinzambi ya Yehowa?
14. Na inki mitindu nkenda ya Bambangi ya Yehowa ya ntangu na beto kele kimbangi ya ngolo ya kemonisa nde Yehowa kele Nkwa Kimfumu?
15. Inki kimbangi ya kuyalumuna kulombamaka nde dibundu ya Bukristu kupesa?
16. Inki kisalu dibundu ya Bukristu ya mvunkama ya ntete kulungisaka, mpi na inki kitamina?
17. Inki mutindu Matayo 24:14 kelanda na kulungana na bunda?
18. Inki mwa mambu kele na kulungana na kusamunama ya nsangu ya mbote na inza ya mvimba?
19. Inki lukanu Bakristu yonso mesyamisama na kuvanda na yau ntangu bau kekota na mvula ya kisalu ya mpa?
[Caption on page 1]
[Bangyufula]
[Caption on page 26]
[Ntendula ya Bifwanisu ya lutiti 26]
Nkatu kuvutulama nima, nsangu ya mbote kele na kusamunama ntangu yai “na lugangu yonso ya kele na nsi ya zulu”
[Caption on page 1]
Keti Nge Keyibuka?
◻ Nani kuyingaka Izraele bonso “mbangi” ya Yehowa sambu na makanda?
◻ Inki mutindu nkadilu ya Bukristu kesadisaka na kupesa kimbangi?
◻ Sambu na inki kulonguka ya Biblia mpi kuyindulula kele mfunu sambu na Kimbangi ya Bukristu?
◻ Na inki mutindu nkenda ya Bambangi ya Yehowa ya ntangu na beto kele bonso nzikisa nde Yehowa kele Nzambi ya kyeleka?
◻ Inki kelungana na kusamunama ya nsangu ya mbote?