Bangiufula ya Batangi

Banani vandaka bapolisi ya tempelo ya Bayuda? Inki bo vandaka kusala?

Balevi ya nkaka yina vandaka ve banganga-nzambi vandaka kusala bisalu ya nkaka, mu mbandu kisalu ya bapolisi. Bo vandaka na nsi ya lutwadisu ya kapitene ya tempelo. Philo nsoniki mosi ya Muyuda ke tendula bisalu yina bapolisi yina vandaka kusala. Yandi ke tuba nde: “Balevi ya nkaka vandaka kukengila bakielo ya kukotila na tempelo, bankaka vandaka kukengila na ntwala ya kisika ya santu sambu na kukanga nzila na bantu yina vandaka ve ti nswa ya kukota na kisika ya santu, yo vanda bantu yango ke kota na luzolo to kukonda kuzaba. Balevi ya nkaka vandaka kutambula-mbula na kibansala ya tempelo sambu na kutanina yo. Konso muntu vandaka kusala yo na ntangu na yandi; bankaka na mpimpa mpi bankaka na ntangu.”

Bapolisi yai vandaka kusala mambu yonso yina bantu ya Sanedreni vandaka kusonga bo. Luyalu ya Roma pesaka bo mpamba nswa ya kuvanda ti minduki.

Joachim Jeremias muntu mosi ya mayele ke tuba nde: “Ntangu bapolisi kangaka Yezu, yandi yulaka bo nde sambu na nki bo kangaka yandi ve ntangu yandi vandaka kulonga konso kilumbu na tempelo. (Mat. 26.55) Yo fwete vanda nde Yezu yulaka ngiufula yai sambu bapolisi yina ya tempelo vandaka mpi na kati ya bapolisi yina kwisaka kukanga yandi.” Muntu yai ya mayele ke ndima nde bapolisi yina bo tindaka sambu na kukanga Yezu na mbala ya ntete, vandaka bapolisi ya tempelo. (Yoa. 7:32, 45, 46) Na nima, bantu ya Sanedreni tindaka kapitene ya tempelo mpi bapolisi ya nkaka sambu na kukanga bantumwa. Ntembe kele ve nde bapolisi yango vandaka mpi na kati ya bantu yina bendaka Polo na nganda ya tempelo.—Bis. 4:1-3; 5:17-27; 21:27-30.