Yoane vandaka kubenda kibeni dikebi ya bantu, yo vanda na mutindu yandi vandaka mpi na kutuba na yandi. Bilele na yandi vandaka ya mika ya shamo, mpi yandi vandaka kulwata mukaba ya mpusu ya mbisi. Yandi vandaka kudia bampasu ti bwiki. Inki nsangu yandi vandaka kulonga? Yandi vandaka kulonga nde: “Beno balula ntima, sambu Kimfumu ya zulu me kuma pene-pene.”—Matayo 3:2.

Nsangu yina yandi vandaka kulonga vandaka kupesa bawi na yandi kikesa. Bantu mingi bakisaka nde bo fwete balula ntima, disongidila, bo fwete soba bikalulu mpi banzila na bo, mpi kuyambula luzingu na bo ya mbi ya ntama. Bantu yina vandaka kukwisa na yandi vandaka kukatuka na ‘Yeruzalemi, na Yudea ya mvimba, mpi na babwala yonso yina vandaka na nziunga ya Yordani.’ (Matayo 3:5) Bantu mingi na kati na bo vandaka kubalula ntima. Yandi vandaka kubotika bo disongidila, yandi vandaka kudindisa bo ya mvimba na masa ya Yordani. Sambu na nki?

Yo yina, nsangu yai ya Yoane: “Beno balula ntima, sambu Kimfumu ya zulu me kuma pene-pene” fwanaka kibeni. (Matayo 3:2) Yo sadisaka bantu yonso na kuzaba kisalu yina Yezu Kristu, ntotila ya Yehowa zolaka kusala.