3, 4. (a) Inki bangogo Satana sadilaka na luyantiku ya bampukumuna zole ya ntete, mpi ziku yandi zolaka kupusa Yezu na kusala inki? (b) Inki mutindu Satana ke sadilaka mayele ya mutindu mosi bubu yai?

³ Tanga Matayo 4:1-7. Satana yantikaka bampukumuna zole ya ntete ti bangogo yai, “Kana nge kele mwana ya Nzambi.” Keti Satana tulaka ntembe nde Yezu kele ve Mwana ya Nzambi? Ve. Wanzio yai ya mbi zabaka mbote nde Yezu kele Mwana ya ntete ya Nzambi. (Bakol. 1:15) Ntembe kele ve nde Satana zabaka mpi mbote bangogo yai ya Yehowa tubaka na zulu ntangu Yezu bakaka mbotika: “Yai Mwana na mono, ya mono ke zolaka mingi, yina mono me ndima.” (Mat. 3:17) Ziku Satana zolaka kupusa Yezu na kumona kana yo fwanaka to ve na kutudila Tata na yandi ntima mpi kana Nzambi vandaka kibeni kutudila yandi dikebi. Na mpukumuna ya ntete ya kubalula matadi sambu yo kuma mampa, Satana zolaka kuyula yandi nde: ‘Kana nge kele Mwana ya Nzambi, sambu na nki Tata na nge ke pesa nge ve madia na ntoto yai ya zelo na zelo?’ Na mpukumuna ya zole ya kukatuka na zulu ya ludi ya tempelo sambu na kudilosa na ntoto, Satana zolaka kuyula yandi nde: ‘Kana nge kele Mwana ya Nzambi, keti nge ke tulaka kibeni ntima nde Tata na nge ta tanina nge?’

5. Inki mvutu Yezu pesaka na bampukumuna zole ya ntete?

⁵ Beto tala mutindu Yezu pesaka mvutu na bampukumuna zole ya ntete. Yezu zabaka nde Tata na yandi vandaka kuzola yandi mpi yandi vandaka kutudila yandi ntima ya mvimba. Kukonda kuvingila, Yezu buyaka mambu ya Satana mpi yandi vutukilaka Ndinga ya Tata na yandi. Yezu vutukilaka mbote-mbote baverse yina vandaka ti zina ya Nzambi, Yehowa. (Kul. 6:16; 8:3) Mwana ya Nzambi monisaka kibeni nde yandi vandaka kutudila Tata na yandi ntima sambu yandi vandaka kusadila zina na yandi—zina yina ke ndimisaka beto nde Yehowa ta lungisa balusilu na yandi yonso.a