DILONGI 12
Mambu Yina Ta Sadisa Nge na Kulanda Kulonguka Biblia
Kulonguka Biblia ke nataka mambote mingi. Ata mpidina, yo ke vandaka ve ntangu yonso pete. Bantangu ya nkaka nge lenda kudiyula kana nge ta kuka kulonguka Biblia tii na nsuka. Sambu na nki yo kele mfunu nde nge sala bikesa ya kulanda kulonguka? Inki lenda sadisa nge na kulanda kulonguka ata nge ke kutana ti bampasi?
1. Sambu na nki kulonguka Biblia kele mfunu?
Biblia, “Ndinga ya Nzambi kele ya moyo mpi ngolo.” (Baebreo 4:12) Biblia kele mfunu mingi sambu yo ke songaka beto mambu yina Nzambi ke yindulaka mpi mutindu yandi ke tadilaka nge. Yo ta sadisa nge na kuzaba mambu mingi, na kukuma ti mayele ya kieleka mpi kivuvu. Kima ya kuluta mfunu, Biblia ta sadisa nge na kukuma nduku ya Yehowa. Kulonguka Biblia ke tomisaka mpenza luzingu na beto.
2. Sambu na nki nge fwete ndima nde malongi ya Biblia kele mfunu mingi?
Malongi ya Biblia kele bonso bimvwama ya mfunu. Yo yina Biblia ke lombaka beto na ‘kusumba kieleka mpi na kuteka yo ve ata fioti.’ (Bingana 23:23) Kana beto ke ndima nde malongi ya Biblia kele mfunu, beto ta landa kulonguka yo ata ntangu beto ke kutana ti bampasi.—Tanga Bingana 2:4, 5.
3. Inki mutindu Yehowa lenda sadisa nge na kulanda kulonguka?
Yehowa, Ngangi Nkwa-Ngolo Yonso mpi Nduku na nge, ke zola kusadisa nge na kuzaba yandi. Yandi ta pesa nge “nzala ti ngolo ya kusala mambu.” (Tanga Bafilipi 2:13.) Yo yina bantangu ya nkaka, kana nge kele na mfunu ya kukuma diaka ti nzala ya ngolo ya kulonguka to ya kusadila mambu yina nge ke longuka, yandi ta sadisa nge. Yandi ta pesa nge ngolo yina nge kele na yo mfunu sambu nge kanga ntima na bampasi to ntangu bantu ke telemina nge. Nge fwete samba Yehowa mbala na mbala sambu yandi sadisa nge na kulanda kulonguka Biblia.—1 Batesalonika 5:17.
LONGUKA MAMBU MINGI
Beto tala mambu yina lenda sadisa nge na kulanda kulonguka Biblia ata nge kele ti mambu mingi ya kusala to ata bantu ya nkaka ke telemina nge. Diaka, beto tala mutindu Yehowa ta sadisa nge na kulanda kulonguka Biblia.
4. Tula kulonguka na nge ya Biblia na kisika ya ntete
Bantangu ya nkaka, beto ke vandaka ti mambu mingi ya kusala na luzingu. Yo yina beto lenda mona nde beto kele ve ti ntangu ya kulonguka Biblia. Inki ta sadisa nge? Beno tanga Bafilipi 1:10 mpi na nima beno pesa mvutu na bangiufula yai:
Inki kele “mambu ya kuluta mfunu” na luzingu?
Inki mutindu nge lenda tula kulonguka na nge ya Biblia na kisika ya ntete?
Kana nge fulusa ekolo mosi ti zelo mpi na nima nge meka kutula matadi, kisika ya kutula matadi ta vanda ve
Kana nge tula ntete matadi, kisika ta vanda mpi sambu na kutula zelo. Mutindu mosi mpi, kana nge ke tula “mambu ya kuluta mfunu” na kisika ya ntete na luzingu na nge, nge ta zwa ntangu ya kusala mambu yango mpi mambu ya nkaka
Kulonguka Biblia ke sadisaka beto na kulungisa nzala na beto ya mambu ya kimpeve, disongidila nzala ya kuzaba mpi ya kusambila Nzambi. Beno tanga Matayo 5:3 mpi na nima beno pesa mvutu na ngiufula yai:
Inki mambote nge ta baka kana nge ke tula kulonguka ya Biblia na kisika ya ntete?
5. Landa kulonguka ata bantu ke telemina nge
Bantangu ya nkaka, bantu lenda lembisa nge nitu sambu nge bika kulonguka Biblia. Tala mambu yina kuminaka Francesco. Beno tala VIDEO mpi na nima beno pesa mvutu na bangiufula ya ke landa.
Mutindu video ke monisa yo, nki mambu banduku ya Francesco mpi bantu ya dibuta na bo salaka ntangu yandi songaka bo nde yandi ke longuka Biblia?
Inki mambote yandi bakaka sambu yandi landaka kulonguka Biblia?
Beno tanga 2 Timoteo 2:24, 25 mpi na nima beno pesa mvutu na bangiufula yai:
Inki mutindu bantu ya dibuta na beno mpi banduku na nge ke tadilaka kulonguka na nge ya Biblia?
Mutindu baverse yai ke monisa yo, nki nge fwete sala kana muntu mosi ke sepela ve sambu nge ke longuka Biblia? Sambu na nki?
6. Tula ntima nde Yehowa ta sadisa nge
Kana beto ke kumisa ngolo kinduku na beto ti Yehowa, beto ta kuma diaka ti nzala ya ngolo ya kusepedisa yandi. Ata mpidina, yo lenda vanda mpasi sambu beto yambula bikalulu na beto ya mbi sambu na kuzitisa bansiku na yandi. Kana yo me kuminaka nge dezia, kuyambula ve. Yehowa ta sadisa nge. Beno tala VIDEO mpi na nima beno pesa mvutu na bangiufula ya ke landa.
Mutindu video ke monisa yo, nki bikalulu ya mbi Jim yambulaka sambu na kusepedisa Yehowa?
Inki ke yitukisa nge na mbandu na yandi?
Beno tanga Baebreo 11:6 mpi na nima beno pesa mvutu na bangiufula yai:
Inki Yehowa ta sala sambu na bantu yina “ke sosaka yandi na masonga yonso,” disongidila bantu yina ke salaka bikesa sambu na kuzaba yandi mpi kusepedisa yandi?
Mambu yai ke monisa nde Yehowa ke waka nki mutindu ntangu yandi ke monaka bikesa yina nge ke salaka sambu na kulonguka Biblia?
MUNTU YA NKAKA LENDA YULA NGE NDE: “Sambu na nki nge ke longuka Biblia?”
Inki mvutu nge ta pesa?
NA BUNKUFI
Ata kulonguka Biblia ke vandaka ve ntangu yonso pete, yo ta sadisa nge na kuzinga mvula na mvula. Landa kutudila Yehowa ntima mpi yandi ta sakumuna nge.
Inki Nge Me Simba?
Sambu na nki malongi ya Biblia kele mfunu?
Inki mutindu nge lenda tula “mambu ya kuluta mfunu“ na kisika ya ntete?
Sambu na nki nge fwete lomba Yehowa na kusadisa nge na kulanda kulonguka Biblia?
TALA MPI
Tala mambu iya yina me sadisaka bantu mingi na kusadila ntangu na bo na mayele yonso.
“Mutindu Nge Lenda Sadila Ntangu na Mayele Yonso” (Disolo ya kele na Telama!)
Tala mutindu Yehowa sadisaka nkento mosi yina bakala na yandi vandaka kumona ve bikesa yina yandi vandaka kusala sambu na kusepedisa Nzambi.
Tala mambote yina bakala mosi bakaka sambu nkento na yandi landaka kulonguka Biblia.
Bantangu ya nkaka, bantu ke fundaka Bambangi ya Yehowa nde bo ke kabisaka mabuta. Keti yo ke vandaka ya kieleka?