Bangyufula ya Batangi

Kuvanda na “moyo na kati na yandi mosi” ketendula inki?

Biblia ketubaka nde Yezu Kristu kele na “moyo na kati na yandi mosi” (NW) mpi nde balongoki na yandi kele na ‘moyo na kati na bo mosi.’ (Yoane 5:26; 6:53) Kansi baverse yai zole kele ve ti ntendula mosi.

Yezu kutubaka nde: “Mutindu Tata ke na moyo na kati na yandi mosi . . . , mutindu yo yina yandi me pesaka kiyeka na Mwana na kuvanda mpi na moyo [na kati na yandi mosi, NW].” Na ntwala ya kutuba dyambu yai ya kebenda dikebi, Yezu kutubaka nde: “Mono ke tubila beno mambu ya kieleka: Muntu yina ke waka malongi na mono, ke ndimaka mpi muntu yina tindaka mono, yandi ke na moyo ya mvula na mvula. . . . Na ntangu ke kwisa - na kutuba ya mbote, yo mpi me lunga dezia - bantu yina me fwaka ta wa ndinga ya Mwana-Nzambi; bayina ta wa yandi, bo ta baka moyo.” Na verse yai, Yezu vandaka kutubila kiyeka ya kuluta nene yina Tata na yandi mepesaka yandi, disongidila, ngolo ya kupesa bantu dibaku ya kuvanda bantu ya mbote na meso ya Nzambi. Dyaka, Yezu kele na kiyeka ya kufutumuna bantu yina kele ya kulala na lufwa mpi ya kupesa bo luzingu. Sambu na Yezu, kuvanda na “moyo na kati na yandi mosi” ketendula nde Nzambi mepesaka yandi biyeka yina. Bonso Tata, Mwana mpi kele na “moyo sambu na kupesa bantu.” (Yoane 5:24-26) Inki beto lenda tuba sambu na balongoki na yandi?

Kiteso ya mvula mosi na nima, Yezu kusongaka bawi na yandi nde: “Mono ke tubila beno mambu ya kieleka: Kana beno dia nitu ya Mwana-muntu ve, kana beno nwa menga na yandi mpi ve, beno ta vanda na moyo ve na kati na beno mosi. Muntu yina ke diaka nitu na mono mpi ke nwaka menga na mono, yandi ke na moyo ya mvula na mvula; mono ta pesa yandi diaka moyo na kilumbu ya nsuka.” (Yoane 6:53, 54) Na verse yai, Yezu kefwanisa kuvanda na ‘moyo na kati na beno mosi’ ti kubaka “moyo ya mvula na mvula.” Bangogo ya mutindu yai ya bo kesonikaka mutindu mosi na gramere nde kuvanda na ‘moyo na kati na beno mosi’ kele mpi na bisika yankaka na Masonuku ya Kigreki. Beto baka bambandu yai zole, “Beno vanda na mungwa [na kati] na beno mosi” mpi “bo kebakaka mumvimba ya lufutu na bo mosi.” (Marko 9:50, NW; Roma 1:27, NW) Na baverse yai zole, mutindu ya kutuba yai ketendula ve kuvanda na kiyeka ya kupesa bankaka mungwa to ya kupesa muntu lufutu. Kansi, yo ketendula kimuntu to muntu ya mvimba. Yo yina, bangogo kuvanda na ‘moyo na kati na beno mosi’ yina Yoane 6:53 kesadila ketendula kaka kubaka mpenza luzingu yonso.

Ntangu yandi tubilaka balongoki na yandi nde bo tavanda na moyo na kati na bo mosi, Yezu kutubilaka nitu ti menga na yandi. Na nima, ntangu yandi tulaka nkinsi ya Madya ya Nkokila ya Mfumu, Yezu kutubilaka dyaka nitu ti menga na yandi mpi yandi songaka balongoki na yandi yina zolaka kukota na kuwakana ya mpa nde bo fwete dya mampa ya kukonda levire mpi kunwa vinu. Keti yo ketendula nde kaka Bakristu ya kupakulama, yina kele na kuwakana ya mpa ti Yehowa Nzambi, bantu tabaka mpenza luzingu yonso ya mutindu yina? Ve. Dyambu ya zole kusalamaka na nima ya mvula mosi. Bantu yina kuwaka bangogo ya Yezu yina kele na Yoane 6:53, 54 kuzabaka ve nde, konso mvula, bo tasalaka nkinsi yina tamonisaka bidimbu ya nitu ti ya menga ya Kristu.

Na Yoane kapu 6, Yezu kefwanisa ntetentete nitu na yandi ti mana, nde: “Bankaka na beno diaka madia yai mana bonso mampa ntangu bo vandaka na ntoto ya zelo na zelo, kansi bo fwaka. Kansi mampa yina ke katukaka na zulu, kana muntu kudia yo, yandi ta fwa ve. Mono kele mampa yina ke pesaka moyo; mono me katukaka na zulu. Kana muntu kudia mampa yai, yandi ta zinga mvula na mvula.” Nitu ti menga ya Yezu kuvandaka mfunu mingi kuluta mana yina bantu kudyaka. Na nki mutindu? Na mpila yandi pesaka nitu na yandi sambu “bantu yonso kuvanda na moyo,” yina tasala nde bo zinga mvula na mvula.a Yo yina, bangogo kuvanda na ‘moyo na kati na beno mosi’ yina kele na Yoane 6:53 ketadila bantu yonso yina tabaka luzingu ya mvula na mvula, na zulu to na ntoto.​—Yoane 6:48-51.

Na nki ntangu balongoki ya Kristu tabaka luzingu na bo mosi, to tabaka mpenza luzingu yonso? Sambu na bapakulami yina tayala na Kimfumu, yo tasalama ntangu bo tafutumuka na zulu bonso bigangwa ya kimpeve yina kefwaka ve. (1 Korinto 15:52, 53; 1 Yoane 3:2) “Mameme ya nkaka” ya Yezu tabaka mpenza luzingu yonso na nsuka ya Luyalu na yandi ya Bamvula Funda. Na ntangu yina, bo tavanda bo memekama dezia, bo memonisa kwikama, mpi bo memonana bantu ya lunungu yina mefwana na kuzinga mvula na mvula na Paladisu ya ntoto.​—Yoane 10:16; Kusonga 20:5, 7-10.

[Noti na nsi ya lutiti]

[Bifwanisu ya kele na lutiti  9]

Bakristu ya kyeleka yonso lenda vanda na ‘moyo na bo mosi’