Bafwa Kele Wapi?
“NTOTO kele kisika ya zandu; zulu kele kisika na beto ya kuvanda,” ketuba kingana mosi ya Yoruba na weste ya Afrika. Dibanza yai kele na mabundu mingi. Yau kemonisa dibanza yai nde ntoto kele bonso kisaka ya zandu ya beto kevandaka na mwa ntangu fyoti mpi na nima beto kekatukaka. Na kutadila lukwikilu yai, na lufwa beto kekwendaka na zulu, kisika na beto ya kyeleka ya kuvanda.
Ya kyeleka Biblia kelongaka nde bantu ya nkaka kekwendaka na zulu. Yezu Kristu kutubaka na bantumwa na yandi ya kwikama nde: “Na nzo ya Tata na mono bisika kele mingi. . . . Mono kekwenda kuyidikila beno bisika. Dyaka, kana mono kukwenda ye mpi mono kuyidikila beno kisika, mono takwisa dyaka mpi mono tayamba beno penepene na mono, sambu nde kisika ya mono kele beno mpi kuvanda.”—Yoane 14:2, 3, NW.
Bangogo ya Yezu kesongidila ve nde bantu ya mbote yonso kekwendaka na zulu to nde zulu kele kisika ya kuvanda ya bantu. Bantu ya nkaka takwenda na zulu sambu na luyalu ya ntoto. Yehowa Nzambi zabaka nde baluyalu ya bantu tanunga ve ata mbala mosi na kutwadisa mambu ya ntoto. Yau yina, yandi salaka bangidika sambu nde luyalu ya zulu, to Kimfumu, kuyala ntoto mpi kukumisa yau Paladisu bonso kuvandaka lukanu na yandi ya ntete. (Matayo 6:9, 10) Yezu tavanda Ntotila ya Kimfumu ya Nzambi. (Daniele 7:13, 14) Bantu ya nkaka tasolama sambu na kuyala ntoto ti yandi. Biblia yitaka kutuba nde bayina takwenda na zulu tavanda “Kimfumu mpi banganga-nzambi sambu na Nzambi na beto” mpi “tayala bonso bantotila na zulu ya ntoto.”—Kusonga 5:10, NW.
Nani Takwenda na Zulu?
Na kutadilaka bunene ya mukumba yina tavanda na bantwadisi yai ya zulu, ngituka kele ve nde bau kuvanda na malombilu ya ngolo ya kulungisa. Bayina takwenda na zulu fwete kuvanda na nzayilu ya kyeleka ya Yehowa mpi fwete kulemfukila yandi. (Yoane 17:3; Roma 6:17, 18) Yau melombama na bau kusadila lukwikilu na kimenga ya lugulusu ya Yezu Kristu. (Yoane 3:16) Kansi, mambu ya nkaka melombama dyaka. Bau fwete kubingama mpi kusolama na Nzambi na nzila ya Mwana na yandi. (2 Timoteo 1:9, 10; 1 Piere 2:9, NW) Kuluta dyaka, bau fwete kuvanda Bakristu ya mebakaka mbotika yina “mebutukaka dyaka mbala ya zole,” ya mebutukaka na mpeve santu ya Nzambi. (Yoane 1:12, 13; 3:3-6, NW) Bau fwete kubikala ya kwikama na Nzambi tii na lufwa na bau.—2 Timoteo 2:11-13; Kusonga 2:10, NW.
Mafuku ya bantu yina kuzingaka mpi yina kufwaka ya kwikama kulungisaka ve malombilu yina. Bamingi kubakaka ve dibaku ya kulonguka na kuzaba Nzambi ya kyeleka. Bankaka metangaka Biblia ntete ve mpi kuzaba mambu fyoti to kima mosi ve, na yina metala Yezu Kristu. Ata na kati ya Bakristu ya kyeleka yina kele na zulu ya ntoto bubu yai, ntalu fyoti kaka mesolamaka na Nzambi sambu na kubaka luzingu na zulu.
Yau yina, ntalu ya bayina takwenda na zulu kele na kutubaka ya mbote fyoti. Yezu kutuba sambu na bau bonso “kibuka ya fyoti.” (Luka 12:32) Na nima, yau kusongamaka na ntumwa Yoane nde “bayina ya kusumbamaka na ntoto” sambu na kuyala ti Kristu na mazulu kele na ntalu ya 144 000. (Kusonga 14:1, 3; 20:6, NW) Kana beto kutesa na mafuku ya bantu yina tazinga na zulu ya ntoto, ntalu yina kele ya kuluta fyoti.
Bayina Takwenda ve na Zulu
Inki takumina bayina takwenda ve na zulu? Keti bau kele na kumona mpasi na kisika mosi ya mpasi ya kimakulu, bonso kelongaka yau mabundu mingi? Na kutuba ya mbote, ve, sambu Yehowa kele Nzambi ya zola. Bibuti ya zola kelosaka ve bana na bau na tiya, mpi Yehowa lenda ve kunyokula bantu mutindu yina.—1 Yoane 4:8, NW.
Bantu ya kuluta mingi na bayina mefwaka kele na kivuvu ya lufutumuku na kati ya paladisu na zulu ya ntoto. Biblia ketuba nde Yehowa salaka ntoto “sambu bantu kuzinga muna.” (Yezaya 45:18) Muyimbi Bankunga kutubaka nde: “Zulu kele ya Mfumu Nzambi yandi mosi, kansi ntoto yandi pesaka yo na bantu.” (Bankunga 115:16) Ikele ntoto, kansi zulu ve, ya kele kisika ya bantu fwete kuzinga ntangu yonso.
Yezu kutabaka nde: “Ntangu ke kwisa, bantu yonso yina me fwaka kele na maziamu, bo ta wa ndinga na yandi [ya Yezu, “Mwana ya muntu”] ebuna bo ta basika.” (Yoane 5:27-29) Ntumwa mukristu Polo kundimaka nde: “Mono kele ti kivuvu na Nzambi . . . nde lufutumuku sambu na bantu ya lunungu ti bantu ya kukonda lunungu tavanda.” (Bisalu 24:15, NW) Na zulu ya nti ya mpasi, Yezu kusilaka luzingu na paladisu ya ntoto na muntu ya mbi ya kubalulaka ntima, na nzila ya lufutumuku.—Luka 23:43.
Kansi, inki kele ntangu yai nkadilu ya bafwa yina tafutumuka na kubaka luzingu na ntoto? Dyambu mosi kusalamaka na kisalu ya Yezu kesadisa beto na kupesa mvutu. Nduku na yandi Lazare kufwaka. Na ntwala ya kwenda kufutumuna yandi, Yezu kutubaka na balongoki na Yandi nde: “Nduku na beto Lazare me lala mpongi, kansi mono ke kwenda kutedimisa yandi.” (Yoane 11:11) Na yau Yezu tesaka lufwa ti mpongi, mpongi ya ngolo ya kukonda ndosi.
Bau Kelala na Lufwa
Bamvese ya nkaka ya Biblia kewakana ti dibanza yai ya mpongi na lufwa. Yau kelonga ve nde bantu kele na moyo ya kefwaka ve, yina na lufwa, kekwendaka na nsi ya bampeve. Kansi, Biblia ketuba nde: “Bantu ya kufwa . . . kuzaba kima ve . . . Kuzola na bo, kimbeni na bo ti kimpala na bo kufwaka ti bo nzila mosi . . . Na nsi ya bafwa [mazyamu], kisika ya nge kekwenda, kisalu kele ve, ngindu kele ve, mayele mpi kele ve.” (Longi 9:5, 6, 10) Dyaka, Muyimbi ya Bankunga kutubaka nde muntu “kevutuka na putulu, kilumbu yau yina bangindu na yandi yonso kefwaka.”—Bankunga 146:4.
Bamvese yina kemonisa yau pwelele nde bayina melala na lufwa lenda ve kumona to kuwa beto. Bau lenda ve kunatila beto lusakumunu to mpasi. Bau kele na zulu ve, mpi bau kezingaka na kati ya kimvuka ya bankaka ve. Bau kele na luzingu ve, bau kele dyaka mpi ve.
Na ntangu yina mesolamaka na Nzambi, bayina kelala bubu na kati ya lufwa mpi ya yandi mebumbaka na mabanza na yandi tavutulama na luzingu na paladisu ya ntoto. Yau tavanda ntoto ya kugedisama na mvindu, na mavwanga, mpi na bampasi ya bantu kekutana na yau bubu. Inki kyese tavanda ntangu yina! Na Paladisu yina bau tavanda na luzingu ya mvula na mvula, sambu Bankunga 37:29 (NW) kendimisa beto nde: “Bantu ya lunungu tabaka ntoto, na zulu na yau bau tazinga kimakulu.”