3. Na nki kiteso komplo ya Balami kunungaka?

³ Keti mayele yai kunungaka? Ee, na kiteso mosi buna. Makumi ya mafunda ya bantu ya Izraele kudyaka pambu yina na ‘kusalaka pite na bankento ya nsi ya Moabi.’ Bo yantikaka nkutu kusambila banzambi ya Moabi, yika mpi nzambi ya nzanzi Baale ya bwala Peore, nzambi ya kubutisa, to ya kuvukisa nitu. Ebuna, bantu ya Izraele 24 000 kufwaka kaka na ntwala ya kukota na Ntoto ya Lusilu. Yo vandaka dyambu mosi ya mawa mpenza!—Kutanga 25:1-9.

4. Sambu na nki mafunda ya bantu ya Izraele kubwaka na pambu ya mansoni?

⁴ Inki kukangulaka nzila na mpasi yai? Bantu mingi kukumaka ti ntima ya mbi sambu bo yambulaka Yehowa, Nzambi yina kugulusaka bo na Ezipte, yina kudisaka bo na ntoto ya zelo na zelo, mpi yina kutwadisaka bo na lutaninu tii na ntoto ya lusilu. (Baebreo 3:12) Ntangu yandi vandaka kuyindula mambu yina, ntumwa Polo kusonikaka nde: “Beto kusala pite ve, mutindu bantu ya nkaka na kati na bo salaka; bantu mile makumi zole na tatu fwaka na kilumbu mosi.”a—1 Korinto 10:8.